អ៊ីរ៉ង់ព្រមានពីការផ្ទុះសង្រ្គាមក្នុងតំបន់ បើសិនអ៊ីស្រាអែលបើកការវាយលុកជើងគោកចូលហ្កាហ្សា
អ៊ីស្រាអែលទន្ទឹងបើកសមរភូមិប្រយុទ្ធជើងគោកវាយលុកចូលក្នុងទឹកដី ហ្កាហ្សា ដើម្បី បោសសម្អាតក្រុមហាម៉ាសប៉ាឡេស្ទីន ដែលបានវាយឆ្មក់ សម្លាប់ប្រជាជនអ៊ីស្រាអែលប្រមាណ ១៣០០នាក់ កាលពីថ្ងៃទី ៧តុលា។ ក្នុងពេលត្រៀមវាយលុកចូលទឹកដីហ្កាហ្សា អ៊ីស្រាអែលកំពុងប្រឈមនឹងសមរភូមិប្រយុទ្ធមួយទៀតពីខាងទឹកដីលីបង់ ជាទីដែលក្រុមអេស្បូឡាលីបង់ និងសកម្មជនប៉ាឡេស្ទីនគាំទ្រដោយក្រុមនេះ បាញ់គ្រាប់រ៉ូកែត សម្លាប់ទាហានអ៊ីស្រាអែលម្នាក់ នៅថ្ងៃអាទិត្យទី ១៥តុលា។ នៅក្នុងដំណើរទស្សនកិច្ចនៅចុងសប្តាហ៍នេះ ទៅកាន់ប្រទេសលីបង់ អ៊ីរ៉ាក់ ហើយនិងស៊ីរី ដែលស្ថិតក្រោមឥទ្ធិពលរបស់អ៊ីរ៉ង់ រដ្ឋមន្រ្តីការបរទេសអ៊ីរ៉ង់បានព្រមានអ៊ីស្រាអែលពីផលវិបាកធ្ងន់ធ្ងរ និងការរីករាលដាលទៅជាសង្រ្គាមតំបន់ បើសិនអ៊ីស្រាអែលនៅតែបន្តមហិច្ឆតាវាយលុក ជើងគោកចូលទឹកដីហ្កាហ្សា។
ចុះផ្សាយនៅថ្ងៃ៖
ស្តាប់ - ០៣:១៣
សងសឹកនឹងក្រុមហាម៉ាសប៉ាឡេស្ទីន ដែលបានបើកការវាយឆ្មក់ចូល និងសម្លាប់ប្រជាជនអ៊ីស្រាអែល ដ៏ច្រើនមិនធ្លាប់មាននៅក្នុងប្រវត្តិរបស់ខ្លួន អ៊ីស្រាអែលបានប្រកាសសង្រ្គាម វាយកម្ទេចទាំងស្រុង ចលនាហាម៉ាស នៅក្នុងទឹកដីហ្កាហ្សា។ នៅព្រឹកថ្ងៃអាទិត្យ កងទ័ព រថក្រោះ កាំភ្លើងធំរបស់អ៊ីស្រាអែល ត្រូវបានពង្រាយនៅតាមព្រំដែនជាប់ហ្កាហ្សា ដើម្បីត្រៀមវាយលុក នៅបន្ទាប់ពី ប្រជាជនប៉ាឡេស្ទីនត្រូវជម្លៀសចេញអស់ពីភាគខាងជើងហ្កាហ្សា។
មានការព្រួយបារម្ភថា ការវាយលុកផ្លូវគោករបស់កងទ័ពអ៊ីស្រាអែលទៅក្នុងទឹកដីហ្កាហ្សា ដែលមានប្រជាជនប៉ាឡេស្ទីន រស់នៅជាង ២លាននាក់មិនត្រឹមតែបង្កឲ្យមានមហន្តរាយសម្លាប់ជីវិតមនុស្ស ប៉ុន្តែ វាអាចនឹងឆេះរាលដាលទៅជាសង្រ្គាមក្នុងតំបន់។ នៅក្នុងដំណើរទស្សនកិច្ចទៅកាន់ប្រទេសដែលស្ថិតក្រោមឥទ្ធិពលរបស់អ៊ីរ៉ង់ ដូចជាអ៊ីរ៉ាក់ ស៊ីរី និងលីបង់ កាលពីថ្ងៃសៅរ៍ ប្រមុខការបរទេសអ៊ីរ៉ង់ លោក ហូសេន អាមី អាប់ឌូឡាបានព្រមានអ៊ីស្រាអែលពីផលវិបាកធ្ងន់ធ្ងរ បើសិនអ៊ីស្រាអែលមិនព្រមបញ្ឈប់សកម្មភាពយោធាទៅលើទឹកដីហ្កាហ្សា។
នៅក្រោយការជួបពិភាក្សាជាមួយសម្ព័ន្ធមិត្តក្នុងតំបន់ អ៊ីរ៉ង់អះអាងថា សម្ព័ន្ធមិត្តរបស់ខ្លួន នឹងមិនឈរឱបដៃ បណ្តោយឲ្យអ៊ីស្រាអែលប្រព្រឹត្តឧក្រិដ្ឋកម្មសង្រ្គាម និងប្រល័យពូជសាសន៍នៅក្នុងទឹកដីហ្កាហ្សា។ នៅក្នុងសន្និសីទកាសែត នៅទីក្រុងBeirut កាលពីថ្ងៃសៅរ៍ ប្រមុខការបរទេសអ៊ីរ៉ង់និយាយថា លោកបានដឹងថា ក្រុមអេស្បូឡានៅលីបង់ដែលជាសម្ព័ន្ធមិត្តរបស់ក្រុមហាម៉ាសប៉ាឡេស្ទីនបានរៀបចំ សេណារីយ៉ូ ជាច្រើនដែលនឹងអាចធ្វើឲ្យអ៊ីស្រាអែលរងគ្រោះធ្ងន់ធ្ងរ ដូចត្រូវរញ្ជួយដី។
អ៊ីស្រាអែលធ្លាប់ចាត់ទុកក្រុមអេស្បូឡាលីបង់ថា ជាគ្រោះថ្នាក់គំរាមភ្លាមៗសម្រាប់សន្តិសុខអ៊ីស្រាអែល។ មានសមាជិកប្រយុទ្ធជាច្រើនពាន់នាក់ ដែលធ្លាប់ចេញទៅប្រយុទ្ធក្នុងសង្រ្គាមនៅស៊ីរី ក្រុមអេស្បូឡា ដែលគាំទ្រពីក្រោយដោយអ៊ីរ៉ង់ ធ្លាប់ប៉ះទង្គិចអាវុធជាច្រើនដងជាមួយអ៊ីស្រាអែល និងមានរ៉ូកែត និងមីស៊ីលជាង ១៥០ ០០០គ្រាប់ដែលបាញ់ដល់គ្រប់កន្លែងក្នុងទឹកដីអ៊ីស្រាអែល។ ចាប់តាំងពីមានជម្លោះប្រដាប់អាវុធ អ៊ីស្រាអែល និងក្រុមហាម៉ាស នៅជាង១សប្តាហ៍មកនេះ អ៊ីស្រាអែលបានបាញ់ប្លោងសំដៅក្រុមអេស្បូឡាដែលអ៊ីស្រាអែលចោទថា ជាអ្នកបាញ់គ្រាប់រ៉ូកែត ២ដងចូលទឹកដីអ៊ីស្រាអែល។ នៅថ្ងៃអាទិត្យ គ្រាប់រ៉ូកែតរបស់ក្រុមអេស្បូឡាទៅលើទីតាំងយោធានៅជាប់ព្រំដែនអ៊ីស្រាអែល លីបង់ សម្លាប់ទាហានអ៊ីស្រាអែល១នាក់ និងរបួសជាច្រើននាក់។ រដ្ឋាភិបាលអ៊ីស្រាអែលបញ្ជាក់ថា គេបានបិទព្រំដែនប្រវែង ៤គីឡូម៉ែត្រជាមួយលីបង់ចាប់ពីថ្ងៃអាទិត្យនេះតទៅ។
នៅក្នុងសារព្រមានដាច់ដោយឡែកមួយទៀតរបស់អ៊ីរ៉ង់ ទៅកាន់អ៊ីស្រាអែល តាមរយៈប្រេសិតរបស់អង្គការសហប្រជាជាតិ អ្នកតំណាងអ៊ីរ៉ង់ នៅអង្គការសហប្រជាជាតិបានអះអាងថា អ៊ីរ៉ង់នឹងអាចលូកដៃ បើសិនអ៊ីស្រាអែលនៅតែចង់វាយលុកផ្លូវគោកចូលទឹកដីហ្កាហ្សា។ ប្រទេសលោកខាងលិច នាំមុខដោយអាមេរិកនិងបារាំងបានអំពាវនាវឲ្យប្រទេសអ៊ីរ៉ង់ និងលីបង់ស្ថិតនៅក្រៅ ជម្លោះអ៊ីស្រាអែល និងក្រុមហាម៉ាស ដើម្បីជៀសវាងការរីករាលដាលទៅជាសង្រ្គាមក្នុងតំបន់។
ប៉ុន្តែ ប្រមុខការទូតអ៊ីរ៉ង់បានប្រតិកម្មចំអកទៅវិញ ដោយថា អាមេរិកអំពាវនាវឲ្យគ្រប់គ្នាអត់ធ្មត់ ប៉ុន្តែ ផ្ទុយទៅវិញ បិទភ្នែកទុកឲ្យរដ្ឋជ្វីហ្វដូចជាអ៊ីស្រាអែលបន្តឧក្រិដ្ឋកម្ម សម្លាប់មនុស្សស្រី កុមារ និងប្រជាជនស៊ីវិលនៅហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ