ក្រុមប្រទេសអារ៉ាប់និងអ៊ីស្លាម រួមគ្នាថ្កោលទោសអ៊ីស្រាអែល តែខ្វែងគំនិតគ្នាលើវិធានការឆ្លើយតប
កាលពីថ្ងៃសៅរ៍ ទី១១វិច្ឆិកា អារ៉ាប៊ីសាអូឌីត បានដឹកនាំកិច្ចប្រជុំពិសេសមួយ នៅទីក្រុងរីយ៉ាត ដោយបានច្របាច់បញ្ចូលគ្នា រវាងជំនួបកំពូលនៃសម្ព័ន្ធអារ៉ាប់ និងជំនួបកំពូលនៃអង្គការសហប្រតិបត្តិការអ៊ីស្លាម។ កម្មវត្ថុនៃកិច្ចប្រជុំ រវាងថ្នាក់ដឹកនាំក្រុមប្រទេសអារ៉ាប់ និងប្រទេសកាន់សាសនាអ៊ីស្លាមនេះ គឺដើម្បីនិយាយអំពីបញ្ហាសង្គ្រាមនៅតំបន់ហ្កាហ្សា ដែលអ៊ីស្រាអែល កំពុងតែធ្វើទៅលើក្រុមហាម៉ាសប៉ាឡេស្ទីន។ តែលទ្ធផលនៃកិច្ចប្រជុំនេះ បានបង្ហាញឲ្យឃើញនូវការខ្វែងគំនិតគ្នាយ៉ាងខ្លាំង បើទោះបីគ្រប់គ្នា បានប្រកាសថ្កោលទោសទៅលើអ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:៤៧
ថ្នាក់ដឹកនាំប្រទេសអារ៉ាប់ និងប្រទេសអ៊ីស្លាម បានយល់ព្រមប្រកាសរួមគ្នា ថ្កោលទោសអំពើរបស់អ៊ីស្រាអែល ដែលបាញ់ប្លោងមីស៊ីលសម្លាប់ប្រជាជនស៊ីវីលនៅហ្កាហ្សា ថាជា “អំពើព្រៃផ្សៃយង់ឃ្នង”។ ក៏ប៉ុន្តែ ពុំមានការប្រកាសរួមគ្នាណាមួយ ស្តីអំពីវិធានការឆ្លើយតបទៅលើអ៊ីស្រាអែលទេ មិនថាជាទណ្ឌកម្មសេដ្ឋកិច្ច ឬជាទណ្ឌកម្មនយោបាយការបរទេស។
នៅក្នុងលិខិតប្រកាសរួមចុងក្រោយ នៃកិច្ចប្រជុំនេះ ក្រុមប្រទេសអារ៉ាប់ និងអ៊ីស្លាម បានបដិសេធចោល ចំពោះការលើកឡើងរបស់អ៊ីស្រាអែល ដែលអះអាងថាខ្លួនមាន “សិទ្ធិស្របច្បាប់ក្នុងការការពារខ្លួន”។ បន្ថែមពីនេះ ក្រុមប្រទេសអារ៉ាប់ និងអ៊ីស្លាម បានអំពាវនាវទៅកាន់ក្រុមប្រឹក្សាសន្តិសុខ នៃអង្គការសហប្រជាជាតិ ថាត្រូវតែចេញ សេចក្ដីសម្រេចចិត្តរួមមួយ ដែលមានកម្លាំងចាប់បង្ខំ ធ្វើឲ្យអ៊ីស្រាអែលបញ្ឈប់សង្គ្រាមនេះជាបន្ទាន់។ ទាក់ទិននឹងអនាគតនៃតំបន់ហ្កាហ្សាវិញ ក្រុមប្រទេសអារ៉ាប់និងអ៊ីស្លាម បានយល់ស្របគ្នា ដោយបានច្រានចោលរាល់ដំណោះស្រាយនយោបាយទាំងអស់ ទៅថ្ងៃអនាគត ដែលផ្តាច់ដែនដីតំបន់ហ្កាហ្សា ពីដែនដីតំបន់ស៊ីហ្សកដានី។
យ៉ាងណាក៏ដោយ កិច្ចប្រជុំនៅទីក្រុងរីយ៉ាត បានរំលេចឲ្យឃើញ ពីការខ្វែងគំនិតគ្នាខ្លាំង រវាងប្រទេសអារ៉ាប់ និងប្រទេសអ៊ីស្លាម ទាក់ទិននឹងវិធានការឆ្លើយតបទៅកាន់អ៊ីស្រាអែល។ ប្រធានាធិបតីអ៊ីរ៉ង់ អ៊ីប្រាហ៊ីម រ៉ៃស៊ី បានប្រកាសថា ត្រូវតែចាត់ទុកកងទ័ពអ៊ីស្រាអែលជា “អង្គភាពភេរវកម្ម”។ អាល់ហ្សេរី និងលីបង់ បានចេញមុខទាមទារ ថាត្រូវតែផ្តាច់ទំនាក់ទំនងសេដ្ឋកិច្ច និងការទូតទាំងស្រុងជាមួយអ៊ីស្រាអែល និងបានអំពាវនាវឲ្យប្រទេសអារ៉ាប់ត្រូវតែឈប់លក់ប្រេងឲ្យអ៊ីស្រាអែល។ ក៏ប៉ុន្តែគំនិតនេះ ត្រូវបានប្រទេស៣បដិសេធ ក្នុងនោះមាន អេមីរ៉ាតអារ៉ាប់រួម និងបារ៉ែន។
គួរកត់សំគាល់ដែរថា មិនថាប្រធានាធិបតីតួកគី មិនថាភាគីអារ៉ាប៊ីសាអូឌីត បានលើកឡើងដូចគ្នា ដោយបានរិះគន់គោលជំហររបស់ក្រុមប្រទេសលោកខាងលិច ថាគាំទ្រកាន់ជើងអ៊ីស្រាអែលជ្រុលហួសហេតុ មិនខ្វល់ពីអាយុជីវិតជនស្លូតត្រង់ប៉ាឡេស្ទីន។ លោក ម៉ាសមូដ អាបាស ប្រមុខដឹកនាំអាជ្ញាធរប៉ាឡេស្ទីនវិញ បានថ្លែងថា សហរដ្ឋអាមេរិក មានទំនួលសុខត្រូវធំណាស់ក្នុងបញ្ហានេះ ព្រោះសហរដ្ឋអាមេរិកមានឥទ្ធិពលទៅលើអ៊ីស្រាអែល។ ចំណែកព្រះអង្គម្ចាស់ ម៉ូហាម៉េដ បេនសាល់ម៉ាន់ បានលើកឡើងថា មធ្យោបាយតែមួយគត់ ដើម្បីកសាងសន្តិភាព និងស្ថិរភាព គឺអ៊ីស្រាអែលត្រូវតែបិទបញ្ចប់ការដាក់អាណានិគម នៅលើដែនដីប៉ាឡេស្ទីន។
ដោយឡែក លោកនាយករដ្ឋមន្ត្រីអ៊ីស្រាអែល បេនចាមីន នេតាន់យ៉ាហ៊ូ បានថ្លែងតាមកញ្ចក់ទូរទស្សន៍កាលពីល្ងាចថ្ងៃសៅរ៍ថា ក្រុមប្រទេសអារ៉ាប់ គួរណាតែក្រោកឈរឡើងប្រឆាំងនឹងក្រុមហាម៉ាស ព្រោះថាក្រុមនេះ ជាក្រុមភេរវកម្ម ជាអាយ៉ងដៃជើងរបស់អ៊ីរ៉ង់ មិនខុសពីក្រុមហេសបូឡានៅលីបង់ ឬក្រុមហ៊ូទីនៅយេម៉ែនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ