បារាំង-អាល់ហ្សេរី៖លោកអេម៉ានុយអែល ម៉ាក្រុងថា អាណានិគមកិច្ចជាឧក្រិដ្ឋកម្មប្រឆាំងមនុស្សជាតិ
នៅក្នុងប្រទេសបារាំង លោកអេម៉ានុយអែល ម៉ាក្រុង ប្រធានចលនា « ដើរទៅមុខ » និងជាបេក្ខជនប្រធានាធិបតីបានថ្លែងនាឱកាសដំណើរទស្សនកិច្ចក្នុងប្រទេសអាល់ហ្សេរីក្នុងថ្ងៃពុធ ទី១៥ កុម្ភៈថា អាណានិគមកិច្ចរបស់បារាំងលើអាល់ហ្សេរី គឺជាឧក្រិដ្ឋកម្មប្រឆាំងមនុស្សជាតិ និងថា បារាំងគួរតែសម្តែងការសុំទោសចំពោះពលរដ្ឋអាល់ហ្សេរី។ ការថ្លែងរបស់លោកម៉ាក្រុងដូចនេះបានបំផុសឲ្យមានប្រតិកម្មបរិហារពីក្រុមអ្នកនយោបាយបារាំង ពិសេសពីគណបក្សស្តាំនិយម និងគណបក្សស្តាំនិយមជ្រុល។
ចុះផ្សាយនៅថ្ងៃ៖
ស្តាប់ - ០២:២៥
ក្នុងរយៈពេល ១៣២ឆ្នាំ ពោលពីឆ្នាំ ១៨៣០ ដល់ឆ្នាំ ១៩៦២ ដែលបារាំងបានធ្វើអាណានិគមលើប្រទេសអាល់ហ្សេរី។ តែគេមិនត្រូវភ្លេចនិយាយទេថា ក្រោយអាល់ហ្សេរីទទួលបានឯករាជ្យក្នុងឆ្នាំ ១៩៦២ មក ទំនាក់ទំនងរវាងទីក្រុងប៉ារីស និងទីក្រុងអាល់ហ្សេមិនសូវជាល្អូកល្អឺនប៉ុន្មានទេ។ មិនល្អូកល្អឺនក៏ដោយសារមានបន្សល់ទុកដោយស្នាមរបួសនៅក្នុងអតីតកាលដ៏ល្វីងជូរចត់មួយចំនួន។ នៅខាងបារាំង ប្រធានាធិបតីចេញមកពីគ្រប់និន្នាការនយោបាយតែងតែព្យាយាមព្យាបាល និងផ្សះផ្សារបួសស្នាមក្នុងអតីតកាលមួយនេះតាមគ្រប់រូបភាព។ ក៏ប៉ុន្តែ គ្មានប្រធានាធិបតីរូបណាចេញមុខទទួលស្គាល់ការពិត និងចេញមុខសុំទោសពលរដ្ឋអាល់ហ្សេរីជាផ្លូវការទេ។
ជាក់ស្តែងនាដំណើរទស្សនកិច្ចរបស់លោកប្រធានាធិបតីបារាំងហ្រ្វង់ស័រ ហូឡង់នៅអាល់ហ្សេរីក្នុងឆ្នាំ ២០១២ លោកហូឡង់បានប្រកាសពីការបើកទំព័រសករាជថ្មីនៃទំនាក់ទំនងរវាងបារាំង និងអាល់ហ្សេរី និងចង់និយាយការពិតប្រាប់ពលរដ្ឋអាល់ហ្សេរី តែបដិសេធមិនសម្តែងការសុំទោសចំពោះពលរដ្ឋអាល់ហ្សេរីទេ។ ដូច្នេះគេអាចនិយាយបានថា នេះជាលើកទី១ បង្អស់ដែលមានឥស្សរជននយោបាយបារាំង និងជាបេក្ខជនប្រធានាធិបតីម្នាក់គឺលោកអេម៉ានុយអែល ម៉ាក្រុងហ៊ានចេញមុខនិយាយជាសាធារណៈថា អាណានិគមកិច្ចបារាំងលើអាល់ហ្សេរី ជាឧក្រិដ្ឋកម្មប្រឆាំងមនុស្សជាតិ។
លោកម៉ាក្រុងបានថ្លែងយ៉ាងដូចនេះនៅក្នុងទូរទស្សន៍អាល់ហ្សរីនាឱកាសទស្សនកិច្ចក្នុងទឹកដីអាល់ហ្សេរីកាលពីថ្ងៃពុធ ទី១៥ កុម្ភៈ។ លោកម៉ាក្រុងបានបន្ថែមថានៅក្នុងសម័យអាណានិគម មានបទឧក្រិដ្ឋគួរឲ្យរន្ធត់ មានការធ្វើទារុណកម្ម និងមានទង្វើឃោរឃៅព្រៃផ្សៃជាច្រើនទៀត និងបានស្នើបារាំងឲ្យទទួលស្គាល់ការពិត និងធ្វើការសុំទោសជាផ្លូវការចំពោះពលរដ្ឋអាល់ហ្សេរី។ ខណៈនេះ ការថ្លែងរបស់លោកម៉ាក្រុងបានបំផុសឲ្យមានប្រតិកម្មបរិហារខ្លាំងៗពីក្រុមអ្នកនយោបាយបារាំង ពិសេសពីគណបក្សស្តាំនិយម និងគណបក្សស្តាំនិយមជ្រុលដែលចោទលោកម៉ាក្រុងពីបទប្រមាថប្រទេសបារាំង។
លោកហ្រ្វង់ស័រ ហ្វីយ៉ុង បេក្ខជនប្រធានាធិបតីមកពីគណបក្សស្តាំនិយមបានវាយតម្លែថា សម្តីរបស់លោកម៉ាក្រុងរបៀបនេះមិនសក្តិសម និងមិនថ្លៃថ្នូរជាបេក្ខជនប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ