របាយការណ៍៖ ទាហានតាលីបង់ដើរគោះតាមផ្ទះ ដើម្បីតាមប្រមាញ់រកអ្នកដែលធ្លាប់ធ្វើការឲ្យកម្លាំងបរទេស
ចុះផ្សាយនៅថ្ងៃ៖
ស្តាប់ - ០៩:២០
នៅអាហ្វហ្កានីស្ថាន ជនជាតិអាមេរិកាំង ជនជាតិអាហ្វហ្កានីស្ថាន និងជនបរទេស រាប់ម៉ឺននាក់ កំពុង នៅជាប់ កកកុញ ក្នុង និងក្រៅព្រលានយន្តហោះ ការហ្សៃ ដែលជាច្រកចេញតែមួយគត់ពីអាហ្វហ្កានីស្ថាន ដែលបានធ្លាក់ក្នុងកណ្តាប់ដៃគ្រប់គ្រងរបស់ក្រុមតាលីបង់ តាំងពីថ្ងៃអាទិត្យទី ១៥សីហា ២០២១។ នៅថ្ងៃសុក្រ ទី ២០សីហា អង្គការអូតង់បាននិយាយថា មនុស្សជាង ១៨០០០នាក់ ត្រូវបានដឹកចេញពីព្រលានយន្តហោះក្នុងក្រុងកាប៊ូល ក្នុងរយៈពេល ៥ថ្ងៃមកនេះ។ ប្រតិបត្តិការជម្លៀសបន្ទាន់ ជនជាតិបរទេស និងជនជាតិអាហ្វហ្កានីស្ថានដែលធ្លាប់ធ្វើការជាមួយកងកម្លាំងបរទេស ធ្វើឡើង នៅខណៈដែលរបាយការណ៍របស់អង្គការសហប្រជាជាតិ បានបង្ហាញថា ក្រុមតាលីបង់កំពុងដើរគោះទ្វារ ពីផ្ទះមួយ ទៅផ្ទះមួយ ដើម្បីតាមរកមុខបុគ្គលដែលធ្លាប់ធ្វើការឲ្យកងកម្លាំងបរទេស។
សេតវិមាននិយាយនៅថ្ងៃព្រហស្បតិ៍ទី ១៩សីហាថា មនុស្សជាង ៩ពាន់នាក់ ត្រូវបានជម្លៀសចេញពីអាហ្វហ្កានីស្ថាន តាំងពីថ្ងៃទី ១៤សីហា ចំណែក មនុស្សជាង ៦ពាន់នាក់ បានឆ្លងកាត់ការត្រួតពិនិត្យ ឯកសារគ្រប់គ្រាន់ និងរង់ចាំតែធ្វើដំណើរតាមយន្តហោះ យ៉ាងយូរនៅថ្ងៃសុក្រទី ២០ខែសីហា។ នៅពេលថ្ងៃកំណត់ចាកចេញរបស់កងទ័ពអាមេរិក ពីអាហ្វហ្កានីស្ថាន កាន់តែកៀក ប្រជាជនអាហ្វហ្កានីស្ថាន រាប់ម៉ឺននាក់ បានសម្រុកទៅព្រលានយន្តហោះ ក្នុងក្តីសង្ឃឹមគេចចេញពីក្រោមការដឹកនាំរបស់ក្រុមតាលីបង់។ នៅពីរថ្ងៃក្រោយចូលកាន់កាប់ទីក្រុងកាប៊ូល អ្នកនាំពាក្យរបស់ក្រុមតាលីបង់ បានធ្វើសន្និសីទកាសែត ដែលនៅក្នុងនោះ ក្រុមតាលីបង់បានសន្យាថា របបតាលីបង់នឹងមិនសងសឹកអ្នកដែលធ្លាប់ធ្វើការឲ្យបរទេស នោះទេ។ ប៉ុន្តែ របាយការណ៍មួយ របស់អង្គការសហប្រជាជាតិបានបង្ហាញផ្ទុយពីនេះ។ នោះគឺ ទាហាន តាលីបង់ បានដើរគោះទ្វារ ពីផ្ទះមួយ ទៅផ្ទះមួយ ដើម្បីតាមរកមុខ អ្នកដែលធ្លាប់ធ្វើការជាមួយកងកម្លាំងបរទេស។
តើក្រុមតាលីបង់ កំពុងបង្ហាញធ្មុង សារជាតិពិត នៃចរិតឃោរឃៅរបស់ខ្លួន?
សណ្តាន ឆ្កែកន្ទុយខ្វៀន នៅតែខ្វៀន គ្មានថ្ងៃលាតឲ្យត្រង់វិញទេ។ យ៉ាងណាមិញ ក្រុមតាលីបង់ក៏ដូចគ្នា។ ក្រុមតាលីបង់ ធ្លាប់ដឹកនាំប្រទេស ផ្តាច់ការ បំបិទសិទ្ធិសេរីភាពប្រជាជន និងផ្តន្ទាទោសមនុស្ស តាមវិធីសាស្រ្តព្រៃផ្សៃ ដោយគប់ដុំថ្ម ជាដើម។ ជនជាតិភាគតិច និងមនុស្សស្រី រងការធ្វើបាបខ្លាំងជាងគេ នៅក្នុងជំនាន់ គ្រប់គ្រងរបស់ពួកតាលីបង់ នៅអាហ្វហ្កានីស្ថាន ពីឆ្នាំ ១៩៩៦ ដល់ឆ្នាំ ២០០១។ ប៉ុន្តែ នៅពេលវាយឈ្នះសង្រ្គាម ត្រលប់មកគ្រប់គ្រង អាហ្វហ្កានីស្ថាន ថ្នាក់ដឹកនាំតាលីបង់បានប្រឹងបង្ហាញសហគមន៍អន្តរជាតិថា នៅ២០ឆ្នាំក្រោយ ក្រុមតាលីបង់បានផ្លាស់ប្តូរ លែងដឹកនាំប្រទេសតឹងរ៉ឹងដូចមុន ចំណែកអ្នកនាំពាក្យក៏ទើបអះអាងថា របបដឹកនាំតាលីបង់ថ្មី នឹងមិនសងសឹកអ្នកដែលធ្លាប់ធ្វើការឲ្យរដ្ឋាភិបាលចាស់ ឬអ្នកដែលធ្វើការឲ្យកងកម្លាំងបរទេសនោះទេ។ អ្នកនាំពាក្យតាលីបង់នៅបានសង្កត់ធ្ងន់ថា នឹងគ្មានទាហានតាលីបង់ណាម្នាក់ដែលទៅគោះទ្វារផ្ទះរបស់ប្រជាជនអាហ្វហ្កានីស្ថានដើម្បីសួរថា ហេតុអ្វីបានជាពួកគេធ្វើការជួយកម្លាំងបរទេសនោះទេ។
ប៉ុន្តែ ការនិយាយធានារបស់ថ្នាក់ដឹកនាំ តាលីបង់ វាខុសផ្ទុយស្រឡះ ពីសកម្មភាពធ្វើជាក់ស្តែង របស់ទាហានតាលីបង់។ កន្លងមក ពាក្យសន្យាធានា របស់ក្រុមតាលីបង់មិនបានធ្វើឲ្យប្រទេសលោកខាងលិច ជាពិសេស ប្រជាជនអាហ្វហ្កានីស្ថានជឿទុកចិត្តនោះទេ។ របាយការណ៍ពិសេស របស់មជ្ឈមណ្ឌល ន័រវែស សម្រាប់ ការវិភាគសកល ដែលកុម្មង់ឡើងដោយអង្គការសហប្រជាជាតិ បានបង្ហាញកាន់តែច្បាស់ថា ពួកតាលីបង់និយាយផ្សេង និងធ្វើផ្សឹង។ របាយការណ៍សម្រាប់អង្គការសហប្រជាជាតិ ដែលប្រព័ន្ធផ្សព្វផ្សាយបរទេសបានទទួលអាន នៅថ្ងៃព្រហស្បតិ៍ទី១៩សីហា បានបង្ហាញថា ក្រុមតាលីបង់បានបញ្ចេញសារជាតិពិតរបស់ខ្លួន ដោយមិនព្រមលះបង់ចោល ចរិត ឃោរឃៅ សម្លាប់សងសឹកអ្នកដែលក្រុមនេះបានចោទថា ជាអ្នកសហការជាមួយជនបរទេសនោះទេ។
តាមលោកChristian Nellemann ប្រធានក្រុមដឹកនាំសរសេរ របាយការណ៍ខាងលើ មានមនុស្សមួយចំនួនធំដែលស្ថិតក្នុងបញ្ជីឈ្មោះ តាមចាប់ខ្លួនរបស់ពួកតាលីបង់។ រហូតមកដល់ពេលនេះ ក្រុមតាលីតាបង់តាមរកមុខ អ្នកដែលមិនព្រម ចុះចូលជាមួយខ្លួន។ ដោយគោះទ្វារ ពីផ្ទះមួយ ទៅផ្ទះមួយ ទាហានតាលីបង់ បានចាប់ខ្លួន សម្លាប់ភ្លាមៗ ឬធ្វើទារុណកម្មសួរចម្លើយសមាជិកគ្រួសាររបស់បុគ្គល ដែលក្រុមតាលីបង់តាមចាប់ខ្លួន។ សម្រាប់ ប្រធានក្រុមសរសេររបាយការណ៍ របស់វិទ្យសា្ថន ន័វែស បុគ្គលដែលមានឈ្មោះក្នុងក្រុមតាលីបង់ កំពុងប្រឈម នឹងគ្រោះថ្នាក់ធ្ងន់ធ្ងរ ហើយនឹងអាចកើតមានការសម្លាប់ជាទូទៅ។
នៅថ្ងៃព្រហស្បតិ៍ទី១៩សីហា ប្រជាជនអាហ្វហ្កានីស្ថានដែលខ្លាចក្រុមតាលីបង់សងសឹក ព្រោះតែខ្លួនធ្លាប់ធ្វើការជាមួយ ប្រទេសលោកខាងលិច នៅតែ ធ្វើដំណើរសំដៅ ព្រលានយន្តហោះ ក្នុងក្តីសង្ឃឹមចាកចេញពីអាហ្វហ្កានីស្ថាន ប៉ុន្តែ ត្រូវទាហានតាលីបង់ ចាប់កាក់ នៅច្រកទ្វារដែលបិទ លែងឲ្យចូលក្នុងព្រលានយន្តហោះ តទៅទៀត។
អ្នកណាខ្លះដែលជាផ្ទាំងស៊ីប តាមប្រមាញ់របស់ទាហានតាលីបង់?
តាមរបាយការណ៍ខាងលើ បុគ្គលដែលក្រុមតាលីបង់កំពុងតាមរកមុខ គឺជាជនជាតិអាហ្វហ្កានីស្ថានដែលធ្លាប់ធ្វើការឲ្យកងកម្លាំងបរទេស និងរដ្ឋាភិបាលចាស់។ ពួកគេទាំងនោះ អាចជាអ្នកបកប្រែ ឲ្យទាហានអាមេរិកាំង ទាហានអង្គការអូតង់ ជាអ្នកធ្វើការនៅស្ថានទូត បរទេស ជាប៉ូលិស ទាហានកុម្ម៉ង់ដូរពិសេស និងភ្នាក់ងារស៊ើបការសម្ងាត់ របស់រដ្ឋាភិបាលអាហ្វាហ្កានីស្ថាន ដែលមិនព្រម ចុះចូលជាមួយក្រុមតាលីបង់។
សម្រាប់អ្នកសរសេររបាយការណ៍ បើសិនក្រុមតាលីបង់ បានសម្រេច ចាប់ខ្លួនភ្នាក់ងារ ស៊ើបការណ៍សម្ងាត់អាហ្វហ្កានីស្ថាន នោះវានឹងគ្រោះថ្នាក់ ធ្ងន់ធ្ងរ សម្រាប់ បណ្តាញ ស៊ើបការណ៍សម្ងាត់របស់ក្រុមប្រទេស លោកខាងលិច ជាពិសេស ផែនការ យុទ្ធសាស្រ្តរបស់ប្រទេសលោកខាងលិច សម្រាប់ ប្រយុទ្ធប្រឆាំង នឹងក្រុមអាល់កៃដា ឬក្រុមជីហាតអង្គការរដ្ឋអ៊ីស្លាមជាដើម។
ដូចមន្រ្តីរដ្ឋាភិបាលចាស់ អ្នកបកប្រែ អាហ្វហ្កានីស្ថាន ជាក្រុមដែលទាហានតាលីបង់សំដៅរកមុខសងសឹកខ្លាំងណាស់ផងដែរ។ ពួកគេទាំងនេះ ត្រូវក្រុមតាលីបង់ ចោទ ដាក់រហស្សនាមថា ជាភ្នែក ត្រចៀក របស់ទាហានបរទេស ក្នុងសមរភូមិប្រយុទ្ធនឹងក្រុមតាលីបង់។ តាម អង្គការ No one left behind អ្នកបកប្រែ អាហ្វហ្កានីស្ថាន និងសមាជិកគ្រួសាររបស់ពួកគេប្រមាណ ៣០០នាក់ ហើយត្រូវបានក្រុមតាលីបង់សម្លាប់ ដោយសារតែមានទំនាក់ទំនងជាមួយអាមេរិក។
ក្រៅតែពីអ្នកបកប្រែ និងមន្រ្តីប៉ូលិសរបស់រដ្ឋាភិបាលមុន អ្នកកាសែត អាហ្វហ្កានីស្ថានក៏កំពុងធ្លាក់ក្នុងផ្ទាំងស៊ីបវាយប្រហាររបស់ពួកតាលីបង់ដែរ។ គណៈកម្មាធិការដើម្បីការពារអ្នកកាសែត នៅសប្តាហ៍នេះ ទាហានតាលីបង់បានចូលឆែកឆេរ ផ្ទះរបស់អ្នកកាសែត ៤នាក់ ចំណែក ២នាក់ ត្រូវទាហានតាលីបង់វាយធ្វើបាប នៅពេលចុះយកព័ត៌មានស្តីពីបាតុកម្ម នៅទីក្រុង Jalalabad។ ប្រព័ន្ធផ្សព្វផ្សាយអាល្លឺម៉ង់ Deutsche Welle បាននិយាយនៅថ្ងៃព្រហស្បតិ៍ទី១៩សីហាថា ទាហានតាលីបង់បានសម្លាប់សមាជិកគ្រួសាររបស់អ្នកកាសែតម្នាក់ ដែលកំពុងធ្វើការឲ្យទូរទស្សន៍រដ្ឋអាល្លឺម៉ង់។
តាលីបង់បានសម្លាប់សមាជិកគ្រួសារ និងវាយឲ្យរបួស សមាជិកម្នាក់ទៀត នៅក្រោយពួកគេរកមិនឃើញ មុខ អ្នកកាសែត ដែលតាមពិត បានភៀសខ្លួន មកធ្វើការនៅទឹកដីអាល្លឺម៉ង់ ជាច្រើនខែមកហើយ។
ហ្វេសប៊ុកចាត់វិធានការជួយការពារគណនី របស់អ្នកប្រើប្រាស់នៅអាហ្វហ្កានីស្ថាន ពីការតាមប្រមាញ់របស់ពួកតាលីបង់
ក្រុមហ៊ុនហ្វេសប៊ុកបានបិទខ្ទប់មិនឲ្យក្រុមតាលីបង់ប្រើប្រាស់បណ្តាញសង្គមរបស់ខ្លួន រហូតមក ក្នុងហេតុផលក្រុមនេះ ស្ថិតក្នុងបញ្ជីឈ្មោះ ភេរវជនរបស់ក្រសួងសេដ្ឋកិច្ចអាមេរិក។ បន្ទាប់ពីបានបិទចោលគណនីរបស់អ្នកនាំពាក្យតាលីបង់ និងគណនីរបស់ក្រុមតាលីបង់ នៅក្នុងបណ្តាញWhatsapp កាលពីថ្ងៃអង្គារ ក្រុមហ៊ុនហ្វេសប៊ុក បានអះអាងថា ទៅតាមសំណូមពររបស់អ្នកកាសែត អង្គការការពារសិទ្ធិមនុស្ស ក្រុមហ៊ុនបានចាត់វិធានការបន្ទាន់ ដើម្បី ជួយការពារសុវត្ថិភាពរបស់អ្នកប្រើប្រាស់ហ្វេសប៊ុក នៅអាហ្វហ្កានីស្ថាន។
ជារួម ហ្វេសប៊ុកបានបង្កើត គន្លឹះពិសេសមួយ ដែលអ្នកប្រើប្រាស់អាចចុចប្រើ ដើម្បី បិទបាំងគណនីរបស់គេ ដោយលឿនបំផុត។ ដោយចុចចាក់សោរបិទ គណនីរបស់ខ្លួន អ្នកប្រើប្រាស់ ហ្វេសប៊ុកនៅអាហ្វហ្កានីស្ថាន នឹងអាចមានសិទ្ធិមិនឲ្យអ្នកដែលគ្មានក្នុងបញ្ជីមិត្តភក្តិ ឬអ្នកស្គាល់ អាចចូលទៅចែករំលែក រូបថត ឬមើលខ្លឹមសារចុះផ្សាយរបស់ខ្លួនកន្លងមកនោះទេ។ ហ្វេសប៊ុកអះអាងដែរថា ក្រុមហ៊ុនបានដកចេញជាបណ្តោះអាសន្នផងដែរ លទ្ធភាព ដែលគេអាចចូលមើលបញ្ជីឈ្មោះ មិត្តរបស់អ្នកប្រើប្រាស់ ឬក៏ការចុចស្វែងរក ឈ្មោះ មនុស្ស នៅអាហ្វហ្កានីស្ថាន។
តាមប្រធានផ្នែកបទបញ្ជាស្តីពីសន្តិសុខរបស់ក្រុមហ៊ុនហ្វេសប៊ុក ចំណាត់ការខាងលើនឹងអាចជួយច្រើន ឲ្យគេប្រឆាំងទប់ទល់នឹងនិន្នាការរបស់ក្រុមតាលីបង់ ដែលកំពុងដៅស្វែងរកមនុស្ស ដែលគេចង់ សងសឹកសម្លាប់ តាមរយៈ ព័ត៌មាននៅលើបណ្តាញសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ