ជំនួបកំពូលស្តីពីសមុទ្ទ ប្រមូលជំនួយបានជាង១១,៥ពាន់លានសម្រាប់ថែមហាសាគរ
ជំនួបកំពូលអន្តរជាតិស្តីពីសមុទ្ទបានបិទបញ្ចប់នៅថ្ងៃពុធ ទី ១៧មេសា នៅប្រទេសក្រិក ជាមួយនឹងការសន្យាផ្តល់ជំនួយជាង១១លាន៥សែនដុល្លារ។ នេះបើតាមសេចក្តីប្រកាសរបស់រដ្ឋមន្ត្រីក្រសួងការបរទេសក្រិក ដែលជាម្ចាស់ផ្ទះរៀបចំជំនួបប្រចាំឆ្នាំ។ តើអន្តរជាតិនឹងសន្យាជួយសមុទ្ទយ៉ាងណាខ្លះ?
ចុះផ្សាយនៅថ្ងៃ៖
ស្តាប់ - ០២:៤៣
សន្និសីទអន្តរជាតិតែមួយគត់ទាក់ទងនឹងសមុទ្ទបានរៀបចំធ្វើជាលើកដំបូងនៅឆ្នាំ២០១៤ និងជារៀងរាល់មួយឆ្នាំម្តង។ កាលណោះ ជំនួបកំពូលប្រមូលថវិកាជំនួយសម្រាប់ធ្វើវិនិយោគការអភិរក្សសមុទ្ទ បានជាង១៣០ពាន់លានដុល្លារ។ នៅឆ្នាំនេះ សន្និសីទអន្តរជាតិប្រព្រឹត្តទៅប្រទេសក្រិក រយៈពេលបីថ្ងៃ ដោយមានការចូលរួមពី១៣០ប្រទេសនិងស្ថាប័នអង្គការអន្តរជាតិនានា បានបិទបញ្ចប់នៅថ្ងៃពុធទី ១៧មេសា។
ជាឱកាសជជែកពិភាក្សាអំពីគ្រប់បញ្ហាទាក់ទងនឹងមហាសាគរ ជំនួបកំពូលសមុទ្ទឆ្នាំនេះ សម្រួចចំណាប់អារម្មណ៍ជាពិសេសទៅលើចីរភាពនៃវិស័យទេសចរណ៍ នៅតាមតំបន់ឆ្នេរ តំបន់កោះ និងវិស័យដឹកជញ្ជូនតាមសមុទ្ទ ដោយគោរពបរិស្ថាន និងការកាត់បន្ថយប្លាស្ទិក មីក្រូប្លាស្ទិក ព្រមទាំងការធ្វើអន្តរកាលបៃតងសមុទ្ទមេឌីទែរ៉ាណេ។ ជាលទ្ធផល អ្នកចូលរួមក្នុងសន្និសីទទាំងអស់បានសន្យាបញ្ចេញសកម្មភាព ដោយរៀបគម្រោងដែលមានកម្មវត្ថុថែរក្សាការពារសមុទ្ទប្រមាណ៥០០គម្រោង ជាមួយទឹកប្រាក់សរុបជាង១១ពាន់លានកន្លះដុល្លារ។
សហភាពអឺរ៉ុបប្រកាសកាន់គម្រោងចំនួន៤០ សម្រាប់ឆ្នាំ២០២៤នេះ ដែលមានទំហំ៣ពាន់៥រយលានអឺរ៉ូ។ ជាគម្រោងទឹកប្រាក់ដ៏ធំសម្បើមមិនធ្លាប់មានទេសម្រាប់សហភាពអឺរ៉ុបគិតចាប់តាំងពីសន្និសីទអន្តរជាតិស្តីពីសមុទ្ទបានបង្កើតឡើង។ កាលពីឆ្នាំទៅអឺរ៉ុបចំណាយតែប្រមាណជាង៨១៦,៥លានអឺរ៉ូប៉ុណ្ណោះ ក្នុងគម្រោងទាក់ទងនឹងសមុទ្ទ។ ចំណែកសហរដ្ឋអាមេរិកវិញ បានប្រកាសសន្យាផ្តល់ជំនួយជាងកន្លះពាន់លាន ក្នុងការជួយថែរក្សាជីវៈចម្រុះក្រោមសមុទ្ទ សម្រាប់តាមដានសង្កេតសមុទ្ទ និងសម្រាប់បំពាក់ប្រព័ន្ធប្រកាសអាសន្នជាមុនដល់បណ្តាសហគមន៍ប្រទេសកូនកោះ។ ក្រិកជាម្ចាស់ផ្ទះ ក៏បានប្រកាសផ្តួចផ្តើម២១គម្រោង គិតជាងទឹកប្រាក់៧៨០លានអឺរូ សម្រាប់ការពារជីវៈចម្រុះក្រោមសមុទ្ទដែរ។ រដ្ឋាភិបាលក្រិកចង់បង្កើតឧទ្យានជាតិថ្មីពីរ នៅក្នុងសមុទ្ទEgée សម្រាប់អភិរក្សសត្វស្លាបសមុទ្ទ និងនៅក្នុងសមុទ្ទ Ionienne សត្វចិញ្ចឹមកូនដោយទឹកដោះនិងអណ្តើក។ តែគម្រោងត្រូវរងការប្រឆាំងដោយតួកគីជិតខាង ដែលចោទក្រិកថាចង់យកលេសការពារបរិស្ថានសម្រាប់កេងចំណេញដែនទឹកក្នុងសមុទ្ទEgéeជាប់ជម្លោះជាមួយតួកគី។
សូមរំលឹកថា កាលពីឆ្នាំទៅសន្និសីទសមុទ្ទយើង នៅប្រទេសប៉ាណាម៉ា ប្រមូលបានថវិកាចំនួន១៩ពាន់លានដុល្លារអាមេរិក ដើម្បីសម្រេចគម្រោងការពារបរិស្ថានសមុទ្ទ ដូចជាធានាឱ្យមានការនេសាទបែបចីរភាព គ្មានការបំពុលបរិស្ថានសមុទ្ទ សន្តិសុខចរាចរណ៍ផ្លូវសមុទ្ទ និងតំបន់អភិរក្ស។ ឆ្នាំក្រោយជំនួបនឹងរៀបចំធ្វើនៅក្រុងប៊ូសាន ប្រទេសកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ