ក្រុមប្រឹក្សាសន្តិសុខ សម្រេចផ្តល់ជំនួយមនុស្សធម៌ ទៅកាន់តំបន់ហ្គាហ្សា
ពីបុរីញូវយ៉ក សហរដ្ឋអាមេរិក កាលពីថ្ងៃសុក្រ ទី២២ធ្នូ ក្រុមប្រឹក្សាសន្តិសុខអង្គការសហប្រជាជាតិ បានចេញសេចក្តីសម្រេចផ្តល់ជំនួយមនុស្សធម៌ ទៅកាន់តំបន់ហ្គាហ្សា។ អត្ថបទសេចក្តីសម្រេចផ្តល់ជំនួយមនុស្សធម៌នេះ បានត្រូវលើកពេលជជែកពិភាក្សាចំនួន ៣ ដង ហើយនិង ស៊ីពេលអស់ ៥ ថ្ងៃ ក្នុងការចរចាគ្នា។ សេចក្តីសម្រេចរបស់ក្រុមប្រឹក្សាសន្តិសុខ បានធ្វើឡើងដោយបោះឆ្នោតលើកដៃ ក្នុងសំឡេង ១៣ លើ១៥ ខណៈពេលដែល រុស្ស៊ី និង សហរដ្ឋអាមេរិក ដែលមានសិទ្ធិវេតូជំនាស់ បានរក្សាភាពស្ងាត់ស្ងៀម។ ស្ងាត់ស្ងៀម គឺបន្ទាប់ពីលើកទី១ សហរដ្ឋអាមេរិក បានបោះឆ្នោតវេតូម្តងរួចមកហើយ និងដែលកាលនោះ បង្កជាការរិះគន់ខ្លាំង។
ចុះផ្សាយនៅថ្ងៃ៖
ស្តាប់ - ០៣:១៩
ខ្លឹមសារសេចក្តីសម្រេចនេះ ជំរុញឲ្យគ្រប់ភាគី ត្រូវអនុញ្ញាតនិងជួយសម្រួល បើកផ្លូវ ជាបន្ទាប់ និងឲ្យរក្សាសុវត្ថិភាព ដើម្បីក្រុមការងារសកម្មភាពមនុស្សធម៌ អាចបែងចែង ផ្តល់ជំនួយ បានទូលំទូលាយ ដល់ពលរដ្ឋជនស៊ីវិលប៉ាឡេស្ទីន។ ការជួយសម្រួលជាសំខាន់ទៀតនោះ គឺ អាជ្ញាធរពាក់ព័ន្ធ ត្រូវបើកផ្លូវ គ្រប់ច្រក ដែលធ្វើដំណើរអាចឆ្ពោះទៅកាន់តំបន់ហ្គាហ្សា។ សេចក្តីសម្រេច ក៏ស្នើសុំឲ្យបញ្ឈប់ការវាយប្រហារហិង្សា ឲ្យបានយូរអង្វែងរៀងទៅ។ ចំណុចសំខាន់ ១ ទៀត គឺ ការអំពាវនាវឲ្យដោះលែងចំណាប់ខ្មាំង។ ក្រុមប្រឹក្សាសន្តិសុខ ក៏បានស្នើឲ្យ អគ្គលេខាធិការអង្គការសហប្រជាជាតិ តែងតាំងអ្នកសម្របសម្រួលរូបណាម្នាក់ ដើម្បីទទួលបន្ទុកនាំជំនួយមនុស្សធម៌ ហើយនិងធ្វើរបាយការណ៍ ក្នុងអំលុងពេល ២០ ថ្ងៃទៀត។
សេចក្តីសម្រេច របស់ក្រុមប្រឹក្សាសន្តិសុខ ពុំបានចែងអំពីការដាក់កំហិតឲ្យមានបទឈប់បាញ់នោះទេ។ ត្រង់ចំណុចនេះហើយ ដែល អ្នកតំណាងប្រទេសខ្លះ យល់ថា ពុំមែនជាសេចក្តីសម្រេចល្អប្រសើរឡើយ។ មិនទាន់ល្អប្រសើរ ពីព្រោះថា តើក្រុមភ្នាក់ងារអង្គការសហប្រជាជាតិ ត្រូវផ្តល់ជំនួយមនុស្សធម៌ ទៅកាន់តំបន់ហ្គាហ្សា យ៉ាងម៉េចកើត ប្រសិនបើប្រតិបត្តិការសឹកកំពុងតែបន្តមាននោះ? អ្នកស្រីឯកអគ្គរាជទូតអេម៊ីរ៉ាត់អារាប់រួម បានលើកឡើងថា គឺមានតែបទឈប់បាញ់គ្នា១ទេ ដែលអាចបញ្ចប់ទុក្ខវេទនានៅតំបន់ហ្គាហ្សា។ ទន្ទឹមនឹងគ្នានេះ អគ្គលេខាធិការអង្គការសហប្រជាជាតិ អង់តូនីញ៉ូ ហ្គូទែរស៍ បានប្រតិកម្មតាមបណ្តាញសង្គមX ថា បទឈប់បាញ់ ជាជម្រើសនិងមធ្យោបាយដ៏មានប្រសិទ្ធភាព ឆ្លើយតបទៅនឹងតម្រូវការបន្ទាន់របស់តំបន់ហ្គាហ្សា ដែលប្រជាពលរដ្ឋកំពុងតែធ្លាក់ចូលក្នុងអន្លង់នៃក្តីអស់សង្ឈឹម។ ទាល់តែមានបទឈប់បាញ់ ទើបអាចធ្វើឲ្យអ្វីៗផ្សេងទៀត ជឿលឿនទៅមុខពិតប្រាកដ។ នេះបើតាមលោក អង់តូនីញ៉ូ ហ្គូទែរស៍។
ក្នុងន័យសេចក្តីនេះដែរ អង្គការអន្តរជាតិផ្សេងៗទៀត បានអំពាវនាវឲ្យដាក់សម្ពាធលើសាធារណមតិសហរដ្ឋអាមេរិក ឲ្យញាក់ខ្សែរដ្ឋបាលអ៊ីស្រាអែល ជំរុញឲ្យឈប់វាយប្រហារលើតំបន់ហ្គាហ្សា និងឲ្យរៀបចំបទឈប់បាញ់ជាថ្មី។ ក្នុងសប្តាហ៍នេះ រដ្ឋបាលរបស់ទីក្រុងវ៉ាស៊ីនតោន ពុំបានជំរុញចំណុចនេះឡើយ ហើយទាំងអាមេរិកនិងអ៊ីស្រាអែល សុទ្ធតែយល់ដូចគ្នាថា ការឈប់បាញ់ គឺផ្តល់ឱកាសជាប្រយោជន៍ដល់ក្រុមហាម៉ាស។ ទោះជាយ៉ាងនេះមែន តែ សហរដ្ឋអាមេរិកនិងអ៊ីស្រាអែល ទាមទារឲ្យដោះលែងចំណាប់ខ្មាំង។
ក្រោយពីដឹងអំពីសេចក្តីសម្រេចរបស់ក្រុមប្រឹក្សាសន្តិសុខ ប្រមុខការទូតអ៊ីស្រាអែល លោក អេលី កូហេន បានអះអាងថាប្រទេសអ៊ីស្រាអែល នឹងបន្តគោរពតាមច្បាប់អន្តរជាតិ តែដោយហេតុផលសន្តិសុខសុវត្ថិភាព អ៊ីស្រាអែល នឹងពិនិត្យតាមដាន ដំណើរការផ្តល់ជំនួយនេះ ឲ្យកៀកកិតបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ