អាមេរិក៖លោកចន បុលតុនបានទម្លាយរឿងរ៉ាវលោកដូណាល់ ត្រាំនៅក្នុងសៀវភៅរបស់លោក
នៅអាមេរិក សំណុំរឿងដកតំណែងប្រធានាធិបតីលោកដូណាល់ ត្រាំបានចាប់ផ្តើមជាថ្មីនាថ្ងៃចន្ទ ទី២៧ មករាក្នុងទីក្រុងវ៉ាស៊ីនតោន។ ក្រុមមេធាវីរបស់លោកត្រាំបានយល់ឃើញថា លោកត្រាំមានហេតុផលត្រឹមត្រូវដែលបានព្យួរជំនួយយោធាសម្រាប់ប្រទេសអ៊ុយក្រែន។ តែអំណះអំណាងនេះហាក់បានផ្ទុយនឹងការបញ្ជាក់របស់អតីតទីប្រឹក្សាសន្តិសុខជាតិលោកចន បុលតុនដែលត្រូវបានលោកត្រាំដកតំណែងកាលពីខែកញ្ញា ឆ្នាំ ២០១៩។ នៅក្នុងសៀវភៅរបស់លោកដែលនឹងចេញលក់នាពេលខាងមុខ លោកចន បុលតុនបានទម្លាយឲ្យដឹងថា លោកត្រាំបានប្រាប់លោកកុំឲ្យផ្តល់ជំនួយយោធាទៅឲ្យប្រទេសអ៊ុយក្រែន ប្រសិនបើអ៊ុយក្រែនមិនព្រមបើកការស៊ើបអង្កេតលើលោក Joe Biden ទេនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ព័ត៌មានមួយនេះត្រូវបានផ្សព្វផ្សាយដោយកាសែត New York Times កាលពីយប់ថ្ងៃអាទិត្យ ទី២៦ មករា។ តាមកាសែតអាមេរិកប្រចាំថ្ងៃមួយនេះ លោកចន បុលតុនបានអះអាងនៅក្នុងសៀវភៅរបស់លោកដែលនឹងចេញលក់នាពេលឆាប់ៗខាងមុខថា លោកដូណាល់ ត្រាំពិតជាបានព្យួរជំនួយយោធាទៅឲ្យប្រទេសអ៊ុយក្រែនដើម្បីទទួលបានមកវិញនូវការស៊ើបអង្កេតលើលោក Joe Biden ដែលជាអតីតអនុប្រធានាធិបតីក្នុងជំនាន់លោកបារ៉ាក់ អូបាម៉ា និងជាគូប្រជែងរបស់លោកត្រាំសម្រាប់ការបោះឆ្នោតប្រធានាធិបតីនៅថ្ងៃទី៣ វិច្ឆិកាខាងមុខ។
តាមកាសែត New York Times ដដែល គឺនៅក្នុងខែសីហា ឆ្នាំ ២០១៩ ដែលលោកដូណាល់ ត្រាំបានប្រាប់លោកចន បុលតុនថា លោកចង់រក្សាការព្យួរជំនួយយោធាទៅឲ្យប្រទេសអ៊ុយក្រែនរហូតដល់ថ្នាក់ដឹកនាំអ៊ុយក្រែនសុខចិត្តបើកការស៊ើបអង្កេតលើក្រុមអ្នកប្រជាធិបតេយ្យ ពិសេសលោក Joe Biden និងកូនប្រុសរបស់គាត់លោក Hunter Biden ដែលធ្វើការឲ្យក្រុមហ៊ុនឧស្ម័នអ៊ុយក្រែន។ « ខ្ញុំមិនដែលនិយាយអ៊ីចឹងប្រាប់ចន បុលតុនទេ » នេះជាការបញ្ជាក់របស់លោកត្រាំដោយចោទលោកបុលតុនពីបទចង់ផ្សព្វផ្សាយលក់សៀវភៅរបស់ខ្លួន។ រីឯមេធាវីរបស់លោកត្រាំបានបញ្ចេញប្រតិកម្មថា អ្វីដែលលោកត្រាំបានធ្វើចំពោះអ៊ុយក្រែនជាយុទ្ធសាស្រ្តមួយនៃនយោបាយការបរទេសរបស់អាមេរិក។
សម្រាប់មេធាវីរូបនេះដដែល ការទម្លាយរបស់លោកចន បុលតុនលើលោកត្រាំមិនអាចចាត់ទុកជាការរំលោភអំណាច និងជាការឈានទៅទម្លាក់លោកត្រាំទេ។ គួររម្លឹកថា លោកត្រាំបានបញ្ជាក់ពីការសម្រេចព្យួរជំនួយយោធាទៅឲ្យអ៊ុយក្រែនដើម្បីធានាពីការផ្តល់ជំនួយស្មើភាពដល់ក្រុមសម្ព័ន្ធមិត្តផ្សេងទៀតរបស់អ៊ុយក្រែន និងឃ្លាំមើលពីការប្រើប្រាស់លុយរដ្ឋឲ្យបានត្រឹមត្រូវ។ ប្រតិកម្មពីក្រុមអ្នកប្រជាធិបតេយ្យតបនឹងព័ត៌មានទម្លាយដោយកាសែត New York Times លោកស្រី Nancy Pelosi និងលោក Chuck Shumer គូសបញ្ជាក់ពីភាពចាំបាច់ក្នុងការកោះហៅលោកចន បុលតុនឲ្យធ្វើជាសាក្សីនៅក្នុងនីតិវិធីទម្លាក់លោកត្រាំនៅព្រឹទ្ធសភា។ លោកបុលតុនបានថ្លែងពីការត្រៀមខ្លួនរួចហើយ ប្រសិនបើមានការកោះហៅលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ