IMF ព្រមានថាអូមីក្រុងនឹងធ្វើឲ្យកំណើនសេដ្ឋកិច្ចពិភពលោកធ្លាក់ចុះ
ខណៈមេរោគបំប្លែងខ្លួនថ្មីអូមីក្រុងកំពុងរាលដាលនៅជុំវិញពិភពលោក ប្រធានមូលនិធិរូបិយវត្ថុអន្តរជាតិ (IMF) បាននិយាយកាលពីថ្ងៃសុក្រ ទី៣ ធ្នូម្សិលមិញថាអូមីក្រុងអាចពន្យឺតការស្ទុះងើបឡើងវិញនៃសេដ្ឋកិច្ចសកលដូចគ្នានឹងមេរោគដែលតាដែរ។
ចុះផ្សាយនៅថ្ងៃ៖
ស្តាប់ - ០២:២៤
មេរោគបំប្លែងខ្លួនអូមីក្រុងដែលទំនងជាឆ្លងរាលដាលខ្លាំងអាចធ្វើឲ្យសេដ្ឋកិច្ចសកលរងផលប៉ះពាល់។ បើតាមប្រធានមូលនិធិរូបិយវត្ថុអន្តរជាតិ IMF អ្នកស្រី គ្រីស្តាលីណា ចរជៀវ៉ា (Kristalina Georgieva) ដោយសារតែវត្តមានរបស់អូមីក្រុង សន្ទស្សន៍ព្យាករណ៍នៃកំណើនសេដ្ឋកិច្ចសកលត្រូវបានទម្លាក់ចំណាត់ថ្នាក់។
នៅក្នុងទស្សនវិស័យសេដ្ឋកិច្ចពិភពលោកថ្មីចុងក្រោយនេះ IMF បានព្យាករថាកំណើនសេដ្ឋកិច្ចសកលមានចំនួន ៥,៩ % នៅឆ្នាំ២០២១នេះ និងមានចំនួន ៤,៩ % នៅឆ្នាំ ២០២២។
ប្រធាន IMF បានលើកឡើងថាតាំងតែពីមុនពេលការមកដល់នៃមេរោគបំប្លែងខ្លួនថ្មីអូមីក្រុង គេមានការព្រួយបារម្ភរួចទៅហើយពីការងើបឡើងវិញនៃសេដ្ឋកិច្ចពិភពលោក ដោយសារតែប្រទេសជាច្រើនត្រូវប្រឈមនឹងបញ្ហាថ្មីៗមានដូចជាបញ្ហាអតិផរណាជាដើម។
ការព្យាករណ៍ចុងក្រោយរបស់ IMF បានបង្កើនការព្រួយបារម្ភថាបញ្ហាខ្សែសង្វាក់ផ្គត់ផ្គង់សកល និងការចែកចាយវ៉ាក់សាំងមិនស្មើគ្នាធ្វើឲ្យការស្ទុះងើបឡើងវិញនៃសេដ្ឋកិច្ចយឺតយ៉ាវ ហើយបណ្តាលឲ្យប្រទេសមួយចំនួនត្រូវគេទុកចោល ឬក៏បោះបង់ចោល។
ដោយឡែកកាលពីថ្ងៃព្រហស្បតិ៍ ទី២ ធ្នូ IMF ក៏បានជំរុញផងដែរឲ្យក្រុមប្រទេសដែលមានសេដ្ឋកិច្ចជឿនលឿនទាំង២០ (G20) ពង្រីក និងកែលម្អគំនិតផ្តួចផ្តើមនូវការបន្ធូរបន្ធយប្រាក់បំណុលរបស់ពួកគេ ដោយទាញសញ្ញាអាសន្នថាប្រទេស ជាច្រើនប្រឈមមុខនឹងវិបត្តិធ្ងន់ធ្ងរបើគ្មានជំនួយទេសង្គ្រោះនោះ។
ប្រធាន IMF មិនបានបញ្ជាក់ថាតើប្រទេសណាដែលមានសេដ្ឋកិច្ចប្រឈមនឹងវិបត្តិធ្ងន់ធ្ងរនោះ ប៉ុន្តែអ្នកស្រីគ្រាន់តែនិយាយជារួមដោយសំដៅទៅប្រទេសដែលមានចំណូលទាប។
ប្រទេសមួយចំនួននឹងជួបគ្រោះដួលរលំសេដ្ឋកិច្ចលុះត្រាណាតែក្រុមប្រទេសម្ចាស់បំណុល G20 បន្ធូរបន្ធយបំណុលដោយយល់ព្រមពន្លឿនការរៀបចំរចនាសម្ព័ន្ធបំណុលនិងផ្អាកសេវាបំណុល នៅខណៈពេលដែលការរៀបចំរចនាសម្ព័ន្ធឡើងវិញកំពុងត្រូវបានចរចា។ អ្នកស្រីប្រធានមូលនិធិរូបិយវត្ថុIMF បានបន្ថែម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ