ហ្កាហ្សា៖ ក្រុមប្រឹក្សាសន្តិសុខ អនុម័តសេចក្តីសម្រេចចិត្តរួម ហៅឲ្យផ្អាកសង្គ្រាមដើម្បីជួយផ្នែកមនុស្សធម៌
ក្រុមប្រឹក្សាសន្តិសុខអនុម័តសេចក្តីសម្រេចចិត្តរួម ទាមទារឲ្យផ្អាកសង្គ្រាមជាបន្ទាន់ ក្នុងរយៈពេលមួយគ្រប់គ្រាន់ ដើម្បីបើកផ្លូវជួយដល់ប្រជាជនស៊ីវីលប៉ាឡេស្ទីន។ ដោយពុំបានបញ្ជាក់លំអិត ថាទាមទារឲ្យផ្អាកសង្គ្រាមប៉ុន្មានថ្ងៃ លោក Stephane Dujaric អ្នកនាំពាក្យអង្គការសហប្រជាជាតិ បានអះអាងថា ត្រូវតែជារយៈពេលមួយវែងគ្រប់គ្រាន់ ដើម្បីអាចបើកប្រតិបត្តិការដឹកជញ្ជូនស្បៀងនិងជំនួយផ្សេងៗ ចូលទៅហ្កាហ្សាក្នុងទំហំមួយគ្រប់គ្រាន់។
ចុះផ្សាយនៅថ្ងៃ៖
ស្តាប់ - ០២:២៤
ជាង១ខែ ក្រោយការផ្ទុះសង្គ្រាមនៅតំបន់ហ្កាហ្សា នៅទីបំផុត ក្រុមប្រឹក្សាសន្តិសុខនៃអង្គការសហប្រជាជាតិ បានអនុម័តបាននូវសេចក្តីសម្រេចចិត្តរួមមួយ កាលពីថ្ងៃពុធ ទី១៥វិច្ឆិកា។ សេចក្តីសម្រេចចិត្តរួមនេះ មានខ្លឹមសារអំពាវនាវ ឲ្យផ្អាកសង្គ្រាមនៅតំបន់ហ្កាហ្សាជាបន្ទាន់ ក្នុងរយៈពេលមួយគ្រប់គ្រាន់ ដើម្បីរៀបចំបើកច្រកផ្លូវមនុស្សធម៌ ដឹកជំនួយស្បៀងអាហារ ថ្នាំសង្កូវ ប្រេងឥទ្ធនៈ និងសម្ភារៈគ្រប់មុខទៅជួយប្រជាជនស៊ីវីល នៅក្នុងតំបន់ហ្កាហ្សា។
អត្ថបទដែលស្នើដោយប្រទេសម៉ាល់ត៍នេះ បានទទួលសំឡេងឆ្នោតគាំទ្រ ចំនួន១២សំឡេង និង៣សំឡេងអនុបវាទ។ ប្រទេសដែលបានបោះឆ្នោតអនុបវាទ គឺមាន សហរដ្ឋអាមេរិក អង់គ្លេស និងរុស្ស៊ី។ សេចក្តីសម្រេចចិត្តរួមរបស់ក្រុមប្រឹក្សាសន្តិសុខ មានកម្លាំងចាប់បង្ខំឲ្យគោរព តែយ៉ាងណាមិនប្រាកដថា គ្រប់ភាគីនឹងគោរពទេ។
សូមបញ្ជាក់ថា នៅក្នុងសេចក្តីសម្រេចចិត្តរួម ដែលត្រូវបានអនុម័តកាលពីថ្ងៃពុធ គឺអង្គការសហប្រជាជាតិ បានសង្កត់ធ្ងន់ ឲ្យភាគីទាំងអស់នៃជម្លោះ ត្រូវតែគោរពច្បាប់អន្តរជាតិ ការពារអាយុជីវិតជនស៊ីវីលប៉ាឡេស្ទីន ជាពិសេសគឺកុមារ។ ដោយមិនបានថ្កោលទោសទៅលើក្រុមហាម៉ាស ថាបានវាយប្រហារភេរវកម្មមកលើអ៊ីស្រាអែលកាលពីថ្ងៃទី៧តុលា សេចក្តីសម្រេចចិត្តនេះ បានត្រឹមអំពាវនាវទាមទារឲ្យដោះលែសងចំណាប់ខ្មាំងទាំងអស់។
គួរកត់សំគាល់ថា នេះជាលើកដំបូងហើយ ដែលក្រុមប្រឹក្សាសន្តិសុខនៃអង្គការសហប្រជាជាតិ អាចបោះឆ្នោតដោយជោគជ័យលើសេចក្តីសម្រេចចិត្តរួម ស្តីអំពីសង្គ្រាមដែលកំពុងតែផ្ទុះឆាបឆេះនៅតំបន់ហ្កាហ្សា។ ប្រមាណ១ខែមកនេះ មានគម្រោងអត្ថបទសេចក្តីសម្រេចចិត្ត ចំនួន៤ផ្សេងៗគ្នា ដែលបានស្នើទៅកាន់ក្រុមប្រឹក្សាសន្តិសុខ។ តែប្រទេសសមាជិក បានខ្វែងគំនិតគ្នាទៅលើខ្លឹមសារ ដោយម្ខាងទាមទារឲ្យថ្កោលទោសឲ្យចំឈ្មោះ ទៅលើក្រុមភេរវកម្មហាម៉ាស ដែលបញ្ឆេះសង្គ្រាមនេះ ហើយម្ខាងទៀត ទាមទារថ្កោលទោសទៅលើអ៊ីស្រាអែល ដែលទម្លាក់គ្រាប់សម្លាប់ជនស៊ីវីលប៉ាឡេស្ទីន។
បញ្ហានេះ បានបង្ហាញឲ្យឃើញ អំពីភាពមិនចុះសម្រុង និងការយល់ឃើញខុសគ្នា រវាងប្រទេសធំៗនៅក្នុងក្រុមប្រឹក្សាសន្តិសុខ ទាក់ទិននឹងសំណុំរឿង អ៊ីស្រាអែល ប៉ាឡេស្ទីន ដែលតែងតែពុះចែកការយល់ឃើញជា២។ ថ្លែងនៅមុនពេលបោះឆ្នោតកាលពីថ្ងៃពុធ លោក Zhang Jun អគ្គរដ្ឋទូតចិន ប្រចាំអង្គការសហប្រជាជាតិ បានលើកឡើងថា លោកដឹងថាគ្រប់គ្នាមានការខកចិត្តខ្លាំងណាស់ ចំពោះភាពអសកម្មស្ងាត់សូន្យ របស់ក្រុមប្រឹក្សាសន្តិសុខ ក្នុងរយៈពេល៤០ថ្ងៃមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ