មេរោគបំបែងខ្លួនថ្មី « អូមីក្រុង » បានទម្លាយអត្តសញ្ញាណខ្លះ តែភាពស្រពិចស្រពិលកំពុងបន្តមាន
ចុះផ្សាយនៅថ្ងៃ៖
ស្តាប់ - ០៦:៤២
នៅថ្ងៃពុធ ទី៨ ធ្នូ អង្គការសុខភាពពិភពលោក WHO បានធ្វើបច្ចុប្បន្នភាពលើមេរោគបំបែងខ្លួនថ្មី « អូមីក្រុង »។ តាម WHO « អូមីក្រុង » ហាក់មានអត្រាឆ្លងខ្ពស់លើអ្នកដែលធ្លាប់ឆ្លងកូវីដ១៩ រួចហើយ។ តែទន្ទឹមគ្នានេះ « អូមីក្រុង » មិនបានបង្កឲ្យមានរោគសញ្ញាធ្ងន់ធ្ងរទេ។ ទាក់ទងនឹងវ៉ាក់សាំងវិញ មន្ទីរពិសោធន៍ Pfizer/BioNTech បានធានាថា វ៉ាក់សាំងរបស់ខ្លួនមានប្រសិទ្ធិភាពទល់នឹងនឹង « អូមីក្រុង » និងមានប្រសិទ្ធិភាពកាន់តែខ្ពស់ បន្ទាប់ពីបានចាក់ដូសទី៣ ឬដូសជំរុញ។
គេអាចនិយាយបានទេថា ទិន្នន័យថ្មីៗចុងក្រោយទាក់ទងនឹងអូមីក្រុងនេះបានធ្វើឲ្យពិភពលោកកក់ក្តៅ លែងសូវបារម្ភ និងធូរស្រាលបន្តិច។ តែគេក៏មិនត្រូវមានសុទិដ្ឋនិយមខ្លាំងពេកដែរ។ តាមប្រមុខអង្គការសុខភាពពិភពលោក WHO លោកទេដ្រូស ដំណឹងថ្មី និងទិន្នន័យថ្មីស្តីពីអូមីក្រុងបានមកពីអាហ្រ្វិកខាងត្បូងដែលជាប្រទេសប្រភពដើមនៃមេរោគបំបែងខ្លួនថ្មី « អូមីក្រុង »។ គួររម្លឹកថា មេរោគបំប្លែងខ្លួនថ្មីមួយនេះត្រូវបានអាហ្រ្វិកខាងត្បូងប្រកាសប្រាប់ពិភពលោកជាសាធារណៈកាលពីថ្ងៃទី២៤ វិច្ឆិកា។
លទ្ធផលនៃការសិក្សាថ្មីបឋមមកពីអាហ្រ្វិកខាងត្បូងបានឲ្យដឹង ២ចំណុចសំខាន់ ទី១ « អូមីក្រុង » ហាក់មានអត្រាឆ្លងខ្ពស់លើអ្នកដែលធ្លាប់ឆ្លងកូវីដ១៩ រួច និងអ្នកដែលបានចាក់វ៉ាក់សាំងរួច ហើយចំណុចសំខាន់ទី២ « អូមីក្រុង » ហាក់មិនបានបង្កឲ្យមានរោគសញ្ញាធ្ងន់ធ្ងរដូចមេរោគបំប្លែងខ្លួន « ដែលតា » ទេ។ តែលោកទេដ្រូសបានសំណូមពរមានការប្រយ័ត្នប្រយែងខ្លាំងដោយបញ្ជាក់ថា ការស្រាវជ្រាវស៊ីជម្រៅបន្ថែមទៀតជារឿងចាំបាច់ មុននឹងអាចទាញចេញនូវសេចក្តីសន្និដ្ឋានមួយ។
តាមពិត លទ្ធផលនៃការសិក្សាថ្មីបឋមមកពីអាហ្រ្វិកខាងត្បូងពេលនេះក៏មិនសូវគ្នាប៉ុន្មាននឹងការសង្កេតជាលក្ខណៈទូទៅដែរ។ មជ្ឈមណ្ឌលបង្ការ និងគ្រប់គ្រងជំងឺឆ្លងអឺរ៉ុបបានសម្គាល់ឃើញថាពេលនេះ អត្រាឆ្លងរបស់អូមីក្រុងហាក់មានល្បឿនលឿន តែហាក់មិនបង្កគ្រោះថ្នាក់ធ្ងន់ធ្ងរ ព្រោះអ្នកឆ្លងអូមីក្រុងច្រើនជាអ្នកគ្មានលេចរោគសញ្ញា ឬមួយក៏មានរោគសញ្ញាតិចតួច។ ចំណែកលោកអង់តូនី ហ្វូស៊ី ទីប្រឹក្សាសុខាភិបាលរបស់ប្រធានាធិបតីអាមេរិកហ៊ានបញ្ជាក់ច្បាស់ៗថា អូមីក្រុងមិនធ្ងន់ធ្ងរជាងដែលតា និងអាចមានគ្រោះថ្នាក់តិចជាងដែលតា។ តើអូមីក្រុងគ្រោះថ្នាក់ជាង ឬមិនគ្រោះថ្នាក់ជាងដែលតា?។ អត់ទាន់មានចម្លើយច្បាស់ទេនៅពេលនេះ។
តើអូមីក្រុងអាចនឹងចូលជំនួសកន្លែងដែលតាឬទេ?
គេនៅមិនទាន់មានចម្លើយមួយច្បាស់ចំពោះសំណួរនេះទេ។ គួររម្លឹកបន្តិចថា ជិត ២ឆ្នាំក្រោយផ្ទុះជំងឺកូវីដ១៩ ពីប្រទេសចិន ពិភពលោកបានស្គាល់មេរោគបំប្លែងខ្លួនមួយចំនួន ដូចជាបេតា អាល់ហ្វា ឬមួយក៏ដែលតា។ តែសព្វថ្ងៃនេះ មានតែដែលតាមួយគត់ដែលកំពុងឆ្លងខ្លាំង និងកំពុងបង្កគ្រោះថ្នាក់ខ្លាំង។ កំណើនករណីឆ្លងថ្មី កំណើនចំនួនអ្នកចូលមន្ទីរពេទ្យ និងកំណើនចំនួនអ្នកស្លាប់ដែលប្រទេសមួយចំនួន ពិសេសអឺរ៉ុបកំពុងស្គាល់ពេលនេះ គឺបង្កឡើងដោយដែលតា ពោលមិនមែនអូមីក្រុងទេ។
តែគេបានសង្កេតឃើញថា អូមីក្រុងដែលទើបលេចរូបរាងជាង ១០ថ្ងៃមុនសោះហាក់កំពុងឆ្លងចូលប្រទេសកាន់តែច្រើន និងមានប្រទេសខ្លះកំពុងស្គាល់កំណើនករណីឆ្លងដោយអូមីក្រុងគួរឲ្យចាប់អារម្មណ៍។ នៅអាហ្រ្វិកខាងត្បូងដែលជាប្រទេសប្រភពអូមីក្រុង អូមីក្រុងកំពុងគ្របដណ្តប់ខ្លាំង ព្រោះនៅក្នុងចំនួនករណីឆ្លងថ្មី មានជាង ៩០% ជាអូមីក្រុង។ ដូច្នេះ និន្នាការនៅអាហ្រ្វិកខាងត្បូងពេលនេះប្រហែលជាមាននៅក្នុងប្រទេសផ្សេងទៀតដោយមិនអាចគេចផុតទេ។ គ្រាន់តែថានៅពេលនេះ អ្នកឆ្លងអូមីក្រុងខ្លះមិនធ្លាក់ឈឺធ្ងន់ធ្ងរ ខ្លះគ្មានរោគសញ្ញា ឬមានរោគសញ្ញាតិចតួច និងពិសេសទៀតនៅពេលនេះ អូមីក្រុងមិនទាន់បានផ្តាច់ជីវិតមនុស្សម្នាក់ទេ។
ប្រសិទ្ធិភាពវ៉ាក់សាំងចោទជាបញ្ហា?
នៅពេលដែលគេនិយាយពីវ៉ាក់សាំង គឺគេចង់ផ្តោតសំខាន់លើវិធានការបង្ការការពារកុំឲ្យឆ្លងមេរោគ។ តែអ្វីដែលគេបានសង្កេតឃើញចំពោះជំងឺកូវីដ១៩ ឬកូវីដ១៩ បំប្លែងខ្លួនពេលនេះ ការចាក់វ៉ាក់សាំងរួចហើយក៏នៅតែឆ្លង ទោះចាក់បានចំនួន ២ដូសក៏ដោយ។ គ្រាន់តែថា អ្នកដែលចាក់វ៉ាក់សាំងរួច និងបានឆ្លងកូវីដ១៩មិនធ្លាក់ខ្លួនឈឺធ្ងន់ធ្ងររហូតចូលពេទ្យ ឬស្លាប់។ ជាមួយអូមីក្រុងជារឿងមួយផ្សេងទៀត ព្រោះជាមេរោគបំប្លែងខ្លួនថ្មីថ្មោង ហើយវ៉ាក់សាំងដែលពិភពលោកមានសព្វថ្ងៃក៏មិនបានត្រៀមដើម្បីបង្ការវាដែរ។
វិទ្យាស្ថានស្រាវជ្រាវសុខភាពនៅអាហ្រ្វិកខាងត្បូងបានបង្ហាញលទ្ធផលនៃការសិក្សាដំបូងលើវ៉ាក់សាំង Pfizer ដោយបញ្ជាក់ថា វ៉ាក់សាំង Pfizer បាត់បង់ប្រសិទ្ធិភាពប្រឈមនឹងអូមីក្រុង។ តែមន្ទីរពិសោធន៍ Pfizer/BioNTech បានព្យាយាមអះអាងក្នុងថ្ងៃពុធ ទី៨ ធ្នូថា ប្រសិទ្ធិភាពវ៉ាក់សាំងរបស់ខ្លួនមានប្រសិទ្ធិភាពទល់នឹងអូមីក្រុង មិនមានកម្រិតប្រសិទ្ធិភាពកាន់តែខ្ពស់បន្ទាប់ពីបានចាក់ដូសទី៣ មានន័យថា បើចាក់បានត្រឹមតែ ២ដូសនៅមិនទាន់គ្រប់គ្រាន់ទេ។
ការលើកឡើងរបស់ Pfizer/BioNTech ក៏ជាការយល់ឃើញរបស់អង្គការសុខភាពពិភពលោក គ្រូពេទ្យជំងឺឆ្លងនៅអាមេរិក និងលោកអង់តូនី ហ្វូស៊ីដែលជាទីប្រឹក្សាសុខាភិបាលរបស់ប្រធានាធិបតីអាមេរិកដែរ។ ក្នុងពេលជាមួយគ្នា Pfizer/BioNTech បានប្រាប់ឲ្យដឹងពីការធ្វើបច្ចុប្បន្នភាពវ៉ាក់សាំងរបស់ខ្លួនសម្រាប់ទប់នឹងអូមីក្រុងដែលអាចចេញនៅខែមីនា ឆ្នាំ ២០២២។ សរុបវិញ ទោះបីជាគេបានដឹងបន្ថែមពីអត្តសញ្ញាណរបស់អូមីក្រុងក៏ដោយក៏មេរោគបំប្លែងខ្លួនថ្មីមួយនេះកំពុងបន្តបង្កប់នូវអាថ៌កំបាំងច្រើនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ