បារាំង-អាល់ហ្សេរី៖ទំនាក់ទំនងដែលកំពុងបន្តបំពុលដោយរឿងអតីតកាល និងពិបាកផ្សះផ្សា?
ចុះផ្សាយនៅថ្ងៃ៖
ស្តាប់ - ០៧:៣១
នៅថ្ងៃព្រហស្បតិ៍ ទី២៥ សីហា ប្រធានាធិបតីបារាំងលោកអេម៉ានុយអែល ម៉ាក្រុងផ្តើមទស្សនកិច្ចផ្លូវការរយៈពេល ៣ថ្ងៃនៅក្នុងប្រទេសអាល់ហ្សេរី។ ទស្សនកិច្ចនេះបានធ្វើឡើងតាមការអញ្ជើញរបស់ប្រធានាធិបតីអាល់ហ្សេរីលោកអាប់ឌែលម៉ាហ្ស៊ីដ ទេពប៊ូន។ គួរបញ្ជាក់ថា នេះជាទស្សនកិច្ចលើកទី២ របស់លោកម៉ាក្រុងក្នុងនាមជាប្រធានាធិបតីទៅកាន់អាល់ហ្សេរី។ តាមរយៈទស្សនកិច្ចលើកនេះ លោកម៉ាក្រុងសង្ឃឹមបើកទំព័រថ្មីនៅក្នុងទំនាក់ទំនងរវាងបារាំង និងអាល់ហ្សេរីដែលកំពុងបន្តរកាំរកូសដោយរឿងអតីតកាល។
មានការកត់សម្គាល់ចំនួនពីរនៅក្នុងទស្សនកិច្ចរបស់ប្រធានាធិបតីបារាំងលោកម៉ាក្រុងនៅអាល់ហ្សេរីលើកនេះ ទី១ ជាទស្សនកិច្ចដែលគេឲ្យឈ្មោះ « ផ្លូវការ និងមិត្តភាព » ពោលមិនមែនជាទស្សនកិច្ចផ្លូវរដ្ឋទេ។ ជម្រើសឲ្យឈ្មោះរបៀបនេះជាការព្រមព្រៀងរវាងលោកអេម៉ានុយអែល ម៉ាក្រុង និងសមភាគីអាល់ហ្សេរីលោកអាប់ឌែលម៉ាហ្ស៊ីដ ទេពប៊ូន។ ចំណែកកំណត់សម្គាល់ទី២ ជាទស្សនកិច្ចដែលធ្វើឡើងចំពេលដែលអាល់ហ្សេរីទើបប្រារព្ធខួប ៦០ឆ្នាំនៃការទទួលបានឯករាជ្យពីបារាំងកាលពីឆ្នាំ ១៩៦២។
នៅអាល់ហ្សេរី លោកម៉ាក្រុងត្រូវជួបសន្ទនាចំនួនពីរដងជាមួយលោកទេពប៊ូន ទទួលទានអាហារ និងធ្វើដំណើរជាមួយលោកទេពប៊ូនទៅកាន់វិមាននៃការចងចាំក្នុងសម័យសង្រ្គាមដណ្តើមឯករាជ្យពីបារាំង។ បន្ទាប់ពីទីក្រុងអាល់ហ្សេ លោកម៉ាក្រុងនឹងធ្វើដំណើរទៅកាន់ទីក្រុងអូរ៉ង់ដែលជាទីក្រុងធំទី២ របស់អាល់ហ្សេរី និងជាទីក្រុងវប្បធម៌។ ការធ្វើដំណើរទៅកាន់ទីក្រុងមួយនេះជាជម្រើសផ្ទាល់ខ្លួនរបស់លោកម៉ាក្រុងដែលលោកចង់បញ្ជាក់ថា នៅពេលដែលលោកទៅអាល់ហ្សេរី លោកមិនឈប់ចតនៅតែក្នុងទីក្រុងប៉ុណ្ណោះទេ។
ផ្តល់សន្ទុះលើដៃគូសេដ្ឋកិច្ច
វិមានប្រធានាធិបតីបារាំងអេលីហ្សេបានចាត់ទកទស្សនកិច្ច « ផ្លូវការ និងមិត្តភាព » ជាទស្សនកិច្ចដើម្បីផ្តល់សន្ទុះ និងបើកទំព័រថ្មីនៅក្នុងទំនាក់ទំនងរវាងប្រទេសទាំងពីរ។ ដើម្បីបញ្ជាក់ពីឆន្ទៈ និងគោលដៅមួយនេះ លោកម៉ាក្រុងបាននាំយកទៅជាមួយលោកនូវគណៈប្រតិភូមួយក្រុមដែលមានរដ្ឋមន្រ្តីចំនួន ៧រូប រួមទាំងក្រុមអ្នកជំនួញបារាំងគ្រាក់ៗ។ ប្រធានរឿងដែលលោកម៉ាក្រុងលើកយកទៅជជែកជាមួយសមភាគីអាល់ហ្សេរីមិនខ្វះទេ រួមមាន វិស័យការពារ សន្តិសុខ និងសេដ្ឋកិច្ច ពិសេសការផ្សះផ្សា និងការចងចាំដែលជាប្រធានរឿងចម្រូងចម្រាសខ្លាំង និងកំពុងបន្តចញ្ចឹមភាពរកាំរកូសមកដល់សព្វថ្ងៃ។
ក្រៅពីនេះ នៅមានប្រធានរឿងស្តីពីការផ្តល់ទិដ្ឋាការឲ្យពលរដ្ឋអាល់ហ្សេរីដែលចង់ទៅបារាំង។ គួររម្លឹកថាកាលពីខែកញ្ញា ឆ្នាំ ២០២១ បារាំងបានកាត់បន្ថយការផ្តល់ចំនួនទិដ្ឋាការឲ្យពលរដ្ឋអាល់ហ្សរីដល់ទៅ ៥០%។ យ៉ាងណាក៏ដោយ ដៃគូសេដ្ឋកិច្ចជាប្រធានបទអាទិភាពដែលបារាំងចង់ផ្តល់សន្ទុះឡើងវិញជាមួយអាល់ហ្សេរី ពិសេសនៅក្នុងបរិបទនៃសង្រ្គាមរុស្ស៊ីឈ្លានពានអ៊ុយក្រែន។ ត្រង់ចំណុចនេះ ការធានាពីការផ្គត់ផ្គត់ឧស្ម័នពីអាល់ហ្សេរីជារឿងដែលអឺរ៉ុបចង់បានខ្លាំង ព្រោះអាល់ហ្សេរីជាប្រទេសជង្រុកឧស្ម័នមួយនៅអាហ្រ្វិក។ នៅបារាំង ឧស្ម័នប្រើប្រាស់សព្វថ្ងៃមានជិត ១០% ត្រូវបានបារាំងនាំចូលពីអាល់ហ្សេរី។
« សុំទោស » ជាពាក្យដែលអាល់ហ្សេរីចង់ឮពីបារាំង
ភាពរកាំរកូសរវាងបារាំង និងអាល់ហ្សេរីកើតចេញពីរឿងអតីតកាលនៅពេលដែលបារាំងបានផ្តើមធ្វើអាណានិគមលើអាល់ហ្សេរីក្នុងឆ្នាំ ១៨៣០។ គេត្រូវរង់ចាំដល់ឆ្នាំ ១៩៦២ ពោលក្រោយពីការត្រួតត្រារបស់បារាំងអស់រយៈពេល ១៣២ឆ្នាំទើបអាល់ហ្សេរីអាចរើបម្រះរួចពីនឹមអាណានិគម។ តែទំរាំទទួលបានឯករាជ្យពីបារាំង មានពលរដ្ឋអាល់ហ្សេរីច្រើនណាស់បានបាត់បង់ជីវិតនៅក្នុងការតស៊ូប្រឆាំងនឹងអាណានិគមនិយមបារាំង។ ជារៀងរាល់ឆ្នាំ រដ្ឋាភិបាលអាល់ហ្សេរីតែងគោរពវិញ្ញាក្ខន្ធចំពោះថ្នាក់ដឹកនាំ និងវីរៈជនអាល់ហ្សេរីដែលបានបាត់បង់ជីវិតនៅក្នុងសង្រ្គាមទាមទារឯករាជ្យពីបារាំងក្នុងចន្លោះឆ្នាំ ១៩៥៤ និង ១៩៦២។
អ្វីដែលរដ្ឋាភិបាលទីក្រុងអាល់ហ្សេចង់បាន គឺសុំឲ្យរដ្ឋាភិបាលបារាំងសុំទោសជាផ្លូវការចំពោះទង្វើរបស់ខ្លួន។ នៅក្នុងទស្សនកិច្ចលើកទី១ របស់ប្រធានាធិបតីបារាំងលោកម៉ាក្រុងកាលពីខែធ្នូ ឆ្នាំ ២០១៧ លោកម៉ាក្រុងដែលបានកើតនៅក្រោយអាល់ហ្សេរីទទួលបានឯករាជ្យបានត្រឹមចាត់ទុកអាណានិគមបារាំងជាឧក្រិដ្ឋកម្មប្រឆាំងមនុស្សជាតិ។ បន្ទាប់មក លោកម៉ាក្រុងបានបរិហារពីការសម្លាប់រង្គាលលើបាតុករអហិង្សារអាល់ហ្សេរីក្នុងក្រុងប៉ារីសកាលពីថ្ងៃទី១៧ តុលា ឆ្នាំ ១៩៦៧ ថាជាឧក្រិដ្ឋកម្មមិនអាចលើកលែងទោសឲ្យបាន។ តែស្រាប់នៅក្នុងខែតុលា ឆ្នាំ ២០២១ លោកម៉ាក្រុងបានបញ្ឆេះកំហឹងពលរដ្ឋអាល់ហ្សេរីដោយបានស្តីពីបន្ទោសលើប្រព័ន្ធនយោបាយ យោធាអាល់ហ្សេរីដែលបន្តយកការចងចាំ និងការឈឺចាប់ក្នុងសម័យអាណានិគមធ្វើជាអាជីវកម្មនយោបាយ និងថែមទាំងចោទសួរពីវត្តមានរដ្ឋអាល់ហ្សេរីនៅមុនបារាំងធ្វើអាណានិគម។
តែក្រោយមក ការស្តីបន្ទោសដូចនេះត្រូវបានលោកម៉ាក្រុងសម្តែងការសោកស្តាយ។ ទោះជាយ៉ាងនេះក្តី អ្វីៗហាក់មិនបាន ឬមិនទាន់អាចលុបបំបាត់រឿងរ៉ាវសល់ពីអតីតកាលបានឡើយ។ ពាក្យសុំទោសដែលប្រទេស និងប្រជាជនអាល់ហ្សេរីបានរង់ចាំ និងកំពុងរង់ចាំនៅមិនទាន់មានទេមកទល់ពេលនេះ។ ដូច្នេះ ការដែលបារាំង និងអាល់ហ្សេរីអាចផ្សះផ្សាគ្នា និងទុករឿងអតីតកាលចោលបាន ឬមិនបាននឹងអាស្រ័យទាំងស្រុងលើឆន្ទៈរបស់ប្រទេសទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ