វិបត្តិនយោបាយអ៊ីរ៉ាក់៖ បាតុកម្ម និងការផ្ទុះអាវុធហិង្សា បណ្តាលឲ្យស្លាប់យ៉ាងហោច២៣នាក់
វិបត្តិនយោបាយអ៊ីរ៉ាក់ កំពុងតែឈានចូល ក្លាយជាការប្រឈមមុខដាក់គ្នាដោយហិង្សា រវាងក្រុមបាតុករ និងកងសមត្ថកិច្ច បន្ទាប់ពីមេដឹកនាំចលនានយោបាយដ៏មានឥទ្ធិពល ឈ្មោះ ម៉ុកតាដា សាដរ៍ បានប្រកាសឈប់ធ្វើនយោបាយ កាលពីថ្ងៃចន្ទទី២៩សីហា។ ការប្រទូស្តរាយហិង្សា ឈានទៅដល់ការផ្ទុះអាវុធ បានបណ្តាលឲ្យស្លាប់មនុស្ស ចំនួន២៣នាក់ នៅក្រុងបាកដាត យោងតាមការឲ្យដឹងពីអាជ្ញាធរអ៊ីរ៉ាក់ នៅព្រឹកថ្ងៃអង្គារនេះ។ សហគមអន្តរជាតិ បានអំពាវនាវ ឲ្យគ្រប់ភាគីនយោបាយអ៊ីរ៉ាក់ មានការអត់ធ្មត់ ហើយចរចាគ្នារកច្រកចេញដោយសន្តិវិធី ដើម្បីបញ្ចៀសសង្គ្រាមស៊ីវីល។
ចុះផ្សាយនៅថ្ងៃ៖
ស្តាប់ - ០២:២០
បាតុកម្មផុសផុល បានកក្រើកកាន់តែខ្លាំង ចាប់ពីថ្ងៃចន្ទទី២៩សីហា នៅទីក្រុងបាកដាត ថ្វីបើអាជ្ញាធរអ៊ីរ៉ាក់ បានប្រកាសចេញវិធានការ ដាក់បម្រាមគោចរ នៅទូទាំងប្រទេស។ យោងតាមអ្នកយកព័ត៌មានបារាំង AFP សំឡេងផ្ទុះគ្រាប់កាំភ្លើង ត្រូវបានគេឮនៅព្រឹកថ្ងៃអង្គារ ចេញពីតំបន់បៃតង់ ដែលជាតំបន់សន្តិសុខពិសេស កណ្តាលក្រុងបាកដាត។ តំបន់នេះ គឺសំបូរដោយទីតាំងស្ថាប័នធំៗរបស់រដ្ឋ ព្រមទាំងស្ថានទូតបរទេស។
ក្រុមបាតុករអ្នកគាំទ្រចលនានយោបាយ របស់លោក ម៉ុកតាដា សាដរ៍ ជាច្រើនពាន់នាក់ បានសំរុកចូលទៅក្នុងបរិវេណតំបន់បៃតង់ ដើម្បីកាន់កាប់អាគាររដ្ឋសភា និងវិមានរដ្ឋាភិបាលអ៊ីរ៉ាក់។ សាក្សីបានអះអាងថា ការផ្ទុះអាវុធ បាញ់រះ បានកើតឡើង នៅច្រកចូលតំបន់បៃតង់ រវាងក្រុមប្រដាប់អាវុធគាំទ្រលោក ម៉ុតាដា សាដរ៍ និងកងសមត្ថកិច្ចអ៊ីរ៉ាក់ ដែលមានការជួយពីក្រុមទាហានប៉ារ៉ា Hachd ad-Chaabi ដែលជាក្រុមប្រដាប់អាវុធ ទំនុកបំរុងដោយអ៊ីរ៉ង់។ យោងតាមក្រុមគ្រូពេទ្យ ការផ្ទុះអាវុធនៅព្រឹកថ្ងៃអង្គារនេះ បណ្តាលឲ្យស្លាប់២៣នាក់ និងរបួសប្រមាណ៣៨០នាក់។
សូមបញ្ជាក់ថា លោកម៉ុកតាដា សាដរ៍ ប្រមុខដឹកនាំសាសនាអ៊ីស្លាមឈីអ៊ីត និងជាមេចលនានយោបាយដ៏មានឥទ្ធិពលបំផុតនៅអ៊ីរ៉ាក់ បានប្រកាសកាលពីថ្ងៃចន្ទ ថាខ្លួននឹងឈប់លូកដៃក្នុងឆាកនយោបាយជារៀងរហូត។ មុននឹងប្រកាសបែបនេះ លោកបានហៅឲ្យក្រុមសម្ព័ន្ធនយោបាយអ៊ីរ៉ាក់ ដែលស្និទ្ធនឹងអ៊ីរ៉ង់ ត្រូវតែយល់ព្រមរំលាយសភា ហើយបោះឆ្នោតសាជាថ្មី។ តែភាគីម្ខាងទៀត ទាមទារឲ្យបង្កើតរដ្ឋាភិបាលជាមុនសិន។
តែយ៉ាងណា អ្នកវិភាគមិនជឿថា លោក ម៉ុកតាដា សាដរ៍ លែងលូកដៃក្នុងកិច្ចការនយោបាយនោះទេ ព្រោះសំដីរបស់លោកម្នាក់នេះ មានឥទ្ធិពលណាស់ ទៅលើប្រជាជនអ៊ីរ៉ាក់មួយចំនួនធំ ដែលចង់ឃើញការផ្លាស់ប្តូរ។ លោក Hamzeh Hadad អ្នកស្រាវជ្រាវម្នាក់នៅក្រុមប្រឹក្សាអឺរ៉ុបដើម្បីទំនាក់ទំនងអន្តរជាតិ ECFR បានលើកឡើងថា គេមិនភ្ញាក់ផ្អើលទេ ប្រសិនបើលោកម៉ុកតាដា សាដរ៍ លេបសំដីវិញ ព្រោះវាមិនមែនជាលើកទី១ទេ។ ហើយអ្វីដែលគួរឲ្យខ្លាចបំផុតនោះ គឺលោកម្នាក់នេះ អាចនឹងពន្យុះឲ្យក្រុមអ្នកគាំទ្រខ្លួន ធ្វើសកម្មភាពហិង្សាតាមចិត្ត ទាំងដែលអះអាងថា លោកលែងទទួលខុសត្រូវតទៅទៀតហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ