សហរដ្ឋអាមេរិកសុំអង្គការសហប្រជាជាតិឱ្យគាំទ្រកិច្ចព្រមព្រៀងអាមេរិក-តាលីបង់
សហរដ្ឋអាមេរិក កំពុងពិភាក្សាស្វែងរកការគាំទ្រកិច្ចព្រមព្រៀងសន្តិភាពអាមេរិក-តាលីបង់ ពីសមាជិកក្រុមប្រឹក្សាសន្តិសុខ១៤ប្រទេសផ្សេងទៀត។ អាមេរិកចង់ឱ្យកិច្ចព្រមព្រៀងទ្វេភាគីដែលខ្លួនបានចុះហត្ថលេខាជាមួយពួកតាលីបង់ កាលពីថ្ងៃទី ២៩កុម្ភៈ២០២០ ក្លាយកិច្ចព្រមព្រៀងទទួលយកដោយអង្គការសហប្រជាជាតិ តាមរយៈការអនុម័តចេញជាសេចក្តីសម្រេចចិត្តមួយ។ ជាសំណើបែបបទដ៏កម្រ ព្រោះនេះគ្រាន់តែជាកិច្ចព្រមព្រៀងរវាងប្រទេសមួយ ជាមួយនឹងពួកឧទ្ទាម។
ចុះផ្សាយនៅថ្ងៃ៖
ស្តាប់ - ០២:២៤
បើតាមគម្រោងសេចក្តីសម្រេចចិត្តស្នើដោយសហរដ្ឋអាមេរិកដែលភ្នាក់ងារសារព័ត៌មានបារាំងទទួលបាន និងដែលក្រុមប្រឹក្សាសន្តិសុខអាចនឹងធ្វើការបោះឆ្នោតអនុម័តនៅចន្ទទី ៩មីនាខាងមុខ អាមេរិកចង់ឱ្យក្រុមប្រឹក្សាសន្តិសុខអង្គការសហប្រជាជាតិ ប្រកាសទទួលយកកិច្ចព្រមព្រៀងទ្វេភាគីអាមេរិក-តាលីបង់សម្រេចបានកាលពីថ្ងៃ២៩កុម្ភៈ ថាជាអំណោយផលនៃសន្តិភាពនៅអាហ្វហ្កានីស្ថាន។ អាមេរិកចង់ឱ្យគ្រប់ប្រទេសជាសមាជិកអង្គការសហប្រជាជាតិ ផ្តល់ការគាំទ្រយ៉ាងពេញទំហឹង លើការចរចាឆ្ពោះទៅរកកិច្ចព្រមព្រៀងសន្តិភាពពេញលេញ និងជានិរន្តន៍ សម្រាប់អាហ្វហ្កានីស្ថាន និងប្រជាពលរដ្ឋអាហ្វហ្កានីស្ថាន។
គម្រោងសេចក្តីសម្រេចចិត្តអាមេរិក ក៏បានដាក់សម្ពាធលើរដ្ឋាភិបាលអាហ្វហ្កានីស្ថាន ឱ្យចូលចរចាជាមួយពួកតាលីបង់ដើម្បីសម្រេចកិច្ចព្រមព្រៀងឈប់បាញ់ទាំងស្រុងនិងយូរអង្វែង។ ប៉ុន្តែខុសពីគម្រោងសេចក្តីសម្រេចមុន អត្ថបទថ្មីនេះពុំមានដាក់លក្ខខណ្ឌចាំបាច់ត្រូវឱ្យមានស្ត្រីក្នុងតុចរចាទេ គឺមានចែងត្រឹមថា “អ្នកចរចាខាងអាហ្វហ្កានីស្ថានមានសមាសភាពជាអ្នកដឹកនាំនយោបាយនិងសង្គមស៊ីវិលដែលខ្លះជាស្ត្រី”។
សំណើអាមេរិកបានគូសបញ្ជាក់ទៀតថា ក្រុមប្រឹក្សាសន្តិសុខនឹងត្រៀមសើរើទណ្ឌកម្មដែលអង្គការសហប្រជាជាតិដាក់ប្រឆាំងលើបុគ្គលនិងក្រុមផ្សេងៗនៅអាហ្វហ្កានីស្ថាន តាំងពីឆ្នាំ២០១១មក នៅពេលការចរចាអន្តរអាហ្វហ្កានីស្ថានចាប់ផ្តើម។
សូមបញ្ជាក់ថា កាលពីថ្ងៃទី ២៩ កុម្ភៈ ២០២០ សហរដ្ឋអាមេរិកនិងពួកឧទ្ទាមតាលីបង់ បានចុះកិច្ចព្រមព្រៀង ជាប្រវត្តិសាស្ត្រ ៖ អាមេរិកសន្យាដកកងទ័ពទាំងស្រុងចេញអាហ្វហ្កានីស្ថាន នៅរវាង១៨ខែ ចំណែកខាងតាលីបង់សន្យាឈប់ប្រព្រឹត្តសកម្មភាពភេរវកម្មនិងចូលចរចាជាមួយរដ្ឋាភិបាល។ ភាគីទាំងពីរបានព្រមព្រៀងគ្នាដោះលែងអ្នកទោស ៥ពាន់នាក់ខាងរដ្ឋាភិបាលអាហ្វហ្កានីស្ថាន ទល់នឹង១ពាន់នាក់ខាងតាលីបង់។
សម្រេចកិច្ចព្រមព្រៀងជាលក្ខណៈទ្វេភាគីរួច អាមេរិកចង់បានការទទួលស្គាល់ពីអង្គការសហប្រជាជាតិទៀត។ ប៉ុន្តែដំណើរបែបបទនេះពិតជាចម្លែកណាស់ ! នេះជាបើតាមអ្នកការទូតម្នាក់ដែលសុំមិនបញ្ចេញឈ្មោះ។ ក្រុមប្រទេសលោកខាងលិច ភ្ញាក់ផ្អើលខ្លាំង និងហាក់មិនពេញចិត្តប៉ុន្មានទេ ប៉ុន្តែសម្ព័ន្ធមិត្តអាមេរិកទំនងជាមិនប្រឆាំងឡើយ។ ចុះក្រុមប្រឹក្សាសន្តិសុខ រុស្ស៊ី និងចិនវិញ តើពួកគេនឹងអាចទទួលយកកិច្ចព្រមព្រៀងអាមេរិក-តាលីបង់ ដែលមានកប់ឯកសាររណបពីរដ៏សម្ងាត់នោះ ? នេះជាចំណោទសួររបស់អ្នកការទូតដដែល។ ក្នុងដំណាក់កាលនេះ គេមិនដឹងអំពីជំហររបស់ចិននិងរុស្ស៊ីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ