តើក្រុមហេស្បូឡាលីបង់កំពុងប្រកាសសង្រ្គាមជាមួយអ៊ីស្រាអែលឬក៏យ៉ាងណា?
មួយសប្តាហ៍ក្រោយគំរាមពីការផ្ទុះរាលដាលទៅជាសង្រ្គាមតំបន់ ក្នុងករណីអ៊ីស្រាអែលមិនបញ្ឈប់សង្រ្គាមហ្កាហ្សា មេដឹកនាំចលនាហេស្បូឡា លីបង់ លោក ហាសាន់ ណាហ្សរ៉ាឡាបានចេញមុខប្រកាសនៅថ្ងៃសៅរ៍ ថា ចលនាហេស្បូឡាលីបង់ចាប់ផ្តើមប្រើអាវុធថ្មីដើម្បីវាយប្រហារទៅលើទឹកដីអ៊ីស្រាអែល។ ចាប់តាំងពីអ៊ីស្រាអែលធ្វើសង្រ្គាមសងសឹកនឹងពួកហាម៉ាស ដោយបើកការវាយប្រហារទម្លាក់គ្រាប់បែកនៅហ្កាហ្សា ចលនាហេស្បូឡាលីបង់ដែលជាសម្ព័ន្ធមិត្តរបស់ក្រុមហាម៉ាសប៉ាឡេស្ទីនចាប់ផ្តើមដៅវាយប្រហារទីតាំងយោធា និងភូមិប្រជាជនអ៊ីស្រាអែលដែលនៅជាប់ព្រំដែនជាមួយលីបង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:០៩
នៅក្នុងការប្រកាសតាមកញ្ចក់ទូរទស្សន៍លីបង់ ប្រមុខដឹកនាំចលនាហេស្បូឡាលីបង់ លោក ហាសាន ណាហ្សរ៉ាឡាបាននិយាយថា ក្រុមទាហានហេស្បូឡាបានចាបផ្តើមប្រើប្រាស់សព្វាវុធថ្មីៗនៅក្នុងការវាយប្រហារទៅលើអ៊ីស្រាអែល។
នៅមួយថ្ងៃក្រោយអ៊ីស្រាអែលបើកសង្រ្គាមសងសឹកក្រុមហាម៉ាសប៉ាឡេស្ទីននៅទឹកដីហ្កាហ្សា ក្រុមហេស្បូឡាលីបង់ដែលជាសម្ព័ន្ធមិត្តរបស់ពួកហាម៉ាសប៉ាឡេស្ទីន បានបាញ់គ្រាប់រ៉ូក្កែតសំដៅទីតាំងយោធា និងភូមិប្រជាជនអ៊ីស្រាអែលនៅជាប់ព្រំដែនលីបង់ អ៊ីស្រាអែល។ ការផ្ទុះអាវុធរវាងកងទ័ពអ៊ីស្រាអែលនិងចលនាប្រដាប់អាវុធហេស្បូឡាលីបង់កើតមានសឹងជារៀងរាល់ថ្ងៃ។ ភាគីទាំងពីរបានតតាំងប្រយុទ្ធគ្នាដោយប្រើគ្រប់ទម្រង់អាវុធយុទ្ធភ័ណ្ឌ ដែលមានតាំងពីកាំភ្លើងធំធុនធ្ងន់ មីស៊ីលបញ្ជាពីចម្ងាយ រ៉ូក្កែត និងដ្រូនប្រយុទ្ធ។
ប៉ុន្តែ នៅក្នុងការប្រកាសកាលពីថ្ងៃសៅរ៍ ប្រមុខដឹកនាំចលនាហេស្បូឡាលីបង់អះអាងថា នៅក្នុងប្រវត្តិតស៊ូនៅលីបង់ នេះជាលើកទី១ដែល ចលនាហេស្បូឡាប្រើដ្រូនអត្តឃាតដើម្បីវាយប្រហារលើគោលដៅក្នុងទឹកដីអ៊ីស្រាអែល។
មេដឹកនាំចលនាហេស្បូឡាលីបង់ លោកហាសាន ណាហ្សរ៉ាឡានៅបានបន្ថែមដែរថា នៅប៉ុន្មានថ្ងៃមកនេះ ទាហានហេស្បូឡាបានប្រើមីស៊ីលBurkan ដែលមានសមត្ថភាពពាំនាំគ្រាប់ផ្ទុះទម្ងន់ពី៣០០ទៅ៥០០គីឡូក្រាម។ បើតាមមេចលនាហេស្បូឡាលីបង់ ក្រៅពីប្រើដូ្រនហោះទៅយកការណ៍ក្នុងទឹកដីអ៊ីស្រាអែល ក្រុមប្រដាប់អាវុធហេស្បូឡានៅបានប្រើគ្រាប់រ៉ូក្កែត វាយចូលជ្រៅទៅក្នុងទឹកដីអ៊ីស្រាអែល ដើម្បីសងសឹកឲ្យប្រជាជនស៊ីវិលលីបង់៥នាក់ដែលស្លាប់នៅក្នុងការវាយប្រហាររបស់អ៊ីស្រាអែលកាលពីសប្តាហ៍មុន។ បន្ទាប់ពីបាញ់បំផ្លាញផ្ទះសម្បែងក្នុងតំបន់រស់នៅរបស់ប្រជាជនអ៊ីស្រាអែល នៅជិតតំបន់ព្រំដែន នៅថ្ងៃអាទិត្យពួកហេស្បូឡាលីបង់បាញ់មីស៊ីលបំផ្លាញរថយន្តជាច្រើនគ្រឿងនៅក្នុងទឹកដីអ៊ីស្រាអែល។
ដោយទទួលបានការគាំទ្រទាំងផ្នែកថវិកានិងសព្វាវុធពីអ៊ីរ៉ង់ ចលនាហេស្បូឡាលីបង់បានធ្វើទំនើបកម្មកងទ័ព និងបង្កើនការស្តុកអាវុធជាប្រចាំ។ តាមអ្នកជំនាញដើមបូព៌ា នៅពេលបញ្ចប់សង្រ្គាមជាមួយអ៊ីស្រាអែល នៅឆ្នាំ២០០៦ ចលនាហេស្បូឡាលីបង់មានគ្រាប់រ៉ូក្កែត១៥០០០ដើម។ ប៉ុន្តែ ចំនួននេះអាចកើនឡើងជាង១០ដងនៅជិត២០ឆ្នាំមកនេះ។ ក្រៅពីគ្រាប់រ៉ូក្កែត ចលនាហេស្បូឡាអះអាងថាខ្លួនចេះកែច្នៃផលិតបានមីស៊ីលដែលមានសមត្ថភាពបាញ់ចូលជ្រៅទៅក្នុងទឹកដីអ៊ីស្រាអែល មីស៊ីលប្រឆាំងរថក្រោះ មីស៊ីលប្រឆាំងនាវាចម្បាំង និងមីស៊ីលបញ្ជាតម្រង់ចំៗគោលដៅ ដែលអ៊ីស្រាអែល ចាត់ទុកជាគ្រោះថ្នាក់ធំចំបងសម្រាប់សន្តិសុខអ៊ីស្រាអែល។ បើនិយាយពីកម្លាំងប្រយុទ្ធវិញ មេចលនាហេស្បូឡាលីបង់អះអាងថា នៅឆ្នាំ២០២១ ចលនារបស់ខ្លួនរបស់មានទាហានប្រយុទ្ធ១សែននាក់ ដែលនៅក្នុងនោះមានកងកម្លាំងពិសេសដែលមានជំនាញធ្លាប់ចូលរួមធ្វើសង្រ្គាមនៅស៊ីរី ជាច្រើនម៉ឺននាក់។
បើតាមអ៊ីស្រាអែល ពួកក្រុមហេស្បូឡាបានលួចជីករូងក្រោមដី និងប្រើយុទ្ធសាស្រ្តតាក់ទិកដូចក្រុមហាម៉ាសប៉ាឡេស្ទីនដើម្បីគ្រោងធ្វើសង្រ្គាមវាយប្រហារអ៊ីស្រាអែល។ ប៉ុន្តែ នៅថ្ងៃសៅរ៍ ពោលគឺប៉ុន្មានម៉ោងក្រោយការប្រកាសរបស់មេដឹកនាំចលនាហេស្បូឡា ក្នុងការប្រើប្រាស់អាវុធថ្មីវាយប្រហារលើអ៊ីស្រាអែល រដ្ឋមន្រ្តីការពារជាតិអ៊ីស្រាអែលនៅពេលចុះទៅជួបកងទ័ពប្រចាំការនៅព្រំដែនអ៊ីស្រាអែល និងលីបង់បានព្រមានថា បើសិនក្រុមហេស្បូឡានៅតែវាយប្រហារអ៊ីស្រាអែល ពោលគឺញុះញង់អូសទាញលីបង់ទៅក្នុងសង្រ្គាមជាមួយអ៊ីស្រាអែល នោះទីក្រុងបេរូតរបស់លីបង់នឹងជួបវាសនាដូចហ្កាហ្សាសព្វថ្ងៃយ៉ាងដូច្នេះដែរ។
កន្លងមក នាយករដ្ឋមន្រ្តីអ៊ីស្រាអែលប្រកាសហើយថា អ៊ីស្រាអែលនឹងអាចផ្ទុះសង្រ្គាមសាជាថ្មីជាមួយលីបង់ក្នុងករណីមានការចាប់បង្ខំពីខាងចលនាហេស្បូឡាលីបង់។ ការវាយប្រហារដាក់គ្នារវាងកងទ័ពអ៊ីស្រាអែលនិងចលនាប្រដាប់អាវុធហេស្បូឡាលីបង់ ដោយសារតែសង្រ្គាមហ្កាហ្សានៅជាង១ខែមកនេះបានសម្លាប់យុទ្ធជនហេស្បូឡាលីបង់៦៨នាក់ ចំណែកនៅភាគីអ៊ីស្រាអែលមានស្លាប់ទាហាន៦នាក់ និងប្រជាជនស៊ីវិល២នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ