ស្ថានទូតអាមេរិកនៅបាដដាដក្លាយជាផ្ទាំងស៊ីបវាយប្រហារគ្រាប់រ៉ូក្កែត
ស្ថានទូតអាមេរិកនៅទីក្រុងបាដដាដ បានក្លាយជាផ្ទាំងស៊ីបវាយប្រហាររបស់គ្រាប់រ៉ូក្កែតជាច្រើនគ្រាប់កាលពីព្រឹកព្រលឹមថ្ងៃសុក្រទី៨ធ្នូ។ នៅមិនទាន់មានក្រុមណាមួយចេញមុខទទួលខុសត្រូវលើការបាញ់ស្រោចគ្រាប់រ៉ូក្កែតសំដៅទីតាំងស្ថានទូតអាមេរិកនៅទីក្រុងបាដដាតនៅឡើយទេ។ នៅថ្ងៃសុក្រ អ្នកនាំពាក្យរបស់ស្ថានទូតអាមេរិកទាមទារឲ្យរដ្ឋាភិបាលអ៊ីរ៉ាក់ចាត់គ្រប់វិធានការការពារមន្រ្តីទូតអាមេរិក និងសម្ព័ន្ធអន្តរជាតិប្រឆាំងក្រុមជីហាតដែលកំពុងបំពេញបេសកកម្មក្នុងទឹកដីអ៊ីរ៉ាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
ថានទូតអាមេរិកក្នុងទីក្រុងបាដដាតបានរងការវាយប្រហារគ្រាប់រ៉ូក្កែតពីរលើក នៅព្រឹកព្រលឹមថ្ងៃសុក្រទី៨ធ្នូ ប៉ុន្តែ មិនបានបង្កឲ្យមានអ្នករបួស ឬការខូចខាតធំដុំឡើយ។ នេះបើតាមការបញ្ជាក់របស់អ្នកនាំពាក្យរបស់ស្ថានទូតអាមេរិកប្រចាំក្រុងបាដដាដ មុននឹងទាមទារឲ្យរដ្ឋាភិបាលអ៊ីរ៉ាក់ប្រើគ្រប់អំណាច ចាត់វិធានការការពារសន្តិសុខរបស់មន្រ្តីទូតអាមេរិក រួមទាំងសម្ព័ន្ធអន្តរជាតិដែលកំពុងបំពេញបេសកកម្មប្រយុទ្ធប្រឆាំងក្រុមជីហាតក្នុងទឹកដីអ៊ីរ៉ាក់។
នៅព្រឹកព្រលឹមថ្ងៃសុក្រ គ្រាប់រ៉ូក្កែតជាច្រើនគ្រាប់ត្រូវគេបាញ់សំដៅស្ថានទូតអាមេរិក និងទីស្នាក់ការរបស់កងកម្លាំងសម្ព័ន្ធអន្តរជាតិប្រឆាំងក្រុមជីហាត ក្នុងតំបន់បៃតងដែលជាតំបន់ស្ថិតក្រោមការយាមការពារសន្តិសុខដ៏តឹងតែង។
នៅមិនទាន់មានក្រុមណាចេញមុខទទួលខុសត្រូវលើការបាញ់គ្រាប់រ៉ូក្កែតសំដៅស្ថានទូតអាមេរិកនៅឡើយទេ។ ប៉ុន្តែ ហេតុការណ៍នេះកើតឡើងនៅ២ខែក្រោយ កងទ័ពអាមេរិក និងកងកម្លាំងសម្ព័ន្ធអន្តរជាតិប្រយុទ្ធប្រឆាំងក្រុមជីហាតនៅអ៊ីរ៉ាក់ និងស៊ីរីបានរងការវាយប្រហារពីសំណាក់ក្រុមគាំទ្រអ៊ីរ៉ង់កាលពីពាក់កណ្តាលខែតុលាកន្លងទៅ។
កាលណោះ ក្រុមគាំទ្រអ៊ីរ៉ង់ ដែលមានឈ្មោះថា ចលនាតស៊ូអ៊ីស្លាមនៅអ៊ីរ៉ាក់បានលើកហេតុផលថា ពួកគេដៅវាយប្រហារកងទ័ពអាមេរិកនៅអ៊ីរ៉ាក់ដើម្បីសងសឹកនឹងអាមេរិកដែលចេញមុខគាំទ្រអ៊ីស្រាអែលធ្វើសង្រ្គាមវាយប្រហារទៅលើក្រុមហាម៉ាសនៅទឹកដីហ្កាហ្សា។
បើតាមវ៉ាស៊ីនតោន គិតចាប់តាំងពីផ្ទុះសង្រ្គាមហ្កាហ្សា នៅថ្ងៃទី ៧តុលា អាមេរិករាប់ឃើញមានការវាយប្រហារចំនួន៧៨លើកទៅលើកម្លាំងយោធាអាមេរិកដែលកំពុងឈរជើងប្រយុទ្ធប្រឆាំងនឹងក្រុមជីហាតរដ្ឋអ៊ីស្លាម ក្នុងទឹកដីអ៊ីរ៉ាក់ និងស៊ីរី។
ឆ្លើយតបនឹងការវាយប្រហារលើកងទ័ពរបស់ខ្លួន សម្ព័ន្ធអន្តរជាតិដឹកនាំដោយអាមេរិកបានបើកប្រតិបត្តិការការពារខ្លួន ដោយបានបាញ់សម្លាប់សកម្មជន៥នាក់របស់ក្រុមAl-Noujabaគាំទ្រដោយអ៊ីរ៉ង់ នៅក្នុងខេត្តKirkouk ភាគខាងជើងអ៊ីរ៉ាក់ កាលពីថ្ងៃសៅរ៍ទី៣ទីធ្នូសប្តាហ៍មុន។
នៅក្នុងកិច្ចសន្ទនាតាមទូរស័ព្ទជាមួយរដ្ឋមន្រ្តីការបរទេសអាមេរិកដែលធ្វើឡើងនៅមុនការវាយប្រហាររបស់អាមេរិកនៅភាគខាងជើងអ៊ីរ៉ាក់ នាយករដ្ឋមន្រ្តីអ៊ីរ៉ាក់លោក Mohamed Chia al-Soudani បាននិយាយធានាការពារទីប្រឹក្សារបស់សម្ព័ន្ធអន្តរជាតិ ពោលគឺកងទ័ពអាមេរិកដែលកំពុងមានវត្តមានក្នុងទឹកដីអ៊ីរ៉ាក់ដើម្បីប្រយុទ្ធប្រឆាំងនឹងក្រុមជីហាត ប៉ុន្តែលោកនៅតែបញ្ជាក់ជំហរដាច់ខាតរបស់រដ្ឋាភិបាលអ៊ីរ៉ាក់ប្រឆាំងរាល់ការវាយប្រហាររបស់បរទេសទៅលើទឹកដីអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ