លោកត្រាំ ភ្ជាប់កូវីដ១៩ ទៅនឹងការគំរាមដំឡើងពន្ធគយបន្ថែមលើផលិតផលចិន
កូវីដ១៩ ដែលបង្កឡើងដោយមេរោគកូរ៉ូណាថ្មី និងដែលលេចឡើងជាដំបូងនៅខេត្តហ៊ូពេប្រទេសចិន កាលពីចុងឆ្នាំ២០១៩ កំពុងតែធ្វើឱ្យទំនាក់ទំនងចិន-អាមេរិកធ្លាក់ដុនដាបកាន់តែខ្លាំងឡើងៗ។ លោក ដូណាល់ ត្រាំ បានអះអាងនៅថ្ងៃព្រហស្បតិ៍ទី ៣០មេសា ឆ្នាំ២០២០ ថាមានភស្តុតាងបញ្ជាក់ថា កូវីដ១៩ មានប្រភពចេញមកពីមន្ទីរពិសោធន៍ចិននៅវូហាន។ ដូច្នេះដើម្បីដាក់ព្រមានចិន លោកដូណាល់ ត្រាំ ចង់ដាក់ទណ្ឌកម្មដំឡើងពន្ធនាំចូលលើផលិតផល ថ្មីបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:៣៣
ពីមុនមក លោកប្រធានាធិបតីអាមេរិក បានត្រឹមតែបន្ទោសរដ្ឋាភិបាលចិន ថាគ្មានតម្លាភាពក្នុងចំណាត់ការ និងចោទប៉េកាំងថាប៉ុនប៉ងលាក់បាំងព័ត៌មានស្តីពី ភាពធ្ងន់ធ្ងររបស់កូរ៉ូណាវីរុសថ្មី ប៉ុន្តែនៅក្នុងសន្និសីទកាសែតប្រចាំថ្ងៃ នាថ្ងៃព្រហស្បតិ៍ទី ៣០ មេសាម្សិលមិញ លោក ដូណាល់ ត្រាំ បានបញ្ជាក់ដោយចំៗ មួយកំរិតថា លោកមានភស្តុតាង គួរជឿជាក់ បញ្ជាក់ថាមេរោគកូរ៉ូណាវីរុសថ្មី មានប្រភពចេញពីមន្ទីរពិសោធន៍ចិននៅវូហាន។
មានភស្តុតាងអ្វីខ្លះ ? លោកដូណាល់ត្រាំ មិនបានបញ្ជាក់ទេ។ លោកគ្រាន់តែអះអាងថា ការរីកសាយភាយនៃមេរោគ ទំនងអាចមានពីរយ៉ាង ប្រហែលមកពីគ្មានសមត្ថភាពទប់ ឬប្រហែលមកពីមានចេតនាបណ្តោយឱ្យមេរោគរីករាលដាល តែលោក មិនទាន់អាចនិយាយអ្វីច្រើនបាននៅពេលនេះ។ ប៉ុន្តែប្រឈមនឹងទង្វើបែបនេះ ចិនត្រូវតែរងទណ្ឌកម្ម។ អាមេរិកនឹងដំឡើងពន្ធនាំចូលបន្ថែមទៀតលើផលិតផលចិន បើទោះបីជាកាលពីខែមករា ចិននិងអាមេរិកសម្រេចបានកិច្ចព្រមព្រៀងពាណិជ្ជកម្មយ៉ាងល្អនឹងគ្នាក៏ដោយ។ ពោលគឺអាមេរិកនឹងត្រលប់ទៅបើវិធានការចាស់ដែលធ្លាប់អនុវត្តក្នុងពេលមានសង្គ្រាមពាណិជ្ជកម្មនឹងគ្នា កាលពីឆ្នាំ២០១៩។
សូមបញ្ជាក់ថា ប្រតិកម្មរបស់លោក ដូណាល់ត្រាំជុំវិញប្រភពនៃវីរុសកូរ៉ូណាថ្មី ធ្លាក់មកតែប៉ុន្មានម៉ោងក្រោយការផ្សព្វផ្សាយលទ្ធផលអង្កេតរបស់ភ្នាក់ងារចារកិច្ចអាមេរិក។ នៅក្នុងសេចក្តីថ្លែងការណ៍ ភ្នាក់ងារចារកិច្ចអាមេរិកបានបញ្ចប់សន្និដ្ឋានថា វីរុសកូណាថ្មី នៃជំងឺកូវីដ១៩ មិនមែនជាវីរុសសប្បនិម្មិត្ត ដែលគេបង្កើឡើង និងដែលគេធ្វើការប្តូរផ្លាស់ហ្សែន ដូចពាក្យចចាមអារាមទេ។ ប៉ុន្តែទោះជាយ៉ាងដូច្នេះក្តី ក៏លោកដូណាល់ត្រាំ នៅតែអាចភ្ជាប់បញ្ហាកូវីដ១៩ ទៅនឹងការចង់ដំឡើងពន្ធចិនបានដដែល។
ជាចម្លើយតប ចិនបានបរិហារលោកដូណាល់ ត្រាំ វិញ ថាមួលបង្កាច់ចិន និងប្រើតាកតិចបង្វែរចាប់អារម្មណ៍ចេញពីចំណាត់ការមិនល្អរបស់អាមេរិកក្នុងការប្រយុទ្ធប្រឆាំងនឹងវិបត្តិកូវីដ១៩។ បើតាមអ្នកឆ្លើយឆ្លងព័ត៌មានរបស់វិទ្យុបារាំងប្រចាំប៉េកាំង សហរដ្ឋអាមេរិក និងលោកដូណាល់ ត្រាំ ក៏ជាទិសដៅនៃការវាយប្រហាររបស់សារព័ត៌មានចិនដែរ។ លោក ត្រាំ និងលោកស៊ី ជិនពីង បាននិយាយទាក់ទងគ្នាដោយផ្ទាល់ លើកចុងក្រោយបំផុត កាលពីចុងខែមីនា។ មេដឹកនាំមហាអំណាចទាំងពីរ បានសម្តែងសាមគ្គីភាពក្នុងការប្រយុទ្ធប្រឆាំងនឹងរោគរាតត្បាតកូវីដ១៩ ប៉ុន្តែជាសាមគ្គីភាពតែសម្បកក្រៅតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ