ប្រធានាធិបតីប្រេស៊ីល រិះគន់វិធានការបិទខ្ទប់ប្រទេស ថ្វីបើចំនួនអ្នកឆ្លងកូវីដ១៩កើនឡើងកាន់តែខ្លាំង
គិតត្រឹមថ្ងៃអាទិត្យទី១៧ឧសភានេះ ប្រទេសប្រេស៊ីលមានចំនួនអ្នកឆ្លងជម្ងឺកូវីដ១៩ សរុបចំនួនជាង ២សែន ៣ម៉ឺន ៣ពាន់នាក់ ដែលក្នុងនោះមានស្លាប់ ១៥៦៣៣នាក់។ គួរកត់សំគាល់ថា ប្រេស៊ីលជាប្រទេសលំដាប់ទី៥ ដែលមានអ្នកឆ្លងច្រើនជាងគេបំផុតលើពិភពលោក ហើយអ្នកជំនាញ បានក្រើនរំលឹកថា ចំនួននេះអាចនឹងកើនឡើងខ្លាំងថែមទៀត។ ទោះជាយ៉ាងនេះក្តី លោកបុលសូណារ៉ូ ប្រធានាធិបតីប្រេស៊ីល បានចេញមុខរិះគន់សាជាថ្មីទៀត ទៅលើវិធានាការបិទខ្ទប់ប្រទេស និងសកម្មភាពសេដ្ឋកិច្ច ដែលលោកចាត់ទុកថា វាមានគ្រោះថ្នាក់ជាងជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:៤០
មិនខុសពីលោកដូណាល់ ត្រាំ ទេ លោកបុលសូណារ៉ូ ជាមេដឹកនាំ ដែលជឿថាការបិទខ្ទប់ប្រទេស និងសកម្មភាពសេដ្ឋកិច្ច មិនមែនជាដំណោះស្រាយ ក្នុងការប្រយុទ្ធប្រឆាំងនឹងការឆ្លងរាលដាលនូវជម្ងឺកូវីដ១៩។ ជាថ្មីម្តងទៀត កាលពីយប់ថ្ងៃសៅរ៍ លោកបុលសូណារ៉ូ បានសរសេរលើទំព័រ Twitter របស់លោកថា ការបត់បង់ការងារ គ្មានស្បៀងអាហារ និងភាពក្រីក្រតោកយ៉ាក កំពុងតែរងចាំអ្នកណា ដែលគាំទ្រការបិទខ្ទប់ប្រទេសទាំងស្រុង។
ដោយឈរលើបុព្វហេតុសេដ្ឋកិច្ច លោកបុលសូណារ៉ូ បានអំពាវនាវ ឲ្យបើកប្រទេសត្រលប់មករកភាពធម្មតាវិញ។ តែយ៉ាងណា អភិបាលរដ្ឋភាគច្រើននៅប្រេស៊ីល បានបដិសេធ មិនទទួលយកការអនុសាសន៍របស់លោកប្រធានាធិបតីស្តាំនិយមជ្រុលរូបនេះទេ។
ក្រៅពីបានសរសេរសាររិះគន់វិធានការបិទខ្ទប់ប្រទេស លោកបុលសូណារ៉ូ បានចែករំលែកវីដេអូមួយ ដែលក្នុងនោះបុរសម្នាក់អះអាងថាខ្លួនជាគ្រូពេទ្យ បាននិយាយអះអាងថា អ្វីដែលកំណត់ពីកម្រិតអាចស្លាប់ ឬរស់របស់មនុស្សម្នាក់ប្រឈមនឹងកូវីដ១៩ គឺមិនមែនកម្រិតគ្រោះថ្នាក់របស់មេរោគនេះទេ តែគឺជាកម្លាំងនៃប្រព័ន្ធការពារខ្លួនរបស់មនុស្សម្នាក់ៗ។ ក្នុងន័យនេះ បុរសនោះ បានអំពាវនាវឲ្យមនុស្សចេញដើរហើរដូចធម្មតា មិនត្រូវខ្លាចកូវីដ១៩ទេ ដើម្បីបង្កើតឲ្យសរីរាង្គអាចផ្សាំនិងមេរោគ ហើយបង្កើតជាប្រព័ន្ធការពារខ្លួនដែលមានកម្លាំង។
គួររំលឹកថាទ្រឹស្តីនៃការបណ្តោយឲ្យមេរោគចូលផ្សាំក្នុងខ្លួនមនុស្សឲ្យបានច្រើន ដើម្បីឲ្យសរីរាង្គអាចបង្កើតជាប្រព័ន្ធការពារខ្លួននេះ ក៏ធ្លាប់ត្រូវបានរដ្ឋាភិបាលអង់គ្លេសជ្រើសរើសដែរ តែទីបំផុត អ្នកជំនាញជាច្រើន បានយល់ស្របគ្នាថា វាគឺជាគ្រោះថ្នាក់ធំ ព្រោះកូវីដ១៩ជាមេរោគថ្មី ដែលគេមិនអាចដឹងកម្លាំងគ្រោះថ្នាក់របស់វាឡើយ។ ការបិទខ្ទប់ រក្សាចំងាយពីគ្នា មិនប៉ះពាល់គ្នារវាងមនុស្ស គឺជាវិធីតែមួយគត់ ក្នុងការទប់ការឆ្លងរាលដាល និងការស្លាប់ ទំរាំតែគេអាចរកថ្នាំវ៉ាក់សាំងឃើញ។
គួរបញ្ជាក់ថា គិតត្រឹម២៤ម៉ោងចុងក្រោយ ប្រេស៊ីលបានអ្នកឆ្លងកូវីដ១៩ បន្ថែមចំនួនប្រមាណ១៥០០០នាក់ ព្រមទាំងមានស្លាប់៨១៦នាក់ ក្នុងមួយថ្ងៃចុងក្រោយ។ អ្នកឆ្លងកូវីដ១៩ សរុបនៅប្រេស៊ីល គឺមាន២៣៣១៤២នាក់ ដែលធ្វើឲ្យប្រេស៊ីល ក្លាយជាប្រទេសទីមួយនៅអាមេរិកខាងត្បូង និងទី៥ទូទាំងពិភពលោក ដែលមានអ្នកឆ្លងកូវីដ១៩ច្រើនជាងគេ។ អ្នកជំនាញបានក្រើនរំលឹកថា ចំនួនអ្នកឆ្លងនៅប្រេស៊ីល អាចនឹងកើនឡើងលើសនេះ១៥ដង បើសិនជារដ្ឋាភិបាលប្រេស៊ីល នៅតែបន្តគ្មានវិធានការច្បាស់លាស់ ដើម្បីបង្ការការឆ្លងរាលដាល។ កាលពីថ្ងៃទី៨ឧសភា លោក Nelson Teich រដ្ឋមន្ត្រីសុខាភិបាល បានលាឈប់ពីតំណែង បន្ទាប់ពីបានចូលបំពេញការងារបានត្រឹមតែ៤សប្តាហ៍ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ