លោកអូបាម៉ាចុះហត្ថលេខាដាក់ទណ្ឌកម្មបន្ថែមលើអៀរ៉ង់
ចុះផ្សាយនៅថ្ងៃ៖
ស្តាប់ - ០៥:២៨
កាលពីល្ងាចថ្ងៃព្រហស្បតិ៍ ទី១ កក្កដា ២០១០នេះ លោកអូបាម៉ាបានចុះហត្ថលេខាលើច្បាប់ស្តីពីការដាក់ទណ្ឌកម្មជាឯកតោ ភាគីលើអៀរ៉ង់។ ទណ្ឌកម្មនេះ គឺជាទណ្ឌកម្មបន្ថែមពីលើទណ្ឌកម្មដែលអនុម័តដោយក្រុមប្រឹក្សា សន្តិសុខអង្គការសហប្រជាជាតិ កាលពីខែមុន ក្នុងគោលដៅបង្ខំឲ្យអៀរ៉ង់បោះបង់ចោលកម្មវិធីនុយក្លេអ៊ែរ។ លោកអូបាម៉ាបានថ្លែងថា ទណ្ឌកម្មលើកនេះមានលក្ខណៈធ្ងន់ធ្ងរបំផុតមិនធ្លាប់មាន។ ក៏ប៉ុន្តែ គេនៅតែមិនជឿថា វាអាចបង្ខំឲ្យអៀរ៉ង់បោះបង់កម្មវិធីនុយក្លេអ៊ែរបានទេ។
ច្បាប់ដែលលោកអូបាម៉ាចុះហត្ថលេខាប្រកាសឲ្យប្រើ កាលពីថ្ងៃព្រហស្បតិ៍ ម្សិលមិញនេះ ត្រូវបានអនុម័តដោយសភាអាមេរិក កាលពីសប្តាហ៍មុន។ ច្បាប់នេះមានគោលដៅពង្រីកវិសាលភាពនៃទណ្ឌកម្ម ដែលក្រុមប្រឹក្សាសន្តិសុខអ.ស.ប.បានអនុម័ត កាលពីខែមុន។ ក៏ប៉ុន្តែ អាមេរិកបានចាត់វិធានការថ្មីមួយ ដែលមិនមានក្នុងសេចក្តីសម្រេចក្រុមប្រឹក្សាសន្តិសុខ នោះគឺ ការហាមឃាត់ការលក់ប្រេងទៅឲ្យអៀរ៉ង់។
គួរបញ្ជាក់ឡើងវិញថា អៀរ៉ង់ ថ្វីដ្បិតតែជាប្រទេសសម្បូរប្រេងកាតឆៅ ក៏ប៉ុន្តែ មិនមានសមត្ថភាពគ្រប់គ្រាន់ក្នុងការចម្រាញ់ប្រេង ដើម្បីប្រើប្រាស់ក្នុងស្រុកនោះទេ។ ផលិតផលប្រេងចម្រាញ់រួចប្រមាណជា ៤០% នៅលើទីផ្សារអៀរ៉ង់ បានមកពីការនាំចូលពីបរទេស។ ការហាមឃាត់ការលក់ប្រេងទៅឲ្យអៀរ៉ង់នេះ ក៏មានចែងក្នុងសេចក្តីព្រាងនៃទណ្ឌកម្មរបស់ក្រុមប្រឹក្សាសន្តិសុខដែរ ក៏ប៉ុន្តែ ដោយមានការជំទាស់ពីចិន គេក៏លុបវិធានការនេះចេញវិញ។
ទណ្ឌកម្មជាឯកតោភាគី អនុម័តដោយអាមេរិកនៅពេលនេះ គឺជាផ្នែកមួយនៃយុទ្ធសាស្រ្តរួមរវាងសហរដ្ឋអាមេរិក និងបណ្តាប្រទេសជាសម្ព័ន្ធមិត្ត រួមមាន កាណាដា អូស្រ្តាលី និងសហភាពអឺរ៉ុប ដែលបានព្រមព្រៀងគ្នាថា នឹងអនុម័តទណ្ឌកម្មបន្ថែមលើអៀរ៉ង់ ក្រៅក្របខ័ណ្ឌក្រុមប្រឹក្សាសន្តិសុខ។ កាលពីពេលថ្មីៗនេះ ប្រទេសក្នុងសហភាពអឺរ៉ុបក៏បានសម្រេចដាក់ទណ្ឌកម្មបន្ថែមលើអៀរ៉ង់ ដូចសហរដ្ឋអាមេរិក នៅពេលនេះដែរ។ ក្រុមហ៊ុនប្រេងមួយចំនួន នៅអឺរ៉ុប ដូចជា ក្រុមហ៊ុនតូតាល់របស់បារាំង ជាដើម បានប្រកាសរួចមកហើយថានឹងបញ្ឈប់ការធ្វើវិនិយោគនៅអៀរ៉ង់ ស្របទៅតាមវិធានការ ដែលអនុម័តដោយរដ្ឋាភិបាលនៅអឺរ៉ុប។
នៅក្នុងច្បាប់ ដែលលោកអូបាម៉ាបានចុះហត្ថលេខា កាលពីថ្ងៃព្រហស្បតិ៍នេះ ការហាមឃាត់ការលក់ប្រេងទៅអៀរ៉ង់មិនមែនធ្វើឡើងតែទៅលើក្រុមហ៊ុនប្រេងអាមេរិកនោះទេ។ ក្រុមហ៊ុនប្រេងបរទេសក៏ត្រូវគេដាក់បញ្ចូលក្នុងបម្រាមនេះដែរ។ យោងតាមច្បាប់នេះ រាល់ក្រុមហ៊ុនបរទេសណា ដែលលក់ប្រេងទៅឲ្យអៀរ៉ង់ ឬបោះទុនវិនិយោគសាងសង់រោងចក្រចម្រាញ់ប្រេងនៅអៀរ៉ង់ នឹងត្រូវហាមឃាត់មិនឲ្យធ្វើការរកស៊ីនៅអាមេរិក។
ទណ្ឌកម្មលើវិស័យប្រេងនេះ ពិតជានឹងបង្កផលវិបាកដល់អៀរ៉ង់ជាមិនខាន។ ជាការពិតថា អៀរ៉ង់នៅតែអាចមានលទ្ធភាពរកផ្លូវចៀសពីទណ្ឌកម្មនេះបាន ពីព្រោះថា វាមិនមែនជាទណ្ឌកម្មដាក់ដោយអ.ស.ប.។ ក៏ប៉ុន្តែ បើទោះជាអៀរ៉ង់អាចរកទិញប្រេងបាន ក៏ទិញក្នុងតម្លៃថ្លៃជាងមុននោះដែរ។
ទោះជាយ៉ាងណា គេមិនរំពឹងថា ទណ្ឌកម្មនេះអាចនឹងធ្វើឲ្យអៀរ៉ង់ចុះញ៉ម សុខចិត្តបោះបង់កម្មវិធីនុយក្លេអ៊ែរនោះទេ។ មហិច្ឆតារបស់អៀរ៉ង់ គឺចង់ក្លាយជាមហាអំណាច នៅដើមបូព៌ា ជាពិសេស គឺដើម្បីប្រជែងជាមួយអ៊ីស្រាអែល។ អៀរ៉ង់យល់ថា កម្មវិធីនុយក្លេអ៊ែរនេះ គឺជាមធ្យោបាយដ៏ល្អបំផុត ដើម្បីឈានទៅសម្រេចតាមមហិច្ឆតានេះ។ ដូច្នេះ រដ្ឋាភិបាលអៀរ៉ង់ទំនងជាបានប្រុងប្រៀបខ្លួនរួចជាស្រេច សុខចិត្តទទួលរងនូវផលវិបាក ដែលបង្កឡើងដោយទណ្ឌកម្មពីប្រទេសលោកខាងលិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ