អារ៉ាប៊ីសាអូឌីត និងអ៊ីរ៉ង់ប្រកាសចងសម្ព័ន្ធភាពការទូតនឹងគ្នាឡើងវិញ ក្រោមការផ្សះផ្សារបស់ចិន
ជាគូប្រជែង ដណ្តើមឥទ្ធិពលគ្នា នៅក្នុងតំបន់ អារ៉ាប៊ី សាអូឌីត និងអ៊ីរ៉ង់បានប្រកាស កាលពីថ្ងៃសុក្រទី ១០មីនាថា ប្រទេសទាំងពីរយល់ព្រមស្តារទំនាក់ទំនងការទូតនឹងគ្នាឡើងវិញ បន្ទាប់ពីអាក់ខាន អស់ជាង ៧ឆ្នាំ។ តាមសេចក្តីប្រកាសរួម ចេញផ្សាយនៅក្រោយ ការចរចា រវាងអ្នកទទួលខុសត្រូវផ្នែកសន្តិសុខរបស់ប្រទេសទាំងពីរ នៅទីក្រុងប៉េកាំង អ៊ីរ៉ង់ និងអារ៉ាប៊ី សាអូឌីត បានចុះហត្ថលេខាលើកិច្ចព្រមព្រៀង ស្តីពីការស្តារទំនាក់ទំនងការទូត និងការបើកដាក់ឲ្យដំណើរការស្ថានទូត នៅក្នុងរយៈពេល ២ខែទៅមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៩
អ៊ីរ៉ង់ និងអារ៉ាប៊ី សាអូឌីត គូសត្រូវធំពីរ នៅតំបន់ដើមបូព៌ា បានចាប់ផ្តើមបើកការចរចាសន្តិភាព តាំងពីឆ្នាំ ២០២១ នៅប្រទេសអូម៉ង់ និងនៅអ៊ីរ៉ាក់ នៅឆ្នាំ ២០២២។ ប៉ុន្តែ ទើបនៅទីក្រុងប៉េកាំង កាលពីថ្ងៃសុក្រទី ១០មីនា ដែលភាគីទាំងពីរប្រកាសយល់ព្រមព្រៀងគ្នា ដើម្បីស្តារឡើងវិញ ទំនាក់ទំនងការទូត អ៊ីរ៉ង់ និងអារ៉ាប៊ី សាអូឌីត។
ស្រង់សំដីដោយទីភ្នាក់ងារព័ត៌មានអ៊ីរ៉ង់ ទីប្រឹក្សាសន្តិសុខរបស់ប្រមុខដឹកនាំសាសនាអ៊ីស្លាមអ៊ីរ៉ង់ លោកអាលី ស្ហង់ខានី ដែលបានចុះហត្ថលេខាជាមួយសមភាគីអារ៉ាប៊ី សាអូឌីត បាននិយាយស្វាគមតួនាទីរបស់ចិន ដែលគាំទ្រ ដំណើរការចរចាដើម្បីការខិតចូលជិតគ្នា រវាងអ៊ីរ៉ង់ និងអារ៉ាប៊ីសាអូឌីត។ អ៊ីរ៉ង់ និងអារ៉ាប៊ី សាអូឌីតនៅបានថ្លែងអំណរគុណអ៊ីរ៉ាក់ និងរាជាណាចក្រអូម៉ង់ ដែលធ្លាប់ផ្តល់កន្លែងសម្រាប់ការចរចា នៅ២ឆ្នាំចុងក្រោយនេះ។
អ៊ីរ៉ង់ សំបូរដោយអ្នកកាន់សាសនាអ៊ីស្លាម ស្ហ៊ីអ៊ីត និងអារ៉ាប៊ីសាអូឌីត ស៊ុននីត ចាប់ឈ្លោះគ្នា និងកាត់ផ្តាច់ចំណងការទូតតាំងពីឆ្នាំ ២០១៦។ នៅឆ្នាំនោះ អារ៉ាប៊ីសាអូឌតីបានប្រកាសកាត់ផ្តាច់ចំណងការទូត ជាមួយអ៊ីរ៉ង់ នៅបន្ទាប់ពី ក្រុមស្ហ៊ីអ៊ីតអ៊ីរ៉ង់ លើកគ្នាវាយប្រហារលើស្ថានទូតអារ៉ាប៊ីសាអូឌីត នៅទីក្រុងតេហេរ៉ង់ ដើម្បីសងសឹកនឹងអារ៉ាប៊ីសាអូឌីតដែលប្រហារជីវិតមេដឹកនាំសាសនានិកាយស្ហ៊ីអ៊ីតនៅអារ៉ាប៊ីសាអូឌីត។
តាមសេចក្តីថ្លែងការណ៍រួម កាលពីថ្ងៃសុក្រ ទីប្រឹក្សាសន្តិសុខរបស់ប្រទេសអារ៉ាប៊ីសាអូឌីត និងអ៊ីរ៉ង់ព្រមព្រៀងគ្នាថា នៅក្រោយការចរចានៅថ្ងៃសុក្រ រដ្ឋមន្រ្តីការបរទេសរបស់ប្រទេសទាំងពីរនឹងជួបពិភាក្សាគ្នា ដើម្បីបើកស្ថានទូត នៅក្នុងប្រទេសទាំងពីរ នៅក្នុងរយៈពេល២ខែខាងមុខ។
នៅក្នុងសេចក្តីថ្លែងការណ៍រួម ដែលដកស្រង់ចុះផ្សាយដោយទីភ្នាក់ងារព័ត៌មានផ្លូវរដ្ឋអារ៉ាប៊ីសាអូឌីត SPA អារ៉ាប៊ី សាអូឌីត និងអ៊ីរ៉ង់ សម្រេចផងដែរ ដាក់ឲ្យដំណើរការឡើងវិញ នូវកិច្ចព្រមព្រៀងស្តីពីសហប្រតិបត្តិការសន្តិសុខ ចុះឆ្នាំ ២០០១ និងកិច្ចព្រមព្រៀងស្តីពីពាណិជ្ជកម្ម សេដ្ឋកិច្ចនិងការវិនិយោគ។ លើសពីនោះ អ៊ីរ៉ង់ និងអារ៉ាប៊ី សាអូឌីត នៅបានបញ្ជាក់ពីឆន្ទៈគោរពគ្នាទៅវិញ ទៅមក នៅពេលនិយាយពីដែនអធិបតេយ្យភាព និងការមិនលូកដៃចូលកិច្ចការផ្ទៃក្នុងគ្នាទៅវិញ ទៅមក។
កិច្ចព្រមព្រៀងស្តារទំនាក់ទំនងការទូតរវាងអ៊ីរ៉ង់ និងអារ៉ាប៊ីសាអូឌីតនឹងអាចទៅជួយកាត់បន្ថយភាពតានតឹង និងជម្លោះប្រដាប់អាវុធនៅក្នុងតំបន់ ជាពិសេស នៅយេម៉ែន និងស៊ីរី។ ជាក់ស្តែងនៅយេម៉ែន អ៊ីរ៉ង់ គាំទ្រផ្តល់អាវុធ ដល់ក្រុមឧទ្ទាមហ៊ូទី និកាយស៊្ហីអ៊ីត ដែលអារ៉ាប៊ី សាអូឌីតចោទប្រកាន់ថា ជាមុខសញ្ញាដ៏គ្រោះថ្នាក់សម្រាប់សន្តិសុខអារ៉ាប៊ីសាអូឌីត។
អ្នកនាំពាក្យម្នាក់របស់សេតវិមាន ទទួលបន្ទុក ផ្នែកសន្តិសុខ បាននិយាយប្រាប់ទីភ្នាក់ងារព័ត៌មានបារាំង AFPថា អាមេរិកស្វាគមរាល់ការប្រឹងប្រែងដើម្បីបិទបញ្ចប់សង្រ្គាមនៅយេម៉ែន និងកាត់បន្ថយភាពតានតឹងនៅដើមបូព៌ា។ ប៉ុន្តែ សម្រាប់អតីតឯកអគ្គរដ្ឋទូតអ៊ីស្រាអែលនៅបារាំង កិច្ចព្រមព្រៀង អ៊ីរ៉ង់ និងអារ៉ាប៊ី សាអូឌីតមិនមែនជាដំណឹងល្អសម្រាប់អ៊ីស្រាអែល ដែលកំពុងព្យាយាមចងស្ពានមេត្រីជាមួយ អារ៉ាប៊ីសាអូឌីត ដើម្បីធ្វើឲ្យអ៊ីរ៉ង់នៅឯកោរ។ ម្យ៉ាងវានឹងអាចទៅគំរាមកំហែងកិច្ចព្រមព្រៀងសន្តិភាព Abraham របស់អាមេរិក ដែលទើបបានផ្ចុងផ្តើមឲ្យអ៊ីស្រាអែលចងសម្ព័ន្ធភាពជាមួយប្រទេសអារ៉ាប់ពីរ គឺអេមីរ៉ាតអារ៉ាប់រួម និងបារ៉ែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ