ប្រធានាធិបតីបារាំងនិងអាមេរិក ប្រកាសរួមដៃគ្នា តបនឹងការប្រើអាវុធគីមីនៅស៊ីរី
លោក អេម៉ាណុយអែល ម៉ាក្រុង និងលោកដូណាល់ ត្រាំ បានជួបជជែកសន្ទនាគ្នាតាមទូរស័ព្ទ នៅយប់មិញ និងបានឯកភាពគ្នាថានឹងចាត់វិធានការរួម ដើម្បីឆ្លើយតបនឹងការប្រើប្រាស់អាវុធគីមី នៅDouma ក្នុងតំបន់ហ្កូតាខាងកើតនៃប្រទេសស៊ីរី។ សម្រាប់ប្រមុខដឹកនាំទាំងពីរ សហគមន៍អន្តរជាតិត្រូវតែបញ្ចេញប្រតិកម្ម ដែលមានលក្ខណៈដាច់ខាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ប្រធានាធិបតីបារាំង និងអាមេរិក បានជួបសន្ទនាគ្នាតាមទូរស័ព្ទ ដើម្បីធ្វើបូកសរុបស្ថានការណ៍ ក្រោយពីមានហេតុការណ៍ប្រើអាវុធគីមី កើតឡើងនៅថ្ងៃទី ៧មេសា និងក្នុងខណៈដែលក្រុមប្រឹក្សាសន្តិសុខអង្គការសហប្រជាជាតិ កំពុងពិភាក្សាគ្នាលើគម្រោងសេចក្តីសម្រេចចិត្ត បង្កើតយន្តការអង្កេតអន្តរជាតិមួយលើការប្រើប្រាស់អាវុធគីមីនៅស៊ីរី។
បើតាមសេចក្តីថ្លែងការណ៍របស់វិមានប្រធានាធិបតីបារាំង ប្រមុខដឹកនាំទាំងពីរ បានឯកភាពគ្នាថា នឹងចាត់វិធានការរួមគ្នា និងទាក់ទងគ្នារហូត ដើម្បីធ្វើយ៉ាងណាឱ្យប្រតិកម្មរបស់សហគមន៍អន្តរជាតិ មានលក្ខណៈម៉ឺងម៉ាត់ដាច់ខាតខ្លាំង នៅចំពោះមុខទង្វើរំលោភបម្រាមហាមឃាត់មិនឱ្យប្រើអាវុធគីមី។
តើជាប្រតិកម្មយ៉ាងណា ?! ប្រធានាធិបតីបារាំងធ្លាប់បានរំលឹកជាច្រើនលើកច្រើនសាហើយប្រសិនបើគេរកឃើញពិតថារដ្ឋាភិបាលស៊ីរី ក្រោមការគាំទ្រពីរុស្ស៊ី នោះត្រូវតែមានការវាយតបយ៉ាងជាក់ច្បាស់។ អ្នកនាំពាក្យរដ្ឋាភិបាលបារាំង បានព្រលយ នៅព្រឹកថ្ងៃអង្គារនេះ ថា បារាំងអាចនឹងធ្វើអន្តរាគមន៍យោធា ប្រសិនបើស៊ីរីពិតជាបានរំលោភការហាមឃាត់ឃាត់ ហ៊ានលោតរំលងបន្ទាត់ក្រហម។
ក្នុងពេលជាមួយគ្នានោះ នៅខាងអាមេរិក ក៏មិនច្រានចោលសម្មតិកម្មវាយបកតាមផ្លូវយោធា លើរបបក្រុងដាម៉ាសដែរ ប៉ុន្តែលោកដូណាល់ត្រាំ ទំនងជាអាចនឹងធ្វើសេចក្តីសម្រេច ស្តីអំពីការប្រើកម្លាំងយោធា “ខ្លាំងកំរិតណា” សម្រាប់ជួយពលរដ្ឋស៊ីរីនៅតំបន់ហ្គូតាខាងកើត នាពេលបន្តិចទៀត ក្រោយការអនុម័តសេចក្តីសម្រេចរបស់អង្គការសហប្រជាជាតិ។
ក្រុមប្រឹក្សាសន្តិសុខអង្គការសហប្រជាជាតិ បានបើកប្រជុំបន្ទាន់ តាមសំណើរបស់សហរដ្ឋអាមេរិក បារាំង និងអង់គ្លេស និងបានក្លាយជាការឈ្លោះប្រឈមមុខគ្នាដ៏តានតឹងជាមួយរុស្ស៊ី។ មហាអំណាចជាដៃគូបីប្រទេសយល់ថារបបក្រុងដាម៉ាស របស់លោក បាស្ហារអាល់អាសាទ បានរំលោភច្បាប់ប្រើអាវុធគីមីប្រឆាំងពលរដ្ឋឯងកាលពីថ្ងៃសៅរ៍ ដែលគួរតែមានការអង្កេតអន្តរជាតិ ប៉ុន្តែរុស្ស៊ីយល់ថាមានចំណុចច្រើនមិនអាចទទួលយកបាន ហើយបានព្រមានថា បើក្រុមបស្ចឹមលោកបញ្ចេញប្រតិកម្មជាការវាយប្រហារយោធា នោះនឹងមានការតបតវិញ ហើយផលវិបាកពិតជានឹងធ្ងន់ធ្ងរខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ