អាល់ហ្សេរីប្រកាសបិទដែនអាកាសមិនឱ្យយន្តហោះយោធាបារាំងហោះឆ្លងកាត់
បន្ទាប់ពីបានកោះហៅឯកអគ្គរដ្ឋទូតអាល់ហ្សេរីប្រចាំទីក្រុងប៉ារីស ឱ្យត្រលប់ចូលប្រទេសវិញ ដើម្បីសម្តែងការប្រឆាំងនឹងបារាំងមក អាល់ហ្សេរីបានចេញបម្រាមហាមឃាត់មិនឱ្យយន្តហោះយោធាបារាំង ហោះហើរឆ្លងកាត់ដែនអាកាសអាល់ហ្សេរី ដូចទម្លាប់ទៀតទេ។ នេះបើតាមការបញ្ជាក់របស់អ្នកនាំពាក្យទីបញ្ជាការដ្ឋានកងទ័ពបារាំង។ ហេតុអ្វីបានជាទំនាក់ទំនងបារាំង-អាល់ហ្សេរីធ្លាក់ដល់កំរិតនេះ ?
ចុះផ្សាយនៅថ្ងៃ៖
ស្តាប់ - ០២:១៥
តាំងពីព្រឹកថ្ងៃអាទិត្យទី៣ តុលាមក យន្តហោះយោធាបារាំង ដែលហោះសំដៅទៅ និងហោះមកពីតំបន់សាហ៊ែល ក្នុងក្របខ័ណ្ឌប្រតិបត្តិការបារខាន Barkhane ប្រយុទ្ធប្រឆាំងនឹងពួកជីហាតនៅតំបន់សាហ៊ែល មិនអាចឆ្លងកាត់ដែនអាកាសអាល់ហ្សេរីដូចទម្លាប់បានទេ។ អាល់ហ្សេរីបានសម្រេចបិទព្រំដែនអាកាស ដោយពុំបានជូនដំណឹងអ្វីជាផ្លូវការដល់យោធាបារាំងឡើយ។ នេះបើតាមប្រសាសន៍របស់វរសេនីយឯកPascal Ianni ដោយគូសបញ្ជាក់បន្ថែមថា ការបិទព្រំដែនអាកាសនេះបានធ្វើឱ្យរំខានចរន្តហោះហើរបន្តិចបន្តួច ដោយត្រូវសម្របសម្រួលផែនការហោះហើរខ្លះ ប៉ុន្តែមិនប៉ះពាល់ដល់ប្រតិបត្តិការដឹកជញ្ជូនភស្តុភារ និងបេសកកម្មស៊ើបអង្កេតរបស់យោធាបារាំងនៅតំបន់សាហ៊ែលទេ។ បារាំងពេលនេះកំពុងរៀបចំចាកចេញពីមូលដ្ឋានយោធានៅតំបន់សាហ៊ែលភាគខាងជើងប្រទេសម៉ាលីនិងកំពុងរៀបចំកាត់បន្ថយកងទ័ពពាក់កណ្តាល នៅឆ្នាំ២០២៣។
ទង្វើរបស់អាល់ហ្សេរីចំពោះយោធាបារាំង បានកើតឡើងបន្ទាប់ពីអាល់ហ្សេបានកោះហៅឯកអគ្គរដ្ឋទូតអាល់ហ្សេរីប្រចាំទីក្រុងបារីសឱ្យត្រលប់ចូលស្រុកកំណើតវិញ ដើម្បីបញ្ជាក់អំពីជំហរប្រឆាំងនឹងបារាំង។
ទំនាក់ទំនងបារាំង-អាល់ហ្សេរីធ្លាក់ដុនដាបដល់កំរិតនេះ បើតាមសារព័ត៌មានក្នុងស្រុកអាល់ហ្សេរី បណ្តាលមកពីមូលហេតុពីរយ៉ាង ទាក់ទងនឹងការប្រកាសជំហររបស់លោកប្រធានាធិបតីបារាំង អេម៉ានុយអែល ម៉ាក្រុង ៖ ទីមួយ កាលពីថ្ងៃអង្គារទី ២៨កញ្ញា លោកប្រធានាធិបតីបានប្រកាសកាត់បន្ថយការផ្តល់ទិដ្ឋាការដល់ពលរដ្ឋអាល់ហ្សេរី ម៉ារ៉ុក និងទុយនីស៊ីចំនួនពាក់កណ្តាល ព្រោះអាល់ហ្សេរីមិនព្រមចេញលិខិតធ្វើដំណើរបណ្តោះឱ្យជនអន្តោប្រវេសន៍អាល់ហ្សេរីខុសច្បាប់ដែលបារាំងត្រូវបញ្ជូនត្រលប់ចូលស្រុកវិញ។ ដោយមិនបង្អង់ក្រសួងការបរទេសអាល់ហ្សេរីបានកោះហៅឯកអគ្គរដ្ឋទូតបារាំងប្រចាំក្រុងអាល់ហ្សេ ចូលបំភ្លឺម្តងរួចហើយ។
ហើយកាន់តែធ្ងន់ធ្ងរទៀត គឺជំនួបរវាងប្រធានាធិបតីបារាំងជាមួយកូនចៅយុទ្ធជនHarki (កងស្វ័យត្រាណអាល់ហ្សេរីបំរើឱ្យយោធាបារាំង) និងអ្នកធ្វើមាតុភូមិនិវត្តន៍អាល់ហ្សេរី នៅថ្ងៃព្រហស្បតិ៍ទី ៣០កញ្ញា។ បើតាមការចុះផ្សាយរបស់កាសែតឡឺម៉ុង លោកម៉ាក្រុងបាននិយាយទាក់ទងនឹងសង្គ្រាមនៅអាល់ហ្សេរី (ពីឆ្នាំ១៩៥៤-១៩៦២) ប្រវត្តិសាស្ត្រផ្លូវការរបស់អាល់ហ្សេរីត្រូវបានសរសេរតាក់តែងឡើងវិញដោយផ្អែកលើគំនិតស្អប់ខ្ពើមបារាំង និងស្ថាបនាប្រទេសឡើងវិញដោយឈរលើប្រព័ន្ធនយោបាយយោធា ដែលកំពុងទ្រុឌទ្រោមនាពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ