មហាសេដ្ឋីប្រេងអេមីរ៉ាត អារ៉ាប់រួមត្រូវបានតែងតាំងជាប្រធានសន្និសីទអន្តរជាតិស្តីពីអាកាសធាតុCop២៨
ពីរថ្ងៃក្រោយត្រូវតែងតាំងជាប្រធានដឹកនាំសន្និសីទអន្តរជាតិស្តីពីអាកាសធាតុ Cop28 ម្ចាស់ក្រុមហ៊ុនប្រេងដ៏ធំរបស់ប្រទេសអេមីរ៉ាត អារ៉ាប់រួមបានប្រកាសអំពាវនាវឲ្យពិភពលោកកាត់បន្ថយការបញ្ចេញឧស្ម័នកាបូនិក ដោយមិនចាំបាច់រករឿង វាយប្រហារឧស្សាហកម្មថាមពល។ ការតែងតាំងមហាសេដ្ឋីប្រេងរបស់អេមីរ៉ាតអារ៉ាប់រួម ឲ្យធ្វើជាប្រធានដឹកនាំសន្និសីទអាកាសធាតុរបស់អង្គការសហប្រជាជាតិ នៅឆ្នាំ ២០២៣ បានបណ្តាលឲ្យមានប្រតិកម្មរិះគន់ពីសំណាក់អង្គការសកម្មជនបរិស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នៅប្រទេសមហាសេដ្ឋីប្រេង អេមីរ៉ាត អារ៉ាប់រួមដែលត្រូវធ្វើជាម្ចាស់ផ្ទះទទួលរៀបចំសន្និសីទអន្តរជាតិស្តីពីអាកាសធាតុ Cop២៨ ការជ្រើសរើសម្ចាស់ក្រុមហ៊ុនប្រេងឲ្យធ្វើជាប្រធានសន្និសីទអាកាសធាតុ ជារឿងជៀសមិនផុត។
នៅថ្ងៃព្រហស្បតិ៍ ស៊ុលតង់ Al Jaber ប្រធានក្រុមហ៊ុនប្រេងជាតិ និងជារដ្ឋមន្រ្តីថាមពលរបស់អេមីរ៉ាតអារ៉ាប់រួម ត្រូវបានតែងតាំងជាប្រធានដឹកនាំសន្និសីទអន្តរជាតិស្តីពីអាកាសធាតុ Cop ២៨ ដែលត្រូវប្រព្រឹត្តទៅនៅទីក្រុងឌូបៃ នៅខែវិច្ឆិកា ចុងឆ្នាំនេះ។
នៅក្នុងវេទិកាស្តីពីថាមពលដែលរៀបចំ នៅទីក្រុងអាប៊ូដាប៊ី នៅថ្ងៃសៅរ៍នេះ អនាគតប្រធានសន្និសីទអាកាសធាតុ បានអំពាវនាវឲ្យពិភពលោកផ្តោតសំខាន់ទៅលើការកាត់បន្ថយការបញ្ចេញឧស្ម័នកាបូនិក ដោយមិនចាំបាច់ត្រូវបែរខ្នងដាក់ការរីកចម្រើនដែលបានមកពីឧស្សាហកម្មថាមពល ពោលគឺដោយមិនចាំបាច់កាត់បន្ថយការផលិតប្រេង។ “ជំរុញកំណើនសេដ្ឋកិច្ចជាមួយការបញ្ចេញឧស្ម័នកាបូនិកកាន់តែតិច គឺជាអនាគត។ យើងកំពុងធ្វើការជាមួយដៃគូឧស្សាហកម្មថាមពលដើម្បីបង្កើនល្បឿនកាត់បន្ថយ ការបញ្ចេញឧស្ម័នកាបូនិក ជាពិសេសឧស្ម័នមេតាន និងជំរុញការអភិវឌ្ឍឧស្ម័នអ៊ីដ្រូសែន។” នេះជាការអះអាងរបស់ស៊ុលតង់ Al Jaber។
រងការចោទប្រកាន់ថា ជាប្រភពបញ្ចេញឧស្ម័នកាបូនិក ឧស្ម័នផ្ទះកញ្ចក់ដែលជាដើមហេតុនៃការឡើងកំដៅផែនដី ក្រុមប្រទេសមហាសេដ្ឋីប្រេង ដែលមានអេមីរ៉ាតអារ៉ាប់រួមដែរនោះធ្លាប់ប្រកាសនយោបាយកាត់បន្ថយការបញ្ចេញឧស្ម័នកាបូនិក ប៉ុន្តែ នៅតែមិនព្រមបន្ថយល្បឿនក្នុងការផលិតប្រេង ឧស្ម័ន ដែលជាប្រភពបញ្ចេញឧស្ម័នកាបូនិក។ ជាក់ស្តែង គេបានទាមទារឲ្យមានការវិនិយោគច្រើនជាង ៦០០ពាន់លានដុល្លារ ដើម្បីធានាការផ្គត់ផ្គង់ប្រេង និងឧស្ម័នសម្រាប់តម្រូវការពិភពលោក ពីពេលនេះ ដល់ឆ្នាំ ២០៣០។
សម្រាប់អង្គការ សកម្មជនការពារបរិស្ថាន ការតែងតាំងប្រធានក្រុមហ៊ុនប្រេងអេមីរ៉ាតអារ៉ាប់រួម ឲ្យធ្វើជាប្រធានសន្និសីទអាកាសធាតុរបស់អង្គការសហប្រជាជាតិ ស្តែងឲ្យឃើញ ពីជម្លោះផលប្រយោជន៍ដ៏គួរឲ្យអាស្រូវបំផុត។ សម្រាប់ប្រធានអង្គការActionaid ការតែងតាំងមហាសេដ្ឋីប្រេងដែលជាអ្នកទទួលខុសត្រូវបញ្ចេញឧស្ម័នកាបូនិកឲ្យធ្វើជាប្រធានសន្និសីទអាកាសធាតុ ប្រៀបដូចជាបញ្ជូនកូនមាន់ឲ្យទៅនៅក្នុងកណ្តាប់ដៃគ្រប់គ្រងរបស់សត្វកញ្ច្រោង។
នៅក្នុងសន្និសីទអន្តរជាតិស្តីពី អាកាសធាតុCop ២៧នៅប្រទេសអេហ្ស៊ីប នៅចុងឆ្នាំ ២០២២ អេមីរ៉ាតអារ៉ាប់រួមធ្លាប់រងការចោទប្រកាន់ថា បានបញ្ជូនមន្រ្តីរបស់ខ្លួនឲ្យទៅធ្វើLobbyខ្លាំង ដើម្បីកុំឲ្យគេនិយាយពីរឿងកាត់បន្ថយការប្រើប្រាស់ប្រេង នៅក្នុងសេចក្តីសម្រេចស្តីពីការប្រយុទ្ធប្រឆាំងនឹងការប្រែប្រួលអាកាសធាតុ។
គួរបញ្ជាក់ដែរថា ស៊ុលតង់ Al Jaber មានតំណែងផងដែរជាប្រធានក្រុមហ៊ុនថាមពលកកើតឡើងវិញនៅអេមីរ៉ាតអារ៉ាប់រួម ឈ្មោះ Masdar។ អតីតអ្នកទទួលខុសត្រូវអាកាសធាតុរបស់អង្គការសហប្រជាជាតិ លោកYvo de Boer បានសំដែងការគាំទ្របេក្ខភាពរបស់ស៊ុលតង់ Al Jaber ព្រោះថា អេមីរ៉ាត អារ៉ាប់រួមជាប្រទេសសំខាន់បំផុតដែលវិនិយោគច្រើនលើថាមពលកកើតឡើងវិញ ទាំងនៅក្នុងប្រទេស និងនៅបរទេស។ ការឡើងកំដៅផែនដីជាប្រធានបទសំខាន់សម្រាប់ប្រទេសវាលខ្សាច់រហោឋានដូចជាអេមីរ៉ាតអារ៉ាប់រួម។ តាមការសិក្សានៅឆ្នាំ ២០២១ តំបន់មួយចំនួននៃឈូងសមុទ្រពែរ្សដែលកន្លែងខ្លះអាចមានសីតុណ្ហភាព៥០អង្សា អាចក្លាយជាកន្លែងដែលគេមិនអាចរស់នៅបាន ពីពេលនេះ ដល់ចុងសតវត្សរ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ