សម្ព័ន្ធអារ៉ាប់បើកជំនួបកំពូលក្នុងបរិបទតានតឹងរវាងប្រទេសសមាជិក
បន្ទាប់ពីអាក់ខាន មិនបានរៀបចំចំនួន៣ឆ្នាំ ដោយសារវិបត្តិកូវីដ សម្ព័ន្ធអារ៉ាប់បានបើកជំនួបកំពូល នៅថ្ងៃអង្គារទី ១វិច្ឆិកា នៅអាល់ហ្សេរី ដែលជាប្រទេសម្ចាស់ផ្ទះ។ នៅពេលសម្ព័ន្ធអារ៉ាប់មានប្រទេសសមាជិកសរុប ២២ ប្រទេស មេដឹកនាំរបស់ប្រទេសអារ៉ាប់ ជាច្រើនរូប បានអវត្តមាន នៅក្នុងបរិបទនៃការខ្វែងគំនិតគ្នា នៅក្នុងជម្លោះ នៅស៊ីរី លីប៊ី និងការបង្ខិតចូលជិតគ្នារវាងប្រទេសអារ៉ាប់មួយចំនួនជាមួយ រដ្ឋជ្វីហ្វ អ៊ីស្រាអែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ក្នុងរយៈពេល ៣ឆ្នាំ ដែលសម្ព័ន្ធអារ៉ាប់ខកខាន មិនបានរៀបចំជំនួបកំពូល ដោយសារតែវិបត្តិកូវីដសកល ប្រទេសសមាជិកអារ៉ាប់ជាច្រើនបានបែកបាក់គ្នាខ្លាំង ដោយសារតែហេតុការណ៍មួយចំនួនដែលកំពុងកើតរញ្ជួយតំបន់។ ក្រៅពីជម្លោះប្រដាប់អាវុធ សង្រ្គាមស៊ីវិល នៅស៊ីរី និងលីប៊ី ប្រទេសសមាជិកសម្ព័ន្ធអារ៉ាប់មានជំហរមិនដូចគ្នា នៅក្នុងរឿងចងសម្ព័ន្ធមេត្រីជាមួយ ប្រទេសអ៊ីស្រាអែល។
ដោយដើរតាមផ្លូវរបស់អេហ្ស៊ីប និងហ្សកដានី អេមីរ៉ាត អារ៉ាប់រួម បារ៉ែន និងម៉ារ៉ុកបានចុះកិច្ចព្រមព្រៀងស្តារទំនាក់ទំនងជាមួយរដ្ឋជ្វីហ្វ អ៊ីស្រាអែល ក្រោមការផ្តួចផ្តើមគំនិតរបស់រដ្ឋបាលលោកដូណាល់ ត្រាំ។ អាល់ហ្សេរីដែលមានជំហរ គាំទ្រ បុព្វហេតុប្រជាជនប៉ាឡេស្ទីន និងទើបរៀបចំ ជំនួបផ្សះផ្សាររវាងក្រុមហ្វាតា និងហាម៉ាសប៉ាឡេស្ទីន កាលពីខែ តុលាកន្លងទៅ បានដំឡើងសំឡេងដាក់គូប្រជែង ប្រទេសម៉ារ៉ុក ដែលបានប្រកាសចងសម្ព័ន្ធភាពយោធាជាមួយអ៊ីស្រាអែល។ ការខ្វែងគំនិតគ្នា របស់ប្រទេសអារ៉ាប់ ទាក់ទងនឹងចំណងមេត្រីជាមួយអ៊ីស្រាអែល បានលេចត្រដែតយ៉ាងច្បាស់ កាលពីថ្ងៃអង្គារ នៅពេលមេដឹកនាំរបស់ប្រទេសអារ៉ាប់មួយចំនួន ដែលបានចងសម្ព័ន្ធមេត្រីជាមួយប្រទេសអ៊ីស្រាអែល ដូចជាអេមីរ៉ាត អារ៉ាប់រួម បារ៉ែន និងម៉ារ៉ុកបានអវត្តមាននៅក្នុងជំនួបកំពូល នៅអាល់ហ្សេរី។ ចំណែករាជបុត្រស្នងរាជ្យអារ៉ាប៊ី សាអូឌីត បិនសាល់ម៉ានអវត្តមានផងដែរ ប៉ុន្តែ ក្នុងហេតុផលសុខភាពមិនល្អ។
ទោះសមាជិកមិនជួបជុំគ្នាទាំងស្រុង សម្ព័ន្ធអារ៉ាប់ ដែលមាន២២ប្រទេស ត្រូវតែពិភាក្សាគ្នា រហូតដល់ថ្ងៃពុធទី ២ វិច្ឆិកា ដើម្បីសម្រេចឲ្យសេចក្តីថ្លែងការណ៍រួម ស្តីពីជំហររបស់សម្ព័ន្ធអារ៉ាប់ នៅក្នុងសង្រ្គាមនៅស៊ីរី យេម៉ែន និងនៅលីប៊ី។
អាល់ហ្សេរីផ្ទាល់ ចង់ឲ្យគេរាប់រកស៊ីរីឡើងវិញ បន្ទាប់ពីរបបរបស់លោកប្រធានាធិបតីបាស្ហាអាល់អាសាដ ត្រូវព្យួរសមាជិកភាព ដោយសារការបង្រ្កាបលើប្រជាជនកាលពីឆ្នាំ ២០១១។ ប៉ុន្តែ ប្រទេសនៅឈូងសមុទ្រពែរ្ស ជាច្រើនចេញមុខប្រឆាំង។ លោកពូទីន ប្រធានាធិបតីរុស្ស៊ី ដែលជាសម្ព័ន្ធមិត្តរបស់ប្រធានាធិបតីស៊ីរី ធ្លាប់បានទាមទារឲ្យគេគោរពអធិបតេយ្យភាព ដែនបូរណភាពរបស់ស៊ីរី។ ប៉ុន្តែ នៅក្នុងសំបុត្រមួយច្បាប់ ផ្ញើទៅ កាន់សម្ព័ន្ធអារ៉ាប់ នៅថ្ងៃបើកជំនួបកំពូល នៅអាល់ហ្សេរី លោកពូទីនមិនបានជំរុញខ្លាំង ឲ្យប្រទេសអារ៉ាប់ត្រូវតែចូលជិតស្និទ្ធិនឹងស៊ីរី ប៉ុន្តែ លោកផ្តោតសំខាន់លើសហប្រតិបត្តិការរវាងរុស្ស៊ី និងសម្ព័ន្ធអារ៉ាប់។
សម្រាប់លោកពូទីន ប្រទេសនៅដើមបូព៌ានិងនៅអាហ្វ្រិកខាងជើង ដែលមានប្រជាជនរស់នៅជាង៥០០លាននាក់ ដើរតួនាទីសំខាន់នៅក្នុងបង្កើតទំនាក់ទំនងអន្តរជាតិ ពហុប៉ូល។ ដូច្នេះ រុស្ស៊ីប្តេជ្ញានឹងអភិវឌ្ឍសហប្រតិបត្តិការជាមួយប្រទេសសមាជិកអារ៉ាប់ ដើម្បី បង្កើនការធានាសុវត្ថិភាព សន្តិភាព នៅថ្នាក់តំបន់ និងនៅក្នុងពិភពលោក។ នេះបើតាមសាររបស់លោកពូទីន ដែលឯកអគ្គរដ្ឋទូតរុស្ស៊ីប្រចាំទីក្រុងអាល់ហ្សេ ចុះផ្សាយជាសាធារណៈ កាលពីថ្ងៃ អង្គារម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ