កូវីដ ១៩៖ អង្គការសហប្រជាជាតិអំពាវនាវរកជំនួយ ជាង៤ពាន់លានដុល្លារបន្ថែមទៀត
អង្គការសហប្រជាជាតិ នៅថ្ងៃព្រហស្បតិ៍នេះ បានអំពាវនាវរកមូលនិធិថ្មី ប្រមាណ៤,៧ពាន់លានដុល្លារបន្ថែមទៀត សម្រាប់យកទៅប្រើ ការពារជីវិតមនុស្សរាប់លាន ពីគ្រោះអត់ឃ្លាន និងភាពក្រីក្រ ដោយសារតែកូវីដ ១៩។ នៅក្នុងសេចក្តីថ្លែងការណ៍ ចុះផ្សាយនៅថ្ងៃនេះ អគ្គលេខាធិការរងអង្គការសហប្រជាជាតិ ទទួលបន្ទុក កិច្ចការមនុស្សធម៌ បានព្រមានពីផលវិបាក ទៅថ្ងៃអនាគត ប្រសិនបើប្រទេសអ្នកមាន បោះបង់ចោល មិនរវីរវល់ក្រុមប្រទេសក្រីក្រ។
ចុះផ្សាយនៅថ្ងៃ៖
ស្តាប់ - ០២:០២
តាមអង្គការសហប្រជាជាតិ សញ្ញា អស្ថិរភាព និងទុក្ខវេទនា ដោយសារតែជំងឺរាតត្បាតកូវីដ១៩ កំពុងចាប់កើតមាន នៅក្នុងបណ្តាប្រទេសក្រីក្របំផុតក្នុងលោក។ ដូច្នេះ បើសិនគេមិនអន្តរាគមន៍ជួយនៅពេលនេះទេ ភាពក្រីក្រ គ្រោះទុរភិក្ស និងជម្លោះប្រដាប់អាវុធ នឹងមានកាន់តែច្រើននៅក្នុងពិភពលោក។ នេះជាការព្រមានរបស់លោក Mark Lowcock អគ្គលេខាធិការរង របស់អង្គការសហប្រជាជាតិ បន្ទុកកិច្ចការមនុស្សធម៌។
ឆ្លើយតបនឹងវិបត្តិមនុស្សធម៌ អង្គការសហប្រជាជាតិធ្លាប់បានអំពាវនាវម្តងហើយ កាលពីថ្ងៃទី២៥ ខែមីនា ដើម្បីស្វែងរកថវិកាប្រមាណ ២ពាន់លានដុល្លារ សម្រាប់ជួយក្រុមប្រទេសជាង២០ ដែលភាគច្រើនជាប្រទេសដែលកំពុងមានសង្រ្គាម ជម្លោះប្រដាប់អាវុធ ដូចជាស៊ីរី អាហ្វហ្កានីស្ថាន លីប៊ី អ៊ុយក្រែន និងយេម៉ែនជាដើម។ នៅពេលនេះ អង្គការសហប្រជាជាតិ ទើបប្រមូលបានតែពាក់កណ្តាលប៉ុណ្ណោះនៃមូលនិធិ ២ពាន់លានដុល្លារ ពីប្រទេសសមាជិករបស់ខ្លួន។
តាម អគ្គលេខាធិការរង របស់អង្គការសហប្រជាជាតិ បន្ទុកកិច្ចការមនុស្សធម៌ គេត្រូវការថវិការ ជាង៤ពាន់លានដុល្លារបន្ថែមទៀត បន្ទាប់ពីគេបញ្ចូលប្រទេសចំនួន៩បន្ថែមទៀត ទៅក្នុងបញ្ជីប្រទេសដែលត្រូវការជំនួយបន្ទាន់ ដូចជា ម៉ូហ្សំប៊ិក ប៉ាគីស្ថាន និងហ្វីលីពីនជាដើម។ បើតាមការវាយតម្លៃរបស់អង្គការសហប្រជាជាតិ ចំនួនមនុស្សស្លាប់ច្រើនបំផុត ដោយសារកូវីដ ១៩ នឹងកើតមាន នៅក្រុមប្រទេសក្រីក្រ នៅក្នុងពេល ៣ ទៅ៦ខែខាងមុខ។
ជារួម អង្គការសហប្រជាជាតិអំពាវនាវចង់បានថវិកាសរុប ៦,៧ពាន់លានសម្រាប់សកម្មភាពមនុស្សធម៌ នៅក្នុងពិភពលោក ពីពេលនេះ រហូតដល់ខែធ្នូចុងឆ្នាំ។ មូលនិធិនឹងត្រូវប្រើជាពិសេស សម្រាប់ទិញ គ្រឿងបរិក្ខាពេទ្យ ការធ្វើតេស្តរកមេរោគ ការព្យាបាលអ្នកជំងឺ កូវីដ និងយុទ្ធនាការទប់ស្កាត់ការឆ្លងជំងឺកូវីដ នៅអាហ្រ្វិក អាមេរិកឡាទីន និងនៅអាស៊ី។ គោលដៅចំបងរបស់អង្គការសហប្រជាជាតិ គឺ អភិវឌ្ឍកម្មវិធីថ្មី ដើម្បីប្រយុទ្ធប្រឆាំងនឹងអសន្តិសុខស្បៀងអាហារ ដែលជាលទ្ធផលនៃវិបត្តិសេដ្ឋកិច្ច បង្កឡើងដោយជំងឺរាតត្បាត កូវីដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ