វិបត្តិនយោបាយអ៊ីរ៉ាក់៖ មេចលនានយោបាយដ៏មានឥទ្ធិពល ម៉ុកតាដា សាដរ៍ ប្រកាសឈប់ធ្វើនយោបាយជារៀងរហូត
មេដឹកនាំចលនានយោបាយ ដ៏មានឥទ្ធិពលបំផុតនៅអ៊ីរ៉ាក់ គឺលោក ម៉ុកតាដា សាដរ៍ បានប្រកាសកាលពីថ្ងៃចន្ទម្សិលមិញ ថាខ្លួននឹងចាកចេញ ពីឆាកនយោបាយជារៀងរហូត។ ការប្រកាសនេះ គឺបន្ទាប់ពីអ៊ីរ៉ាក់ បានជាប់គាំងនយោបាយ ក្រោយការបោះឆ្នោតកាលពីខែតុលាឆ្នាំ២០២១ រហូតមកទល់ពេលនេះ នៅតែគ្មានរដ្ឋាភិបាលដឹកនាំប្រទេសទេ។ តើការប្រកាសឈប់ធ្វើនយោបាយ របស់ប្រមុខអ៊ីស្លាមឈីអ៊ីត ម៉ុកតាដា សាដរ៍ នេះ អាចនឹងដោះស្រាយវិបត្តិបាន ឬក៏ផ្ទុយទៅវិញ វានឹងរុញច្រានវិបត្តិនយោបាយអ៊ីរ៉ាក់ ឲ្យកាន់តែទ័លច្រក?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
នៅលើទំព័រ Twitter របស់ខ្លួន លោកម៉ុកតាដា សាដរ៍ មេចលនានយោបាយ និងសាសនាអ៊ីស្លាមឈីអ៊ីត ដ៏មានឥទ្ធិពលបំផុតនៅអ៊ីរ៉ាក់ បានសរសេរថា លោកបានសម្រេចចិត្ត ឈប់លូកដៃ ព្រមទាំងប្រឡូកក្នុងឆាកនយោបាយអ៊ីរ៉ាក់ ជារៀងរហូត។ លោកក៏បានប្រកាសបិទផងដែរ នូវស្ថាប័ននយោបាយ និងសាសនា មួយចំនួនធំដែលប្រើឈ្មោះរបស់លោក ។
គួរបញ្ជាក់ថា អ៊ីរ៉ាក់កំពុងតែជាប់គាំងក្នុងវិបត្តិនយោបាយ យ៉ាងធ្ងន់ធ្ងរបំផុត។ ក្រោយការបោះឆ្នោតសភា ខែតុលាឆ្នាំ២០២១ ចលនានយោបាយរបស់លោក ម៉ុកតាដា សាដរ៍ បានទទួលអាសនៈសភានាំមុខគេ ចំនួន៧៣ ក្នុងចំណោម៣២៩ តែនៅតែមិនគ្រប់ ដើម្បីបង្កើតរដ្ឋាភិបាល។ កាលពីខែមិថុនា លោកម៉ុកតាដា សាដរ៍ បានហៅឲ្យសមាជិកសភាខ្លួន ធ្វើពហិកាឈប់ចូលសភា ព្រមទាំងបានប្រកាស បង្ខំឲ្យគណបក្សនយោបាយផ្សេងទៀត យល់ព្រមរំលាយសភាចោល ហើយរៀបចំការបោះឆ្នោតសាជាថ្មី។
មានវ័យ៤៨ឆ្នាំ លោកម៉ុកតាដា សាដរ៍ គឺជាប្រមុខដឹកនាំសហគមអ៊ីស្លាមឈីអ៊ីត ដែលប្រជាជនអ៊ីរ៉ាក់ភាគច្រើន គោរពគាំទ្រ។ លោកបានអះអាងថា ចង់ធ្វើកំណែទម្រង់នយោបាយស៊ីជំរៅ បិទបញ្ចប់អំពើពុករលួយ នឹងឈប់ធ្វើឲ្យអ៊ីរ៉ាក់ ធ្វើជាអាយ៉ងរបស់អ៊ីរ៉ង់តទៅទៀត។ យ៉ាងណាមិញ ក្រោយលោកម្នាក់នេះ បានប្រកាសបដិសេធមិនទទួលយករដ្ឋាភិបាលចម្រុះ ដឹកនាំដោយក្រុមសម្ព័ន្ធជាតិស្និទ្ធនឹងឥទ្ធិពលអ៊ីរ៉ង់ ក្រុមអ្នកគាំទ្រលោកម៉ុកតាដា សាដរ៍ បានផ្តើមធ្វើបាតុកម្ម និងបានសម្រុកចូលទៅកាន់កាប់សភាអ៊ីរ៉ាក់ថែមទៀតផង។
យ៉ាងណាក៏ដោយ អ្នកសង្កេតការណ៍នយោបាយនៅអ៊ីរ៉ាក់ អះអាងថាមានការមិនទុកចិត្តទេ នៅក្រោយការប្រកាសរបស់លោក ម៉ុកតាដា សាដរ៍ ថាឈប់លូកដៃក្នុងឆាកនយោបាយ។ លោកម្នាក់នេះ ធ្លាប់លេបសំដីខ្លួនឯងម្តងហើយ ដោយធ្លាប់ថា មិនឈរឈ្មោះក្នុងការបោះឆ្នោតទេ តែទីបំផុតជិតកៀកថ្ងៃបោះឆ្នោត ក៏បានសម្រេចឈរឈ្មោះវិញ។
ទន្ទឹមគ្នានេះ មានការបារម្ភកាន់តែខ្លាំង ពីការប្រទូស្តរាយគ្នា ឈានទៅដល់ការប្រើកម្លាំងហិង្សា។ អាជ្ញាធរអ៊ីរ៉ាក់ បានប្រកាសដាក់បម្រាមគោចរ ហាមឃាត់ការធ្វើដំណើរ និងការជួបជុំទាំងស្រុង នៅទីក្រុងបាកដាត ចាប់ពីម៉ោង ៣និង៣០នាទី រសៀលថ្ងៃចន្ទ២៩សីហា។ រហូតមកទល់ពេលនេះ ថ្វីបើបាតុកម្មតវ៉ា មិនបានឈានទៅដល់ការផ្ទុះអាវុធហិង្សាមែន តែក្រុម Hachd al-Chaabi ដែលជាកម្លាំងប្រដាប់អាវុធ គាំទ្រដោយអ៊ីរ៉ង់ បានអះអាងថា គេត្រៀមខ្លួនរួចហើយ ដើម្បីចេញអន្តរាគមការពារស្ថាប័នជាតិអ៊ីរ៉ាក់ ក្នុងករណីមានបាតុកម្មហិង្សានិងចលចលខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ