លោកដូណាល់ ត្រាំ អនុញ្ញាតឲ្យប្រើថ្នាំ Remdesivir ព្យាបាលអ្នកជំងឺកូវីដ១៩
សហរដ្ឋអាមេរិក គឺប្រទេសដែលរងគ្រោះធ្ងន់បំផុត ដោយជំងឺកូវីដ១៩។ គិតមកត្រឹមថ្ងៃទី២ឧសភានេះ មានអ្នកស្លាប់សរុប ប្រមាណជិត៦៥០០០នាក់ នៅសហរដ្ឋអាមេរិក។ លោកដូណាល់ ត្រាំ បានប្រកាសកាលពីល្ងាចថ្ងៃសុក្រទី១ឧសភា បើកឲ្យមន្ទីរពេទ្យ ប្រើប្រាស់ថ្នាំមួយប្រភេទ ឈ្មោះ រឹមដេស៊ីវា (Remdesivir)ដែលជាថ្នាំព្យាបាលជំងឺអេបូឡា យកទៅប្រើលើអ្នកជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:៤៦
យោងតាមការសិក្សាមួយនៅសហរដ្ឋអាមេរិក បានឲ្យដឹងថា ថ្នាំព្យបាលជំងឺអេបូឡា ឈ្មោះ Remdesivir គឺអាចជួយឲ្យអ្នកជំងឺកូវីដ១៩ អាចជាសះស្បើយ បានឆាប់រហ័ស។ លទ្ធផលស្រាវជ្រាវនេះ ត្រូវបានទីភ្នាក់ងារឱសថសហរដ្ឋអាមេរិក យកមកសំអាង និងផ្តល់ក្តីសង្ឃឹមទៅដល់ការប្រយុទ្ធជាមួយជម្ងឺកូវីដ១៩ ដែលកំពុងតែសម្លាប់មនុស្សជាមធ្យមខ្ទង២០០០នាក់ សឹងតែជារៀងរាល់ថ្ងៃ នៅសហរដ្ឋអាេមរិក គិតចាប់ពីពាក់កណ្តាលខែមេសាមក។
ត្រេកអរចំពោះនឹងលទ្ធផលស្រាវជ្រាវនេះ លោកដូណាល់ ត្រាំ បានប្រកាសភ្លាម នៅល្ងាចថ្ងៃទី១ឧសភា អនុញ្ញាតឲ្យប្រើថ្នាំ Remdesivir នេះទៅលើអ្នកជំងឺកូវីដ១៩។ យោងតាមលោកដូណាល់ ត្រាំ ចាប់ពីពេលនេះទៅ មន្ទីរពេទ្យនៅសហរដ្ឋអាេមរិកទាំងអស់ អាចប្រើថ្នាំនេះ ជួួយអ្នកជំងឺកូវីដ១៩ ដែលមានអាការៈធ្ងន់ធ្ងរខ្លាំង ដូចជាអ្នកជំងឺ ដែលត្រូវបញ្ចូលបំពង់ជំនួយការដង្ហើមជាដើម។
គួរបញ្ជាាក់ថា ថ្នាំ Remdesivir គឺជាថ្នាំប្រឆាំងមេរោគ ដែលផលិតសាកល្បងដោយ មន្ទីរពិសោធន៍អាមេរិក ឈ្មោះ Gilead Sciences ដើម្បីសាកប្រើទៅលើអ្នកជំងឺអេបូឡា។ នៅឆ្នាំ២០១៦ ថ្នាំនេះត្រូវបានគេសាកល្បងប្រើក្នុងទ្រង់ទ្រាយធំ ជាមួយនឹងថ្នាំ២ប្រភេទផ្សេងទៀត ទៅលើអ្នកជំងឺអេបូឡា នៅសាធារណៈរដ្ឋប្រជាធិបតេយ្យកុងហ្គោ។ តែលទ្ធផលបង្ហាញថា ថ្នាំ Remdesivir មិនមានប្រសិទ្ធិភាពល្អ លើជាងថ្នាំ២មុខផ្សេងទៀតនោះទេ។
ដោយឡែក ទាក់ទិននឹងការប្រើថ្នាំ Remdesivirនេះ ទៅលើអ្នកជម្ងឺកូវីដ១៩ គឺវិទ្យាស្ថានសុខាភិបាលសហរដ្ឋអាមេរិក ជាអ្នកផ្តើមធ្វើតេស្តសាកល្បង ក្នុងទ្រង់ទ្រាយធំ ទៅលើអ្នកជំងឺប្រមាណ១០៦៣នាក់។ យោងតាមលទ្ធផលបឋម ចេញផ្សាយកាលពីថ្ងៃទី ២៩មេសា បង្ហាញថា អ្នកជំងឺកូវីដ១៩ ចំនួនប្រមាណ៣១% បានជាសះស្បើយ ឆាប់រហ័សជាងអ្នកជម្ងឺ ដែលមិនប្រើថ្នាំនេះ។ លោក វិជ្ជបណ្ឌិត Anthony Fauci ទីប្រឹក្សាពិសេសរបស់លោកដូណាល់ ត្រាំ បានអះអាងថា លទ្ធផលនេះ បង្ហាញយ៉ាងច្បាស់ថា ថ្នាំ Remdesivir មានប្រសិទ្ធិភាពល្អ ជួយពន្លឿនការជាសះស្បើយ ពីជម្ងឺកូវីដ១៩។
ដោយឡែក យោងតាមការចុះផ្សាយរបស់ទស្សនាវត្តីវិជ្ជសាស្ត្រ The Lancet បានលើកឡើងថា ការសិក្សាសាកល្បងមួយទៀត ធ្វើឡើងដោយក្រុមគ្រូពេទ្យចិននៅវូហាន ប្រើថ្នាំ Remdesivir ទៅលើអ្នកជំងឺចំនួន២៣៧នាក់ គឺលទ្ធផលមិនសូវជាល្អនោះទេ។ តែយ៉ាងណា លោក Stephen Evans អ្នកជំនាញវិភាគតួលេខវិជ្ជសាស្ត្រនៅ សាលាសិក្សាវិជ្ជសាស្ត្រជំងឺឆ្លង និងអនាម័យទីក្រុងឡុងដ៍ បានលើកឡើងថា ការសិក្សានៅចិនមានទ្រង់ទ្រាយតូចពេក។ ចំណែកឯការសិក្សារបស់សហរដ្ឋអាមេរិក ថ្វីបើមានទ្រង់ទ្រាយធំជាង ហើយបង្ហាញលទ្ធផលល្អមែន តែមិនមែនមានន័យថា ថ្នាំ Remdesivir គឺជាថ្នាំសក្តិសិទ្ធព្យាបាល ជម្ងឺកូវីដ១៩នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ