កិច្ចប្រជុំ G២០គ្របដណ្តប់ដោយរឿងអាស្រូវ « Panama Papers » និងកំណើនសេដ្ឋកិច្ចពិភពលោកនៅទ្រឹង
កិច្ចប្រជុំថ្នាក់រដ្ឋមន្រ្តីក្រសួងហិរញ្ញវត្ថុនៃក្រុមប្រទេស G២០ គឺក្រុមប្រទេសមហាអំណាចសេដ្ឋកិច្ចពិភពលោក និងក្រុមប្រទេសដែលកំពុងមានសេដ្ឋកិច្ចរីកលូតលាស់បើកធ្វើតាំងពីយប់ថ្ងៃព្រហស្បតិ៍ឆ្លងចូលថ្ងៃសុក្រ ទី១៥ មេសានេះក្នុងទីក្រុងវ៉ាស៊ីតោន សហរដ្ឋអាមេរិក។ ស្របគ្នានឹងកិច្ចប្រជុំថ្នាក់រដ្ឋមន្រ្តីក្រសួងហិរញ្ញវត្ថុ G២០ ក៏មានមហាសន្និបាតរបស់អង្គការមូលនិធិរូបិយវត្ថុអន្តជាតិ FMI និងធនាគារពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៤៥
មានប្រធានរឿងជាច្រើនដែលកិច្ចប្រជុំ G២០ ឆ្នាំនេះលើកយកទៅជជែក និងសុទ្ធសឹងជាប្រធានរឿងបច្ចុប្បន្នភាពក្តៅគគុក រួមមាន កំណើនសេដ្ឋកិច្ចក្នុងលោកនៅទ្រឹង វិបត្តិជនអន្តោប្រវេសន៍នៅអឺរ៉ុប បញ្ហាអាកាសធាតុ វិបត្តិជម្ងឺឆ្លង អនាគតជោគវាសនារបស់ប្រទេសអង់គ្លេសក្នុងសហភាពអឺរ៉ុប និងរឿងអាស្រូវ « Panama Papers » ដែលទើបបានបែកធ្លាយនាពេលថ្មីៗកន្លងទៅ។ តែបើតាមមើលទៅ រឿងអាស្រូវ « Panama Papers » ត្រូវបានគេចាត់ទុកជារឿងសំខាន់ជាងគេ ព្រោះ « Panama Papers »បានទម្លាយឲ្យដឹងពីប្រព័ន្ធគេចពន្ធជាលក្ខណៈអន្តរជាតិដែលមានជាប់ពាក់ព័ន្ធតាំងពីឈ្មោះថ្នាក់ដឹកនំាកំពូលៗដែលកំពុងកាន់អំណាចសព្វថ្ងៃ អ្នកអស់អំណាច រដ្ឋមន្រ្តី មន្រ្តីគ្រប់ជាន់ថ្នាក់ ថៅកែធំ តូច កីឡាករ និងសិល្បករល្បីៗ រហូតដល់ពលរដ្ឋសាមញ្ញទៀតផង។
គេនៅមិនទាន់ដឹងថា តើ G២០ នឹងចាត់វិធានការយ៉ាងណាខ្លះដើម្បីទប់ស្កាត់កុំឲ្យរឿងអាស្រូវ « Panama Papers » កើតមានជាថ្មីទេ តែប្រទេសអឺរ៉ុបធំៗចំនួន ៥ គឺបារាំង អាល្លឺម៉ង់ អង់គ្លេស អ៊ីតាលី និងអេស្បាញបានធ្វើសំណើរួមគ្នាទៅកាន់ G២០ ឲ្យបង្កើតបញ្ជីខ្មៅថ្មីមួយស្តីពីឈ្មោះប្រទេសជួយលាក់លុយអ្នកគេចពន្ធ និងលាតត្រដានអត្តសញ្ញាណឈ្មោះក្រុមហ៊ុនដែលទទួលរក្សាលុយអ្នកគេចពន្ធ។ រដ្ឋមន្រ្តីក្រសួងហិរញ្ញវត្ថុអង់គ្លេសបានថ្លែងនៅក្នុងសន្និសីទកាសែតថា ដើម្បីឲ្យការប្រយុទ្ធប្រឆាំងនឹងការគេចពន្ធមានប្រសិទ្ធិភាព គេត្រូវតែអនុវត្តន៍វិធានការជាក់ស្តែងជាលក្ខណៈអន្តរជាតិ ពោលមិនត្រូវមានត្រឹមតែទ្រឹស្តីទេ។ ចំណែកសមភាគីអាល្លឺម៉ង់បានស្នើឲ្យលុបបំបាត់ប្រព័ន្ធដែលអនុញ្ញាតឲ្យបង្កើតក្រុមហ៊ុនលាក់ឈ្មោះ។
ការបង្កើតឲ្យមានបញ្ជីខ្មៅមិនមែនជារឿងថ្មី
ការបង្កើតឲ្យមានបញ្ជីខ្មៅស្តីពីឈ្មោះប្រទេសជួយលាក់លុយអ្នកគេចពន្ធ និងលាតត្រដានអត្តសញ្ញាណឈ្មោះក្រុមហ៊ុនដែលទទួលរក្សាលុយអ្នកគេចពន្ធមិនមែនជាថ្មីទេ ព្រោះកន្លងមក ប្រទេសនីមួយៗធ្លាប់បានបង្កើតឲ្យមានបញ្ជីខ្មៅនេះរួចហើយ ដូចយ៉ាងបារាំងបានដាក់ក្នុងបញ្ជីខ្មៅរបស់ខ្លួននូវប្រទេសចំនួន ៦ ដែលបានសហការណ៍តិចតួច ឬមិនសហការណ៍ទាល់តែសោះនៅក្នុងយុទ្ធនាការប្រយុទ្ធប្រឆាំងនឹងការគេចពន្ធ និងលាងសម្អាតលុយកខ្វក់។ សហភាពអឺរ៉ុបក៏មានបញ្ជីខ្មៅនេះដាច់ដោយឡែករបស់ខ្លួនដែរ។
តែអ្វីដែលអឺរ៉ុបចង់បាននៅក្នុងកិច្ចប្រជុំថ្នាក់រដ្ឋមន្រ្តីក្រសួងហិរញ្ញវត្ថុ G២០ ពេលនេះ គឺការចងក្រងបញ្ជីខ្មៅមួយជាលក្ខណៈអន្តរជាតិសម្រាប់ប្រយុទ្ធប្រឆាំងនឹងការគេចពន្ធ។ ការធ្វើយ៉ាងនេះ ដោយអឺរ៉ុបយល់ឃើញថា គឺមានតែការរួមសហការណ៍ជាលក្ខណៈអន្តរជាតិ និងកិច្ចព្រមព្រៀងនយោបាយរបស់ G២០ ទេទើបគេអាចបញ្ជៀសកុំឲ្យរឿងអាស្រូវដូច « Panama Papers » កើនមានជាថ្មីម្តងទៀត។ តែយ៉ាងណាក៏ដោយ នេះជាការងារដ៏លំបាកដែលមិនងាយនឹងរកកុងសង់ស៊ុសរួម ព្រោះមានប្រទេសខ្លះមិនចង់ឲ្យមានវិធានការរបៀបនេះឡើយ។
លោកស្រីគ្រីស្ទីន ឡហ្កាដ៖កំណើនសេដ្ឋកិច្ចពិភពលោកនៅផុយស្រួយ
លោកស្រីអគ្គនាយិកាអង្គការមូលនិធិរូបិយវត្ថុអន្តរជាតិ FMI គ្រីស្ទីន ឡាហ្កាដអះអាងថា កំណើនសេដ្ឋកិច្ចពិភពលោកនៅមិនទាន់ចូលដល់ស្ថានភាពអាសន្នទេ ពោលស្ថិតក្នុងស្ថានភាពមួយនឹងថ្កល់ មានន័យថា កំណើនសេដ្ឋកិច្ចក្នុងលោកមានតិចតួច តែជាកំណើនផុយស្រួយ និងកំពុងប្រឈមនឹងហានិភ័យជាច្រើន។ ហានិភ័យដែលលោកស្រីគ្រីស្ទីន ឡាហ្កាដបានលើកឡើងរួមមាន ការដកខ្លួនជាយថាហេតុរបស់ប្រទេសអង់គ្លេសពីសហភាពអឺរ៉ុប វិបត្តិជនអន្តោប្រវេសន៍នៅក្នុងទ្វីបអឺរ៉ុប វិបត្តិប្រេងធ្លាក់ថ្លៃ បញ្ហាប្រឈមកើតចេញពីការប្រែប្រួលធាតុអាកាស និងកំណើនសេដ្ឋកិច្ចធ្លាក់ចុះរបស់ចិន។
គឺកំណើនសេដ្ឋកិច្ចរបស់ចិនធ្លាក់ចុះដែលលោកស្រីគ្រីស្ទីន ឡាហ្កាដយល់ឃើញថា បាន និងកំពុងបន្តជះឥទ្ធិពលអាក្រក់ដល់សេដ្ឋកិច្ចពិភពលោក ពិសេសនៅក្នុងបណ្តាប្រទេសដែលមានសេដ្ឋកិច្ចរីកលូតលាស់ និងពឹងផ្អែកខ្លាំងលើការនាំវត្ថុធាតុដើមរបស់ខ្លួនចូលទៅចិន។ ចំណែកនៅក្នុងក្រុមប្រទេសថៅកែប្រេង និងដែលពឹងតែលើចំណូលបានមកពីការលក់ប្រេងក៏កំពុងស្គាល់សេដ្ឋកិច្ចត្រដាបត្រដួសដែរ ពោលតាំងពីតម្លៃប្រេងចុះថ្លៃជាបន្តបន្ទាប់។
ធនាគារពិភពលោកបានឲ្យដឹងថា មានប្រទេសថៅកែប្រេងភាគច្រើនបានរត់ទៅខ្ចីលុយពីធនាគារពិភពលោកដើម្បីបំពេញការចំណាយរបស់ខ្លួន។ នេះជាព្រឹត្តិការណ៍មួយដែលគេមិនធ្លាប់ឃើញមានទេតាំងពីក្រោយវិបត្តិហិរញ្ញវត្ថុសកលចន្លោះឆ្នាំ ២០០៨ ២០០៩។ ដូច្នេះវាជារឿងបន្ទាន់បំផុតដែល G២០ ត្រូវចាត់វិធានការទប់ស្កាត់ដើម្បីកុំឲ្យសេដ្ឋកិច្ចពិភពលោកធ្លាក់ក្នុងស្ថានភាពអាសន្នដែលពិបាកជួយស្រោចស្រង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ