អាមេរិកបើកភ្លើងខៀវឲ្យអ៊ីស្រាអែលលក់ប្រព័ន្ធខែលមីស៊ីលទៅឲ្យអាល្លឺម៉ង់
នៅក្នុងសេចក្តីប្រកាសនៅថ្ងៃព្រហស្បតិ៍ ទី ១៧សីហា ក្រសួងការពារជាតិអ៊ីស្រាអែលបានអះអាងថា អាមេរិកយល់ព្រមតាមការទាមទាររបស់អ៊ីស្រាអែលដែលចង់លក់នាំចេញប្រព័ន្ធខែលមីស៊ីលឈ្មោះ Arrow 3 ទៅឲ្យប្រទេសអាល្លឺម៉ង់។ តាមក្រសួងការពារជាតិអ៊ីស្រាអែល នៅប៉ុន្មានសប្តាហ៍ខាងមុខ មន្រ្តីយោធាជាន់ខ្ពស់របស់អ៊ីស្រាអែល និងអាល្លឺម៉ង់នឹងចុះហត្ថលេខាលើឯកសារយល់ព្រមព្រៀងទិញប្រព័ន្ធខែលមីស៊ីល Arrow 3 ដែលមានតម្លៃសរុប៣៥០០លានដុល្លារ។
ចុះផ្សាយនៅថ្ងៃ៖
ស្តាប់ - ០២:៤០
អាមេរិកយល់ព្រមឲ្យអ៊ីស្រាអែលលក់ប្រព័ន្ធខែលមីស៊ីល Arrow 3 ដែលអាល្លឺម៉ង់បានចរចា ចង់ទិញតាំងពីឆ្នាំមុន។ ប្រព័ន្ធខែលមីស៊ីល Arrow 3ជាលទ្ធផលនៃគម្រោងស្រាវជ្រាវ និងការអភិវឌ្ឍរួមគ្នារវាងទីភ្នាក់ងារការពារដែនអាកាសអាមេរិក និងអង្គការការពារដែនអាកាសអ៊ីស្រាអែល ប៉ុន្តែ ផលិតឡើងនៅក្នុងទឹកដីអ៊ីស្រាអែល។ ជាមួយការបើកភ្លើងខៀវរបស់អាមេរិក អ៊ីស្រាអែលសម្រេចបានកិច្ចព្រមព្រៀងលក់សព្វាវុធដ៏សំខាន់ក្នុងទឹកប្រាក់មហាសាល ៣៥០០លានដុល្លារ ដែលមិនធ្លាប់មានក្នុងប្រវត្តិអ៊ីស្រាអែល។
នៅក្នុងសេចក្តីប្រកាសព័ត៌មាន ក្រសួងការពារជាតិអ៊ីស្រាអែលអះអាងថា អ្នកតំណាងអាល្លឺម៉ង់ និងមន្រ្តីយោធាជាន់ខ្ពស់អ៊ីស្រាអែលនឹងចុះហត្ថលេខាលើឯកសារយល់ព្រមព្រៀងបឋមដែលនៅក្នុងនោះ អាល្លឺម៉ង់នឹងត្រូវបង់ប្រាក់៦០០លានដុល្លារដំបូង ដើម្បីចាប់ផ្តើមដំណើរការផលិតប្រព័ន្ធខែលមីស៊ីល។ ចំណែកកិច្ចសន្យាពេញលេញស្តីពីការទិញប្រព័ន្ធខែលមីស៊ីលអ៊ីស្រាអែល Arrow 3នឹងត្រូវចុះហត្ថលេខាយ៉ាងយូរបំផុតនៅចុងឆ្នាំ២០២៣ នៅបន្ទាប់ពីមានការបោះឆ្នោតយល់ព្រមពីសភារបស់ប្រទេសទាំងពីរ។
អាល្លឺម៉ង់វិញគ្រោងទទួលប្រព័ន្ធខែលមីស៊ីលរបស់អ៊ីស្រាអែលនៅខ្ទង់ត្រីមាសទី៤ ចុងឆ្នាំ ២០២៥។ ដោយសារសង្រ្គាមរុស្ស៊ីឈ្លានពានអ៊ុយក្រែន អាល្លឺម៉ង់ចង់បានប្រព័ន្ធខែលមីស៊ីលរបស់អ៊ីស្រាអែល ដើម្បីយកទៅការរពារដែនអាកាសរបស់ខ្លួន ពោលគឺនៅបន្ទាប់ពីអាល្លឺម៉ង់ប្រគល់ប្រព័ន្ធមីស៊ីលប្រឆាំងមីស៊ីលរបស់ខ្លួន IRIS-T និងប្រព័ន្ធខែល Patriot ផលិតឡើងនៅអាមេរិក ទៅឲ្យអ៊ុយក្រែន។ ម្យ៉ាង កិច្ចសន្យាទិញប្រព័ន្ធខែលមីស៊ីលអ៊ីស្រាអែលជាផ្នែកមួយនៃគម្រោងការពារដែនអាកាសរបស់អឺរ៉ុប ដែលអាល្លឺម៉ង់ជាអ្នកផ្តួចផ្តើមគំនិត និងមានប្រទេសចំនួន១៧ចូលរួម ដូចជាអង់គ្លេសជាដើម។ គម្រោងការពារដែនអាកាសអឺរ៉ុបអនុញ្ញាតឲ្យមានការទិញដោះដូរសព្វាវុធគ្នាទៅវិញ ទៅមកដើម្បីពង្រឹងវិស័យការពារអឺរ៉ុប នៅចំពោះមុខការគំរាមកំហែងរបស់រុស្ស៊ី។
សម្រាប់អាល្លឺម៉ង់ ប្រព័ន្ធខែលមីស៊ីលអ៊ីស្រាអែល Arrow 3 ជាមធ្យោបាយដ៏ល្អប្រសើរ ពីព្រោះវាជាប្រភេទមីស៊ីលបាលីស្ទិកអ៊ីពែសូនិក ដែលកសាងឡើងជាពិសេស សម្រាប់បាញ់បំផ្លាញកម្ទេច មីស៊ីលបាលីស្ទិកចម្ងាយឆ្ងាយ ដែលប្រព័ន្ធខែលមីស៊ីលធម្មតាគ្មានសមត្ថភាពអាចចាប់ស្ទាក់បាន។
ដោយយកគំរូតាមប្រព័ន្ធការពារដែនអាកាសរបស់អ៊ីស្រាអែល ឈ្មោះ Iron Dome ដែលមានសមត្ថភាពទប់ស្កាត់ គ្រាប់រ៉ុកក្កែតរបស់ពួកហាម៉ាសប៉ាឡេស្ទីន អាល្លឺម៉ង់គ្រោងនឹងដាក់ពង្រាយប្រព័ន្ធខែលមីស៊ីល Arrow 3 នៅទីតាំង៣កន្លែងក្នុងប្រទេសដើម្បីការពារគ្របដណ្តប់ផងដែរ ប្រទេសជិតខាងរបស់អាល្លឺម៉ង់ ដូចជារូម៉ានី ប៉ូឡូញ និងក្រុមប្រទេសជាប់សមុទ្របាល់ទិក ដែលមានព្រំដែនជាប់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ