សេដ្ឋកិច្ចអាមេរិកបំបែកឯត្តគកម្ម ខាងបង្កើតការងារជិត៥លាន នៅខែមិថុនា
សេដ្ឋកិច្ចអាមេរិក បានបង្កើតការងារជាង៤លាន ៨សែន នៅខែមិថុនា។ ជាចំនួនដ៏ច្រើន មិនធ្លាប់មាន ក្នុងប្រវត្តិបង្កើតការងារអាមេរិក ដែលជាហេតុធ្វើឲ្យលោកប្រធានាធិបតី អាមេរិក ដូណាល់ ត្រាំ មិនអាច មិនលើកសរសើរខ្លួនឯង នៅក្នុងសន្និសីទកាសែត កាលពីថ្ងៃព្រហស្បតិ៍ម្សិលមិញ។ សម្រាប់ប្រធានាធិបតីអាមេរិក តួលេខបង្កើតការងារ ដ៏ច្រើនសន្ធឹកសន្ធាប់នេះ ស បញ្ជាក់ថា សេដ្ឋកិច្ចអាមេរិកកំពុងចាប់ងើបឈរ ឡើងវិញ បន្ទាប់ពីរងគ្រោះ ប៉ះពាល់ដោយសារជំងឺរាតត្បាត កូវីដ១៩។ តើមានហេតុផលអ្វីដែលធ្វើឲ្យសេដ្ឋកិច្ចអាមេរិកាំងបង្កើតការងារ ក្នុងចំនួនច្រើនរាប់លាន នៅក្នុងរយៈពេលតែ១ខែយ៉ាងដូច្នេះ?
ចុះផ្សាយនៅថ្ងៃ៖
ស្តាប់ - ០២:៤៧
ក្រសួងការងារអាមេរិក កាលពីថ្ងៃព្រហស្បតិ៍ បានបង្ហាញតួលេខគួរឲ្យលើកទឹកចិត្ត នោះ គឺសេដ្ឋកិច្ចអាមេរិក បានបង្កើតការងារដល់ទៅជិត៥លាន នៅក្នុងរយៈពេលតែមួយខែ មិថុនា។ ក្រៅតែពីវិស័យកសិកម្ម សេដ្ឋកិច្ចអាមេរិកបានបង្កើតការងារ ជាង ៤លាន ៨សែន ការងារ ដែលជាចំនួនដ៏ច្រើន ខ្ពស់ជាងការព្យាករទុករបស់អ្នកសេដ្ឋកិច្ចដែល មានត្រឹម ៣លានប៉ុណ្ណោះ។
តាមការពន្យល់របស់ក្រសួងការងារអាមេរិក ការបង្កើតការងារ ដ៏ច្រើន បំបែកឯត្តទកម្ម ជាលទ្ធផលនៃការចាប់ផ្តើមសកម្មភាពសេដ្ឋកិច្ចឡើងវិញ បន្ទាប់ពីបានផ្អាក នៅខែ មីនា និងខែមេសា ដោយសារតែ វិបត្តិកូវីដ ១៩។ ចាប់តាំងពីបើកទីក្រុង និងសកម្មភាពសេដ្ឋកិច្ច វិស័យ សណ្ឋាគារ ទេសចរណ៍កំសាន្ត បានបង្កើនចំនួនការងារ គួរឲ្យកត់សំគាល់។
ចំនួនមនុស្សគ្មាន ការងារធ្វើថយចុះ នៅខែមិថុនា ពី ១៣% មកនៅត្រឹម ១១% ដែលស្មើនឹងចំនួន ១៧,៨លាននាក់។ នេះក៏ជាដំណឹងល្អ ប៉ុន្តែ នៅតែចំនួនដ៏ច្រើន កើនឡើង ដល់ទៅ ១២លាន បើប្រៀបធៀបនឹងរយៈពេលមុនកើតមានជំងឺកូវីដ ដែលមានអ្នកគ្មានការងារធ្វើ តែជាង ៣លាននាក់ប៉ុណ្ណោះ។
តួលេខ ការងារបង្កើតថ្មី ដល់ទៅជិត ៥លានការងារ ជាដំណឹងល្អបំផុតសម្រាប់លោកដូណាល់ ត្រាំ ដែលផ្តោតយក សេដ្ឋកិច្ចងើបឡើងវិញ ជាចំនុចសំខាន់នៃយុទ្ធនាការឃោសនាបោះឆ្នោត ប្រធានាធិបតី នៅប៉ុន្មានខែខាងមុខ។
នៅព្រឹកថ្ងៃព្រហស្បតិ៍ នៅក្នុងសន្និសីទកាសែត លោកប្រធានាធិបតីអាមេរិក មិនលាក់ទេ ក្តីអំណររបស់លោក ព្រោះថា ដំណឹងបង្កើតការងារក្នុងចំនួនដ៏ច្រើន ធ្លាក់ នៅមុនពេលការបោះឆ្នោត។
សេដ្ឋកិច្ចអាមេរិកបង្កើតការងារដល់ទៅ ៤,៨លាន គឺនៅតែតិច បើរប្រៀបធៀបនឹងការងារ ជាង ២០លាន ការងារ ដែលត្រូវបំផ្លាញ ដោយវិបត្តិកូវីដ។ តាមសេដ្ឋកិច្ចវិទូ ការងារដែលគេរាប់ចូលក្នុងតួលេខ កាលពីថ្ងៃព្រហស្បត៍ តាមពិតជាការងារដែលគេធ្លាប់បានលុបចោល តាមរយៈ ការបណ្តេញបុគ្គលិក នៅពេលកន្លែងហាត់កីឡា រង្គសាល ក្រុមហ៊ុនមួយចំនួន ត្រូវបិទទ្វារ កាលពីខែមីនា ដើម្បីទប់ស្កាត់ជំងឺរាតត្បាត កូវីដ។
មួយវិញទៀត ចំនួនបង្កើតការងារកើនឡើងច្រើនលឿន ក៏អាចជាលទ្ធផលនៃកម្មវិធីជំនួយ របស់បណ្តា រដ្ឋ ឈ្មោះថា Paychek Protection Program។ តាមរយៈកញ្ចប់ប្រាក់កម្ចី ក្រុមហ៊ុនអាចសងទៅរដ្ឋតែមួយផ្នែក បើសិនគេសន្យាបន្តបើកប្រាក់ខែឲ្យបុគ្គលិក។
បញ្ហានៅត្រង់ថា កញ្ចប់ជំនួយរដ្ឋកំពុងចាប់ធូរថយចុះ ដែលធ្វើឲ្យគេបារម្ភថា នឹងអាចមានការបណ្តេញបុគ្គលិកសាជាថ្មី។ ម្យ៉ាងទៀត ការវិលត្រលប់ទៅបិទខ្ទប់ ផ្អាកសកម្មភាពសេដ្ឋកិច្ចសាជាថ្មី នៅតាមបណ្តារដ្ឋមួយចំនួន ដោយសារតែការផ្ទុះខ្លាំង ករណីឆ្លង ជំងឺកូវីដ នៅប៉ុន្មានថ្ងៃនេះ រឹតតែធ្វើឲ្យគេជឿថា ចំនួនការងារបង្កើតថ្មីនឹងអាចធ្លាក់ចុះដល់សូន្យឡើងវិញ នៅ ខែក្រោយនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ