យេម៉ែនកំពុងក្លាយជាសមរភូមិមួយថ្មីទៀតឬ?
យោធាអាមេរិកបានបើកការវាយប្រហារជាថ្មី នៅព្រឹកថ្ងៃសៅរ៍ទី ១៣មករានេះទៀត ជាលើកទីពីរក្នុងរយៈពេលតែ២៤ម៉ោង ទៅលើទីតាំងរបស់ឧទ្ទាមហ៊ូទី នៅយេម៉ែន។ ម្សិលមិញ ក្រោយពីរងការវាយប្រហាររបស់សម្ព័ន្ធអន្តរជាតិអាមេរិកនិងអង់គ្លេស ក្រុមឧទ្ទាមហ៊ូទីបានប្រកាសសងសឹក និងគំរាមបំផ្លាញផលប្រយោជន៍ប្រទេសទាំងពីរកាន់តែខ្លាំង។
ចុះផ្សាយនៅថ្ងៃ៖
ស្តាប់ - ០២:៤០
នៅថ្ងៃសៅរ៍នេះ ពួកឧទ្ទាមហ៊ូទីបានអះអាងមានយ៉ាងហោចទីតាំងយោធារបស់ហ៊ូទីមួយកន្លែង នៅរដ្ឋធានីសាណាបានរងការវាយប្រហារ។ បន្តិចក្រោយមកទីបញ្ជាការដ្ឋានអាមេរិក ក៏បានបញ្ជាក់ ដំណឹងស្តីពីការវាយប្រហារតាមផ្លូវអាកាសទៅលើទីតាំងប្រព័ន្ធរ៉ាដាមួយនៅយេម៉ែន ដោយប្រើមីស៊ីលTomahawkបាញ់ចេញពីនាវាចម្បាំងUSS Carney។
កាលពីថ្ងៃសុក្រ អាមេរិកនិងសម្ព័ន្ធមិត្តអង់គ្លេសបានបើកប្រតិបត្តិការវាយប្រហារផ្លូវអាកាសយ៉ាងហោច១៥០គ្រាប់ លើទីតាំងយោធារបស់ពួកឧទ្ទាមហ៊ូទីនៅយេម៉ែន ចំនួនប្រមាណ៣០កន្លែង។ ខាងហ៊ូទីថាមានអ្នកស្លាប់៥នាក់និងរងរបួស៦នាក់។ ជាចម្លើយតប ពួកហ៊ូទីបានគំរាមថាសងសឹកវិញដោយដៅយកផលប្រយោជន៍អាមេរិកនិងអង់គ្លេសជាផ្ទាំងស៊ីបនៃការវាយប្រហារ។ ម្សិលមិញពួកហ៊ូទីបានបាញ់មីស៊ីលយ៉ាងហោចណាស់មួយគ្រាប់សំដៅសមុទ្ទក្រហម តែបើតាមយោធាអាមេរិក គ្មានប៉ះលើនាវាណាឡើយ។
សម្រាប់លោកចូបៃដិន ប្រធានាធិបតី ប្រតិបត្តិការកាលពីថ្ងៃសុក្រប្រព្រឹត្តទៅដោយជោគជ័យ។ ទាំងអាមេរិកក៏ដូចជាអង់គ្លេស ការប្រហារនេះជាទង្វើដ៏ស្របច្បាប់ដើម្បីស្តារសន្តិសុខដល់សមុទ្ទក្រហមដែលជាផ្លូវចរាចរណ៍ដឹកជញ្ជូន ដ៏សំខាន់តភ្ជាប់ពីមហាសមុទ្ទឥណ្ឌាទៅសមុទ្ទមេឌីទែរ៉ាណេ ដោយមានពាណិជ្ជកម្មពិភពលោកប្រមាណ១២%ឆ្លងកាត់។ ហើយសហរដ្ឋអាមេរិកនឹងបន្តវាយប្រហារបន្ថែមទៀត ដោយដៅលើទីតាំងរបស់ពួកហ៊ូទី ដែលមានគ្រូនិងអ្នកជំនាញអ៊ីរ៉ង់ផង ប្រសិនបើពួកហ៊ូទីមិនព្រមបញ្ឈប់សកម្មភាពយោធានៅសមុទ្ទក្រហមទេ។
ប៉ុន្តែនៅក្រុមប្រឹក្សាសន្តិសុខអង្គការសហប្រជាជាតិ រុស្ស៊ីបានបរិហារទង្វើអាមេរិកលើពួកហ៊ូទីពេលនេះថាជាការឈ្លានពានលើយេម៉ែន ជាសកម្មភាពមិនត្រឹមត្រូវបើយោលទៅច្បាប់អន្តរជាតិ។ អគ្គលេខាធិការអង្គការសហប្រជាជាតិបានអំពាវនាវឱ្យគ្រប់ភាគីពាក់ព័ន្ធបញ្ចៀសភាពប្រឈមគ្នា ដើម្បីសន្តិភាពនិងស្ថិរភាពនៅសមុទ្ទក្រហមក៏ដូចជាសម្រាប់តំបន់ទាំងមូល។
អ្នកអង្កេតការណ៍កំពុងព្រួយបារម្ភខ្លាចក្រែងតែសង្គ្រាមរវាងអ៊ីស្រាអែលនិងហាម៉ាស រំកិលសមរភូមិមកខាងយេម៉ែន ព្រោះចលនាហ៊ូទី គឺជាខ្សែរយៈតស៊ូប្រចាំតំបន់ដែលគាំទ្រដោយអ៊ីរ៉ង់ ដូចចលនាហេសបូឡាឬក្រុមប្រដាប់អាវុធផ្សេងៗទៀតនៅអ៊ីរ៉ាក់ឬស៊ីរី ឬហាម៉ាសដើម្បីរួមគ្នាប្រឆាំងនឹងអ៊ីស្រាអែល។ តាំងពីផ្ទុះសង្គ្រាមនៅហ្កាហ្សាមក ពួកឧទ្ទាមហ៊ូទីបានបាញ់ដ្រូននិងមីស៊ីលលើសមុទ្ទក្រហមជាច្រើន បង្កអសន្តិសុខយ៉ាងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ