អ៊ីរ៉ង់ចោទអ៊ីស្រាអែលថាជាអ្នកបាញ់មីស៊ីល សម្លាប់មេទ័ពអ៊ីរ៉ង់ទទួលបន្ទុកប្រតិបត្តិការក្រៅប្រទេស
មេទ័ពដ៏មានឥទ្ធិពលម្នាក់ទៀតរបស់អ៊ីរ៉ង់ ឈ្មោះ Razi Moussavi បានស្លាប់នៅក្នុងការវាយប្រហារដោយមីស៊ីល៣គ្រាប់ នៅភាគខាងត្បូងរដ្ឋធានីដាម៉ាស កាលពីរសៀលថ្ងៃចន្ទ ទី២៥ធ្នូ។ អ៊ីរ៉ង់បានប្រកាសចោទប្រកាន់ថា នេះជាស្នាដៃរបស់អ៊ីស្រាអែល ហើយបានគំរាមថា នឹងសងសឹកវិញឲ្យសក្តិសមបំផុត។ Razi Moussavi គឺជាមេកងកម្លាំងប្រតិបត្តិការក្រៅប្រទេស នៃកងទ័ពឆ្មាំបដិវត្តអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០៤:០០
យោងតាមការផ្សាយ របស់បណ្តាញទូរទស្សន៍រដ្ឋស៊ីរី មេទ័ពអ៊ីរ៉ង់ម្នាក់ឈ្មោះ Razi Moussavi បានស្លាប់ហើយ បន្ទាប់ពីបានរងការវាយប្រហារ ពីសំណាក់កងទ័ពអ៊ីស្រាអែល។ មីស៊ីលចំនួន៣គ្រាប់ ត្រូវបានបាញ់សំដៅមកលើផ្ទះ របស់មេទ័ពអ៊ីរ៉ង់រូបនេះ នៅសង្កាត់ Sayeda Zeinab ស្ថិតនៅខាងត្បូងរដ្ឋធានីដាម៉ាស។ បណ្តាញទូរទស្សន៍ បានផ្សាយរូបភាព បង្ហាញឲ្យឃើញផ្សែងខ្មៅ ហោះឡើង នៅទីតាំងកើតហេតុ។
ទីភ្នាក់ងារព័ត៌មានអ៊ីរ៉ង់ Mehr ដែលស្រង់សំដីអគ្គរដ្ឋទូតអ៊ីរ៉ង់ ប្រចាំនៅស៊ីរី បានចុះផ្សាយថា មីស៊ីល៣គ្រាប់របស់អ៊ីស្រាអែល បានបាញ់ចំផ្ទះរបស់លោក អគ្គមេបញ្ជាការ Razi Moussavi កាលពីរសៀលថ្ងៃចន្ទទី២៥ធ្នូ។ កងទ័ពឆ្មាំបដិវត្តអ៊ីរ៉ង់ បានចេញលិខិតមួយនៅព្រឹកថ្ងៃអង្គារទី២៦ធ្នូ បញ្ជាក់ថាលោកអគ្គមេបញ្ជាការ Razi Moussavi បានស្លាប់ហើយ គឺស្លាប់ដោយស្នាដៃរបស់អ៊ីស្រាអែល។ ដូចគ្នាដែរ លោកប្រធានាធិបតីអ៊ីរ៉ង់ អ៊ីប្រាហ៊ីម រ៉ៃស៊ី បានចេញលិខិតប្រកាស ដោយបានគំរាមថា អ៊ីរ៉ង់នឹងសងសឹកអ៊ីស្រាអែល ឲ្យសក្តិសមបំផុតនឹងឧក្រិដ្ឋកម្មនេះ។
ទាក់ទងសួរដោយបណ្តាញព័ត៌មានបារាំង AFP ទាក់ទិននឹងការចោទនេះ កងទ័ពអ៊ីស្រាអែល បានបដិសេធថាមិនមានទម្លាប់ធ្វើអត្ថាធិប្បាយ ស្តីពីការចុះផ្សាយរបស់បណ្តាញព័ត៌មានបរទេសទេ។
ផ្អែកតាមការផ្សាយ របស់ទីភ្នាក់ងារព័ត៌មានអ៊ីរ៉ង់ Irna Razi Moussavi គឺជាមិត្តរួមអាវុធ របស់ Qassem Soleimani អគ្គមេបញ្ជាការអ៊ីរ៉ងដ៏មានឥទ្ធិពលម្នាក់ទៀត ដែលត្រូវបានកងទ័ពអាមេរិក បាញ់មីស៊ីលសម្លាប់នៅអ៊ីរ៉ាក់ កាលពីខែមករាឆ្នាំ២០២០។ ក្រោយ Qassem Soleimani ស្លាប់ គឺ Razi Moussavi បានឡើងមកជំនួស។
សូមបញ្ជាក់ថា Razi Moussavi គឺជាអគ្គមេបញ្ជាការដឹកនាំ កងកម្លាំង Qods ដែលជាមែកធាងកម្លាំងប្រតិបត្តិការក្រៅប្រទេស របស់កងទ័ពឆ្មាំបដិវត្តអ៊ីរ៉ង់។ គឺក្រុមនេះហើយ ដែលជាអ្នកទទួលបន្ទុកគ្រឿងភស្តុភារទាំងអស់ សម្រាប់កងកម្លាំងកូនចៅអ៊ីរ៉ង់ប្រចាំនៅដើមបូព៌ា ដូចជានៅស៊ីរី នៅអ៊ីរ៉ាក់ ក្រុមហេសបូឡានៅលីបង់ ក្រុមហ៊ូទីនៅយេម៉ែន ព្រមទាំងក្រុមហាម៉ាសនិងក្រុមជីហាតអ៊ីស្លាមនៅហ្កាហ្សា។ ក្រុមប្រដាប់អាវុធទាំងអស់នេះ គឺជាខ្សែបណ្តាញដែលអ៊ីរ៉ង់ហៅថា ជាបណ្តាញតស៊ូទប់ទល់នឹងអ៊ីស្រាអែល ព្រោះអ៊ីរ៉ង់មិនទទួលស្គាល់រដ្ឋអ៊ីស្រាអែលទេ។
គួរកត់សំគាល់ថា អ៊ីស្រាអែល ត្រូវបានគេដឹងថា បានបើកការវាយប្រហារ ជាច្រើនរយដងមកហើយ នៅក្នុងទឹកដីស៊ីរី បើគិតចាប់ពីឆ្នាំ២០១១មក។ ជាការវាយប្រហារ ដែលសំដៅទៅលើទីតាំងស្តុកអាវុធ ឬមូលដ្ឋានហ្វិកហាត់ របស់ក្រុមកងកម្លាំងដែលពាក់ព័ន្ធជាមួយអ៊ីរ៉ង់។ កាលពីដើមខែធ្នូ អ៊ីរ៉ង់អះអាងថា មានមន្ត្រីទ័ពខ្លួន២នាក់ បានស្លាប់ដោយការបាញ់ប្លោងគ្រាប់ របស់អ៊ីស្រាអែល ចំលើទីតាំងមួយកន្លែងរបស់ក្រុមហេសបូឡា។ អ៊ីស្រាអែលមិនសូវធ្វើអត្ថាធិប្បាយអ្វីច្រើនទេ ទាក់ទិននឹងការបាញ់ប្លោងគ្រាប់មីស៊ីលរបស់ខ្លួន នៅក្នុងទឹកដីស៊ីរី ដោយគ្រាន់តែបានទទួលស្គាល់ថា គឺដើម្បីទប់កុំឲ្យពួកអ៊ីរ៉ង់ មកតាំងមូលដ្ឋានទ័ព ជាប់កៀកនឹងព្រំដែនអ៊ីស្រាអែល។
ដោយឡែក កាលពីថ្ងៃចន្ទ ទី២៥ធ្នូដែរ កងទ័ពអាមេរិកបាន បើកការវាយប្រហារកម្ទេចទីតាំង៣កន្លែង របស់កងកម្លាំងកូនចៅអ៊ីរ៉ង់ នៅក្នុងទឹកដីអ៊ីរ៉ាក់។ មន្ត្រីក្រសួងមហាផ្ទៃអ៊ីរ៉ាក់ បានប្រាប់ទីផ្នាក់ងារព័ត៌មានបារាំង AFP ថា ទីតាំងបន្ទាយ របស់ក្រុម Hachd al-Chaabi ក្បែរក្រុងHilla ទីរួមខេត្តបាប៊ីឡូន បានរងការយវាយប្រហារផ្លូវអាកាស បណ្តាលឲ្យស្លាប់១នាក់ របួស២០នាក់។ យោងតាមលិខិតប្រកាស របស់លោករដ្ឋមន្ត្រីការពារជាតិអាមេរិក Lloyd Austin ការវាយប្រហារនេះ ត្រូវបានធ្វើឡើងដោយចាំបាច់ និងដោយប្រម៉ាណកម្លាំងបំផុតមិនឲ្យជ្រុលហួសហេតុទេ។ លោករដ្ឋមន្ត្រីអាមេរិកអះអាងថា ទីតាំងដែលកងទ័ពអាមេរិកបានបញ្ជាដ្រូនទៅកំទេច គឺជាទីតាំងរបស់កុ្រមភេរវកម្ម Kataëb Hezbollah កូនចៅអ៊ីរ៉ង់ បន្ទាប់ពីក្រុមនេះបានវាយប្រហារ មកលើមូលដ្ឋានទ័ពអាមេរិកនៅតំបន់ Erbil នៅថ្ងៃចន្ទទី២៥ធ្នូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ