ប្រេស៊ីល៖ ហិង្សាប៉ះទង្គិចគ្នា រវាងបាតុករគាំទ្រ និងបាតុករប្រឆាំងលោកបុលសូណារ៉ូ នៅក្រុងសាវប៉ូឡូ
នៅទីក្រុងសាវប៉ូឡូ កាលពីថ្ងៃអាទិត្យទី៣១ ឧសភា មានការប៉ះទង្គិចគ្នាដោយហិង្សា រវាងបាតុករ២ក្រុម ដែលម្ខាងជាក្រុមគាំទ្រលោកបុលសូណារ៉ូ និងម្ខាងទៀតគឺជាក្រុមបាតុករ ប្រឆាំងនឹងការដឹកនាំបែបស្តាំនិយមជ្រុលរបស់លោកបុលសូណារ៉ូ។ ការដឹកនាំរបស់លោកបុលសូណារ៉ូ ជាពិសេស ទាក់ទិននឹងបញ្ហាប្រយុទ្ធប្រឆាំងជំងឺឆ្លង កូវីដ១៩ បានធ្វើឲ្យសង្គមប្រេស៊ីល មាន ភាពចម្រូសចម្រាស បាក់បែកគ្នាយ៉ាងខ្លាំង។ គិតមកត្រឹមពេលនេះ ប្រេស៊ីល មានអ្នកឆ្លងជំងឺកូវីដ១៩ ប្រមាណ៥សែននាក់ ហើយជាប្រទេសទី៤ ដែលមានអ្នកស្លាប់ច្រើនជាងគេ ពោលគឺប្រមាណ ជាង២ម៉ឺន ៨ពាន់ ៨០០នាក់។
ចុះផ្សាយនៅថ្ងៃ៖
ស្តាប់ - ០២:២៥
រនាំងបំរាស់ ដែលនគរបាលប្រេស៊ីល បានដាក់រារាំង មិនអាចឃាត់កំហឹងក្រេវក្រោធ របស់ហ្វូងបាតុករ ពីរក្រុម ដែលមានគោលជំហរប្រឆាំងគ្នា។ កាលពីថ្ងៃអាទិត្យទី៣១ឧសភា បាតុកម្មមួយត្រូវបានរៀបចំឡើង នៅកណ្តាលក្រុងសាវប៉ូឡូ ដោយមានមនុស្សចូលរួមប្រមាណ៥០០នាក់ ពាក់អាវខ្មៅនិងមានពាក់ម៉ាសការពារ ដើម្បីបរិហារអំពីការដឹកនាំ បែបFascisme របស់លោកប្រធានាធិបតីបុលសូណារ៉ូ។ ក្នុងពេលជាមួយគ្នានេះដែរ នៅមិនឆ្ងាយប៉ុន្មាន មានបាតុកម្មមួយទៀត របស់ក្រុមគាំទ្រលោកបុលសូណារ៉ូ ដែលពួកគេចេញធ្វើបាតុកម្ម ដើម្បីប្រឆាំងនឹងវិធានការបិទខ្ទប់ប្រទេស សម្រេចដោយអភិបាលរដ្ឋមួយចំនួន ផ្ទុយទៅនឹងគំនិតរបស់លោកបុលសូណារ៉ូ។
ក្រុមបាតុករទាំង២បានប៉ះទង្វិចគ្នា បង្កជាចលាចលហិង្សានៅកណ្តាលទីក្រុង។ បាតុករខ្លះ បានដុតធុងសម្រាម និងបានចោលដុំថ្មទៅលើនគរបាល។ សមត្ថកិច្ចនគរបាលបានប្រើគ្រាប់បែកផ្សែង និងឧស្ម័នបង្ហូរទឹកភ្នែក ដើម្បីបំបែកហ្វូងបាតុករ។ មនុស្សយ៉ាងហោច៣នាក់ ត្រូវបានឃាត់ខ្លួន។
សូមបញ្ជាក់ថា បាតុកម្មប្រឆាំងនឹងលោកបុលសូណារ៉ូ ត្រូវបានកោះហៅប្រមូលគ្នាដោយ ក្លឹបកីឡាបាល់ទាត់ធំៗនៅសាវប៉ូឡូ ខណៈដែលលោកបុលសូណារ៉ូ បានអំពាវនាវ ឲ្យបើកការប្រកួតបាល់ទាត់ឡើងវិញ។ ការអំពាវនាវនេះ ត្រូវបានក្លឹបកីឡានានារិះគន់ថាគ្មានទំនួលខុសត្រូវ និងមិនខ្វល់ពីអាយុជីវិតរបស់កីឡាករ ក៏ដូចជាអ្នកទៅមើល។ លោកប្រធានសហព័ន្ធកីឡាបាល់ទាត់ ក្រុងសាវប៉ូឡូ បានថែមទាំងហៅឲ្យលោកបុលសូណារ៉ូ ចុះចេញពីតំណែងថែមទៀតផង។ ដោយឡែកក្រុមគាំទ្រលោកបុលសូណារ៉ូវិញ បានប្រើប្រាស់បណ្តាញសង្គម ចោទប្រកាន់ថាគឺក្រុមបក្សប្រឆាំង ដែលរួមគ្នា ធ្វើសកម្មភាពចង់ទាញលោកបុលសូណារ៉ូ ឲ្យធ្លាក់ពីកៅអីប្រធានាធិបតី។
នៅឯក្រុងប្រេស៊ីលីយ៉ាឯនោះវិញ នៅខាងមុខវិមានប្រធានាធិបតី មានបាតុរគាំទ្រលោកបុលសូណារ៉ូ ជាច្រើនពាន់នាក់បានមកជួបជុំគ្នា។ លោកបុលសូណារ៉ូ បានលេចមុខចូលរួម ជាមួយអ្នកគាំទ្រខ្លួន យ៉ាងចង្អៀតណែន ដោយមិនខ្វល់បារម្ភពីការរក្សាគំលាតគ្នា ដើម្បីបង្ការការឆ្លងរាលដាលជម្ងឺកូវីដ១៩ឡើយ។
គួរបញ្ជាក់ថា ប្រេស៊ីលជាប្រទេសអាមេរិកឡាទីន ដែលមានអ្នកឆ្លងមេរោគកូរ៉ូណាថ្មី ច្រើនជាងគេបង្អស់។ ជាមួយនឹងការឆ្លងរាលដាលយ៉ាងលឿន នូវជំងឺកូវីដ១៩នេះ សម្តេចប៉ាប ប្រមុខសង្ឃកាតូលិក បានថ្លែងកាលពីថ្ងៃអាទិត្យទី៣១ឧសភា ថាព្រះអង្គមានការព្រួយបារម្ភ ចំពោះអាយុជីវិតរបស់ប្រជាជននៅតំបន់អាមេរិកឡាទីនខ្លាំងណាស់ ជាពិសេសគឺជនជាតិភាគតិចនៅក្នុងតំបន់អាម៉ាហ្សូន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ