កប៉ាល់អង់គ្លេសដែលត្រូវគ្រាប់មីស៊ីលរបស់ពួកឧទ្ទាមហ៊ូទី លិចក្នុងសមុទ្រក្រហម
នៅទីបំផុត កប៉ាល់អង់គ្លេស Rubymarដែលត្រូវគ្រាប់មីស៊ីលរបស់ពួកឧទ្ទាមកាលពីខែកុម្ភៈ បានលិចចូលទៅក្នុងទឹកសមុទ្រនៅថ្ងៃសៅរ៍ទី ២មីនា។ នៅក្នុងសេចក្តីប្រកាសកាលពីថ្ងៃអាទិត្យទី ៣មីនា ទីបញ្ជាការដ្ឋានរបស់កងទ័ពអាមេរិកនៅតំបន់ដើមបូព៌ា បានព្រមានពីគ្រោះមហន្តរាយបរិស្ថាន ជីវិតសត្វសមុទ្រដោយសារការលិចកប៉ាល់ដឹកជីគីមី និងគ្រោះថ្នាក់សម្រាប់កប៉ាល់ដែលត្រូវធ្វើដំណើរនៅត្រង់កន្លែងដែលមានលិចកប៉ាល់អង់គ្លេស។ Rubymarជាកប៉ាល់ដឹកទំនិញដំបូងគេដែលរងគ្រោះថ្នាក់ដល់លិចលង់ក្នុងទឹកសមុទ្រដោយសារការវាយប្រហារមីស៊ីលនិងដ្រូនរបស់ក្រុមហ៊ូទីយេម៉ែន នៅសមុទ្រក្រហម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៤
ដឹកជីគីមីចេញពីកំពង់ផែនៅអេមីរ៉ាត អារ៉ាប់រួម សំដៅប្រទេសប៊ុលហ្ការី កប៉ាល់អង់គ្លេសឈ្មោះRubymar ដែលមានបំពាក់ទង់ជាតិប្រទេសBélize ត្រូវគ្រាប់មីស៊ីលបាលីស្ទិកពីរគ្រាប់ របស់ក្រុមហ៊ូទីយេម៉ែន កាលពីថ្ងៃទី១៨កុម្ភៈ នៅត្រង់ច្រកសមុទ្របាបអ៊ែល ម៉ាន់ដេប ដែលតភ្ជាប់ពីសមុទ្រក្រហម(Red Sea) ទៅឈូងសមុទ្រអេឌិន(Gulf of Aden)។
នៅបន្ទាប់ពីបុគ្គលិក និងកាពីទែនត្រូវកប៉ាល់ដឹកទំនិញជប៉ុនជួយសង្រ្គោះយកចេញទៅដាក់នៅកន្លែងសុវត្ថិភាពនៅប្រទេសជីប៊ូទី កប៉ាល់Rubymarដែលរងខូចខាតដោយសារត្រូវគ្រាប់មីស៊ីលរបស់ពួកហ៊ូទី ត្រូវអណ្តែតត្រសែតនៅសមុទ្រក្រហម។
រូបភាពផ្កាយរណបរបស់ក្រុមហ៊ុន Maxarបង្ហាញ ស្នាមប្រេងហៀរចេញពីកប៉ាល់ ដែលអណ្តែតលើផ្ទៃទឹកសមុទ្រ ជិត៣០គីឡូម៉ែត្រ។ បន្ទាប់ពីអណ្តែតឃ្លីងឃ្លោងនៅលើសមុទ្រអស់ជាច្រើនថ្ងៃ កប៉ាល់Rubymarរបស់អង់គ្លេសនៅទីបំផុតបានលិចចូលក្នុងទឹកសមុទ្រ នៅថ្ងៃសៅរ៍ទី ២មីនា។ បើតាមរដ្ឋាភិបាលយេម៉ែនដែលជាគូសត្រូវរបស់ពួកហ៊ូទីយេម៉ែន អាកាសធាតុអាក្រក់ និងខ្យល់ខ្លាំងនៅសមុទ្រក្រហមកាលពីយប់ថ្ងៃសុក្រជាមូលហេតុធ្វើឲ្យកប៉ាល់លិចទៅក្នុងទឹកសមុទ្រ។
រដ្ឋាភិបាលយេម៉ែន ទទួលស្គាល់ដោយសហគមន៍អន្តរជាតិបានព្រមានពីគ្រោះថ្នាក់ដល់ជីវិតមនុស្ស និងបរិស្ថាននៅតាមបណ្តាប្រទេសជាប់មាត់សមុទ្រដែលនៅក្នុងនោះមានផងដែរប្រទេសយេម៉ែន។ ទីបញ្ជាការដ្ឋានកងទ័ពអាមេរិកនៅតំបន់ដើមបូព៌ាបានព្រមានពីគ្រោះមហន្តរាយបរិស្ថាន គ្រោះថ្នាក់សម្រាប់ជីវិតក្នុងទឹកសមុទ្រ ព្រោះថា កប៉ាល់ដែលលិចនៅថ្ងៃសៅរ៍ មានដឹកផ្ទុកជីគីមី ស៊ុលហ្វាត ផូស្វ័រជាង ២១០០០តោន។ ក្រៅពីបំពុលបរិស្ថានដោយសារសារធាតុគីមីរាប់ម៉ឺនតោនធ្លាក់ក្នុងទឹកសមុទ្រហើយ ទីបញ្ជាការដ្ឋានកងទ័ពអាមេរិកព្រមានថា វត្តមានរបស់កប៉ាល់ដែលមានប្រវែង ១៧១ម៉ែត្រនៅក្នុងទឹកសមុទ្រយ៉ាងដូច្នេះនឹងអាចបង្កគ្រោះថ្នាក់ដល់កប៉ាល់ផ្សេងទៀត ដែលត្រូវធ្វើដំណើរចរាចរណ៍នៅម្តុំដែលមានលិចកប៉ាល់។
Rubymarជាកប៉ាល់លើកដំបូងគេដែលរងការវាយប្រហារ ខូចខាតរហូតដល់ត្រូវលិចលង់ក្នុងទឹកសមុទ្រ ដោយសារស្នាដៃវាយប្រហារមីស៊ីល និងដ្រូនរបស់ពួកហ៊ូទីយេម៉ែន។ ក្រុមហ៊ូទីដែលទទួលបានការគាំទ្រអាវុធនិងហិរញ្ញវត្ថុពីអ៊ីរ៉ង់ បានបើកការវាយប្រហារលើរាល់កប៉ាល់នៅសមុទ្រក្រហម នៅក្នុងហេតុផលបង្ហាញសាមគ្គីភាពជាមួយក្រុមហាម៉ាសប៉ាឡេស្ទីន។ នៅថ្ងៃសៅរ៍ អ្នកទទួលខុសត្រូវម្នាក់របស់ពួកហ៊ូទីបានទាមទារឲ្យនាយករដ្ឋមន្រ្តីអង់គ្លេសជំរុញឲ្យមានការបើកច្រកផ្លូវមនុស្សធម៌នៅហ្កាហ្សា បើសិនជាអង់គ្លេសចង់ស្រោចស្រង់កប៉ាល់ទំនិញរបស់ខ្លួន។
តាំងពីបើកការវាយប្រហារ នៅសមុទ្រក្រហមដើម្បីបុព្វហេតុក្រុមហាម៉ាសប៉ាឡេស្ទីន ពួកហ៊ូទីយេម៉ែនបានបាញ់មីស៊ីល និងដ្រូនបំផ្លាញកប៉ាល់ដឹកទំនិញជាច្រើន។ តាមមូលនិធិហិរញ្ញវត្ថុអន្តរជាតិ ដោយសារតែគ្រោះថ្នាក់ គ្មានសន្តិសុខនៅសមុទ្រក្រហម ចរាចរណ៍របស់កប៉ាល់ដឹកទំនិញតាមសមុទ្រក្រហមបានធ្លាក់ថយចុះអស់ ១ភាគ៣នៅសមុទ្រក្រហម នោះបើទោះបីជាអាមេរិកដឹកនាំបក្សសម្ព័ន្ធចេញមុខការពារ ពីការវាយប្រហារមីស៊ីលរបស់ពួកហ៊ូទីក្តី។ ការប្តូរផ្លូវធ្វើដំណើរ ចេញពីសមុទ្រក្រហមបានធ្វើឲ្យក្រុមហ៊ុនដឹកទំនិញពីអាស៊ីទៅអឺរ៉ុប ត្រូវបើកផ្លូវវៀង ចំណាយពេលយូរ។ បញ្ហានៅសមុទ្រក្រហមបានបណ្តាលឲ្យការដឹកជញ្ជូនផ្គត់ផ្គង់ទំនិញត្រូវរអាក់រអួល និងទំនិញកាន់តែឡើងថ្លៃនៅក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ