Human Rights Watch ចោទឆ្មាំព្រំដែនតួកគី ថាធ្វើទារុណកម្មនិងបាញ់សម្លាប់ជនភៀសខ្លួនស៊ីរី
អង្គការការពារសិទ្ធិមនុស្ស Human Rights Watch បានលើកឡើងថា ឆ្មាំព្រំដែនរបស់តួកគី បានប្រើប្រាស់អំពើហិង្សាហួសប្រមាណទៅលើជនភៀសខ្លួនស៊ីរី ដែលឆ្លងព្រំដែន ដូចជាការធ្វើទារុណកម្ម និងការបាញ់រះបណ្តាលឲ្យស្លាប់ជាច្រើននាក់។ Human Rights Watch បានអំពាវនាវ ហៅឲ្យអាជ្ញាធររដ្ឋាភិបាលតួកគី ត្រូវតែបើកការស៊ើបអង្កេត ទាក់ទិននឹងអំពើរំលោភបំពានសិទ្ធិមនុស្សដ៏ធ្ងន់ធ្ងរនេះ។
ចុះផ្សាយនៅថ្ងៃ៖
ស្តាប់ - ០២:២៧
អង្គការ Human Rights Watch បានចេញលិខិតប្រកាសមួយនៅថ្ងៃព្រហស្បតិ៍ទី២៧មេសា ដោយបានលើកឡើងថា ឆ្មាំព្រំដែនតួកគី បានបាញ់រះដោយមិនរើសមុខ ទៅលើជនភៀសខ្លួនស៊ីវីលស៊ីរី ដែលប៉ុនប៉ងឆ្លងព្រំដែនដោយខុសច្បាប់។ នៅមានការប្រើអំពើហិង្សាធ្ងន់ធ្ងរផ្សេងទៀត ដូចជាការធ្វើទារុណកម្មជាដើម។
យោងតាមលិខិតនេះ កាលពីថ្ងៃទី១១មីនា ឆ្មាំព្រំដែនតួកគី បានបាញ់រះ និងធ្វើទារុណកម្មទៅលើក្រុមជនភៀសខ្លួនស៊ីរី ដែលមានគ្នា៨នាក់។ បុរសម្នាក់ និងកុមារម្នាក់ បានស្លាប់ បន្ទាប់ពីឆ្មាំព្រំដែនតួកគីបានចាប់យកទៅដាក់ឃុំ ខណៈអ្នកផ្សេងទៀតរងរបួសធ្ងន់។ អង្គការការពារសិទ្ធិមនុស្សនេះ បានរន្ធាន់ប្រាប់រដ្ឋាភិបាលតួកគី ត្រូវតែបើកការស៊ើបអង្កេត ចាប់យកមន្ត្រីឆ្មាំព្រំដែនដែលធ្វើអំពើហិង្សានេះ មកទទួលទោស។
លោក Hugh Williamson ប្រធាន Human Rights Watch ប្រចាំតំបន់អឺរ៉ុបនិងអាស៊ីកណ្តាល បានអះអាងថា ជាច្រើនឆ្នាំមកនេះ ដែលទាហានយាមព្រំដែនរបស់តួកគី បានបាញ់រះសម្លាប់ជនភៀសខ្លួនស៊ីរីជាច្រើនរយនាក់ ដោយរដ្ឋាភិបាលតួកគី មិនព្រមចាត់វិធានការអ្វីសោះ។ លោកបានបន្ថែមថា រដ្ឋាភិបាលតួកគីមានចិត្តបុណ្យ បានទទួលយកជនភៀសខ្លួនស៊ីរី ជាច្រើនលាននាក់ពិតមែន តែមិនមែនមានន័យថា តួកគីអាចប្រើអំពើហិង្សាហួសប្រមាណជាលក្ខណៈប្រព័ន្ធ ទៅលើក្រុមជនភៀសខ្លួនដែលឆ្លងព្រំដែនដោយខុសច្បាប់ បែបនេះឡើយ។
គួរបញ្ជាក់ថា យោងតាមអង្គការ ឃ្លាំមើលសិទ្ធិមនុស្សស៊ីរី OSDH គិតពីដើមឆ្នាំនេះ មានជនភៀសខ្លួនស៊ីរីចំនួន១២នាក់ ដែលត្រូវបានឆ្មាំព្រំដែនតួកគីបាញ់បណ្តាលឲ្យស្លាប់ ព្រមទាំង២០នាក់រងបួសដោយគ្រាប់កាំភ្លើង។
សូមរំលឹកដែរថា គិតចាប់ពីឆ្នាំ២០១១មក ក្រោយផ្ទុះសង្គ្រាមនៅស៊ីរី តួកគីបានទទួលយកជនភៀសខ្លួនស៊ីរី ប្រមាណជិត៣លាន៦សែននាក់។ ថ្វីបើព្រំដែនរវាងតួកគី និងស៊ីរី ត្រូវបិទយ៉ាងជាប់មែន តែតួកគីបានអនុញ្ញាតិជារឿយៗ ឲ្យមានរថយន្តដឹកអ្នកជម្ងឺ អ្នករបួសចូលទៅព្យាបាលនៅតួកគី និងអនុញ្ញាតឲ្យជនភៀសខ្លួនស៊ីរី អាចត្រលប់ទៅសួរសុខទុក្ខក្រុមគ្រួសារនៅស៊ីរីដែរ។ ក៏ប៉ុន្តែ នៅក្រោយគ្រោះធម្មជាតិរញ្ជួយដីដ៏ធ្ងន់ធ្ងរ កាលពីថ្ងៃទី៦កុម្ភៈ កន្លងទៅនេះ អាជ្ញាធរព្រំដែនតួកគីបា នរឹតបន្តឹងការយាមល្បាតយ៉ាងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ