អ៊ីរ៉ាក់ចោទអាមេរិកបង្កអស្ថិរភាព ក្រោយពីអាមេរិកសម្លាប់មេបញ្ជាការហេសបូឡាប្រចាំអ៊ីរ៉ាក់
កំហឹងស្អប់អាមេរិក មានទាំងលើទ្រូងផ្លូវ និងទាំងនៅក្នុងរដ្ឋសភាអ៊ីរ៉ាក់។ នេះក៏ព្រោះតែ សហរដ្ឋអាមេរិក បានវាយប្រហារសម្លាប់ មេបញ្ជាការហេសបូឡាប្រចាំអ៊ីរ៉ាក់ម្នាក់ ដែលគាំទ្រអ៊ីរ៉ង់។ នាយករដ្ឋមន្ត្រីអ៊ីរ៉ាក់ ថ្លែងចេតនាចង់បញ្ចប់បេសកកម្ម របស់ សម្ព័ន្ធអន្តរជាតិប្រយុទ្ធប្រឆាំងនឹងក្រុមភេរជនជីហាត ដែលដឹកនាំដោយសហរដ្ឋអាមេរិក នៅលើទឹកដីអ៊ីរ៉ាក់ និងស៊ីរី។
ចុះផ្សាយនៅថ្ងៃ៖
ស្តាប់ - ០២:២២
អ៊ីរ៉ាក់ បានថ្កោលទោស សហរដ្ឋអាមេរិក ដែលបានវាយប្រហារដោយយន្តហោះដ្រូន សម្លាប់ មេបញ្ជាការហេសបូឡាប្រចាំអ៊ីរ៉ាក់ ដែលគាំទ្រអ៊ីរ៉ង់ គឺលោក អាប៊ូ បាគៀ អាល់-សាអាឌី កាលពីយប់ថ្ងៃពុធ ទី៧ កុម្ភៈ នៅរដ្ឋធានីបាកដាដ។ ដំណឹងវាយប្រហារសម្លាប់នេះ ក៏ត្រូវ រដ្ឋបាលទីក្រុងវ៉ាស៊ីនតោនបញ្ជាក់អះអាងដែរថាបានសម្លាប់មេបញ្ជាការហេសបូឡានៅអ៊ីរ៉ាក់ ដែលជាអ្នករៀបចំគម្រោងវាយប្រហារទៅលើយោធាអាមេរិកនៅក្នុងតំបន់។ សំណុំរឿងនេះ ក៏ជាប់ពាក់ព័ន្ធផ្ទាល់ទៅនឹងការស្លាប់របស់យោធាអាមេរិក ចំនួន ៣នាក់ នៅព្រំដែនហ្ស័កដងនិងស៊ីរី កាលពីថ្ងៃទី២៨ ខែមករា។
នៅអ៊ីរ៉ាក់ កំហឹងស្អប់អាមេរិក មានផ្ទុះឡើងទាំងលើទ្រូងផ្លូវ និងទាំងនៅក្នុងរដ្ឋសភា។ ក្រុមអ្នកតំណាងរាស្ត្រអ៊ីរ៉ាក់ ដែលមានទំនោរកាន់ជើងអ៊ីរ៉ង់ បានឱកាសរិះគន់អាមេរិក ហើយនិងចេញសេចក្តីថ្លែងការណ៍ថ្កោលទោសថា រដ្ឋាបាលទីក្រុងវ៉ាស៊ីនតោនដើរហួសបន្ទាត់ក្រហមហើយ។ អ្នកនាំពាក្យខាងយោធា របស់នាយករដ្ឋមន្ត្រីអ៊ីរ៉ាក់ ឧត្តមសេនីយ យេហ៊ីយ៉ា រ៉ាស្សូល បានថ្លែងនៅថ្ងៃព្រហស្បតិ៍ ទី៨ ខែកុម្ភៈ ថា «សម្ព័ន្ធអន្តរជាតិ ដឹកនាំដោយសហរដ្ឋអាមេរិក ធ្វើជ្រុលហួសហេតុ និងដើរខុសពីគោលដៅ ហើយទង្វើនេះ ជាហេតុផលត្រឹមត្រូវបំផុតដែលត្រូវបញ្ចប់បេសកកម្ម។ ដ្បិតថា សកម្មភាពដើរខុសផ្លូវរបស់សម្ព័ន្ធអន្តរជាតិ បែបនេះ នាំឲ្យ អ៊ីរ៉ាក់ ធ្លាក់ចូលក្នុងអស្ថិរភាព ហើយនិងទាញ អ៊ីរ៉ាក់ ធ្លាក់ចូលជម្លោះក្នុងតំបន់»។ នៅថ្ងៃដដែល នាយករដ្ឋមន្ត្រីអ៊ីរ៉ាក់ ម៉ូហាមេដ ស្ហា អាល់ ស៊ូដានី ក៏បានអះអាងបន្ថែមដែរអំពីចេតនាបញ្ចប់បេសកកម្មនៃសម្ព័ន្ធអន្តរជាតិប្រយុទ្ធប្រឆាំងនឹងក្រុមភេរជនជីហាត។ នេះក៏ព្រោះតែ លោកអះអាងថា កងកម្លាំងសន្តិសុខអ៊ីរ៉ាក់ អាចនឹងមានសមត្ថភាពគ្រប់គ្រាន់ដើម្បីទប់ទល់ប្រឆាំងនឹងក្រុមភេរវជនហើយ។
គួររំឭកជូនថា សម្ព័ន្ធអន្តរជាតិប្រយុទ្ធប្រឆាំងនឹងក្រុមភេរជនជីហាត នៅតំបន់ដើមបូព៌ា បានចាប់ផ្តើមនៅឆ្នាំ២០១៤ ដឹកនាំមុខគេដោយសហរដ្ឋអាមេរិក។ ក្នុងក្របខណ្ឌនេះ កងទ័ពអាមេរិក ឈរជើងនៅអ៊ីរ៉ាក់ ចំនួន ២ ៥០០ នាក់ ហើយនៅស៊ីរីក្បែរខាង មានយោធាអាមេរិកចំនួន ៩០០នាក់។ រីឯ ពួកប្រដាប់អាវុធហេសបូឡានៅអ៊ីរ៉ាក់ ត្រូវ សហរដ្ឋអាមេរិក ចាត់ទុកថាជាពួកឧទ្ទាមភេរវនិយម និងជាមុខសញ្ញាត្រូវកម្ទេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ