៣ថ្ងៃ ក្រោយការបាត់យន្តហោះ Malaysia Airlines ក្តីសង្ឃឹមមានកាន់តែស្តួចស្តើងចំពោះអ្នកដំណើរទំាង ២៣៩នាក់
ចុះផ្សាយនៅថ្ងៃ៖
ស្តាប់ - ០៦:៤៧
នៅក្នុងប្រទេសម៉ាឡេស៊ី អាថ៌កំបំាងកំពុងបន្តមានជុំវិញការបាត់យន្តហោះមួយគ្រឿង ជាមួយនឹងអ្នកដំណើរចំនួន ២៣៩នាក់របស់ក្រុមហ៊ុន Malaysia Airlines កាលពីថ្ងៃសៅរិ៍ ទី៨ មីនា។ ជាង ៦០ម៉ោង ក្រោយពីការបាត់យន្តហោះប៊ូអ៊ីង (Boeing) ប្រភេទ ៧៧៧ នោះមក ការស្រាវជ្រាវ ស្វែងរកបាន និងកំពុងបន្តធ្វើយ៉ាងសកម្ម ដោយមានជំនួយពីប្រទេសជិតខាង ពិសេសវៀតណាម ចិន ហ្វីលីពីន សិង្ហបុរី និងសហរដ្ឋអាមេរិក។ ទន្ទឹមគ្នានេះ ក្រុមគ្រួសាររបស់អ្នកដំណើរ ពិសេសជនជាតិចិនកំពុងបន្តរង់ចំាដំណឹងយ៉ាងអន្ទះសារ ព្រមទំាងបានចោទរដ្ឋាភិបាលម៉ាឡេស៊ីពីភាពយឺតយ៉ាវក្នុងការផ្តល់ព័ត៌មានឲ្យបានច្បាស់លាស់។
នៅព្រឹកមិញ រដ្ឋាភិបាលម៉ាឡេស៊ីបានបើកធ្វើសន្និសីតកាសែតមួយដើម្បីផ្តល់ព័ត៌មានថ្មីចុងក្រោយ។ នៅក្នុងសន្និសីតកាសែតនោះ រដ្ឋាភិបាលម៉ាឡេស៊ីហាក់ដូចជាមិនបាននិយាយអ្វីឲ្យបានច្បាស់លាស់ទេ ពោលគឺមិនបានផ្តល់ព័ត៌មានលំអិតអ្វីដូចដែលក្រុមគ្រួសាររបស់អ្នកដំណើរកំពុងរង់ចំាឡើយ។ ជាមួយគ្នានេះ រដ្ឋអំណាចម៉ាឡេស៊ីក៏បានប្រកាសទទួលស្គាល់ពីភាពអសមត្ថភាពរបស់ខ្លួនចំពោះព្រឹត្តិការណ៍ដ៏អាថ៌កំបំាងមួយនេះ។ លោកនាយកអាកាចរណ៍ស៊ីវិលម៉ាឡេស៊ីបានលើកឡើងពីអភូតហេតុដ៏អស្ចារ្យមិនគួរឲ្យជឿនៃការបាត់យន្តហោះនោះ។
៣ថ្ងៃមកហើយដែលការស្រាវជ្រាវ ស្វែងរកយន្តហោះនោះត្រូវបានធ្វើឡើង ដោយមានការចូលរួមយ៉ាងសកម្មពីនាវា ឧទ្ធម្ភាគចក្រ និងយន្តហោះសរុបប្រមាណជា ៦០គ្រឿងមកពីប្រទេសជិតខាង ពិសេសវៀតណាម ចិន ហ្វីលីពីន សិង្ហបុរី និងសហរដ្ឋអាមេរិក។ នៅថ្ងៃអាទិត្យ ទី៩ មីនា ទាហានជើងអាកាសវៀតណាមបានរកឃើញវត្តមានប្រេងនៅលើផ្ទៃទឹកសមុទ្រក្នុងសមុទ្រចិនខាងត្បូង។ តែបន្ទាប់ពីបានធ្វើការវិភាគមក ប្រេងនោះមិនមែនជាប្រេងសំាងរបស់យន្តហោះនោះទេ។ បន្ទាប់មកទៀត ក្រុមទាហានវៀតណាមដដែលបានប្រទះឃើញវត្ថុពណ៌ ស មួយដែលកំពុងអណ្តែតលើផ្ទៃទឹកសមុទ្រដែលគេសង្ស័យថា ជាបំណែកកន្ទុយយន្តហោះ។ តែក្រុមហ៊ុន Malaysia Airlines អះអាងថា មិនមែនជាបំណែកយន្តហោះនោះទេ។
នៅថ្ងៃចន្ទនេះ និងក្រោយពីបានស្រាវជ្រាវ ស្វែងរកពេញមួយថ្ងៃមក ក្រុមទាហានជើងអាកាសវៀតណាមដដែលបានពើបប្រទះឃើញវត្ថុមួយពណ៌លឿងអណ្តែតលើផ្ទៃទឹកសមុទ្រដែលគេសង្ស័យថា ជាពោងសង្រ្គោះរបស់យន្តហោះ។ តែក្រុមអ្នកស៊ើបអង្កេតរបស់ក្រុមហ៊ុនអាកាសចរណ៍ស៊ីវិលវៀតណាមទើបបានប្រកាសថា វត្ថុដែលគេប្រទះឃើញនោះ មិនមែនជាពោងសង្រ្គោះរបស់យន្តហោះបាត់ខ្លួននោះទេ តែជាឆ្នុកខ្សែមួយដុំរុំព័ទ្ធជុំវិញដោយស្នោ។
សរុបមក ជិត ៣ថ្ងៃក្រោយបាត់យន្តហោះនោះមក ចម្ងល់កំពុងបន្តមានតែខ្លំាង ដោយនៅមិនទាន់មានតម្រុយណាមួយដែលអាចបញ្ជាក់ពីទីកន្លែងដែលយន្តហោះនោះធ្លាក់ ឬមួយក៏បានចុះចតសម្ងំនៅភពណាមួយទេ។
រដ្ឋអំណាចម៉ាឡេស៊ីពង្រឹងការស៊ើបអង្កេតរឿងភេរវកម្ម
ការស៊ើបអង្កេតរឿងទង្វើភេរវកម្មកំពុងបន្តមានយ៉ាងសកម្ម ពិសេសជុំវិញអ្នកដំណើរសង្ស័យចំនួន ៤នាក់។ យោងតាមរដ្ឋអំណាចម៉ាឡេស៊ី ក្នុងចំណោមអ្នកដំណើរសង្ស័យទំាង ៤នាក់នោះ មានយ៉ាងតិច ២នាក់បានប្រើលិខិតឆ្លងដែនអឺរ៉ុបក្លែងក្លាយ ពោលជាលិខិតឆ្លងដែនរបស់ជនជាតិអូទ្រីសម្នាក់ និងអ៊ីតាលីម្នាក់។ លិខិតឆ្លងដែនរបស់ជនជាតិអឺរ៉ុបទំាងពីរនាក់នេះត្រូវបានចោរលួចក្នុងប្រទេសថៃកាលពីឆ្នំា ២០១២ និង ២០១៣។ ឈ្មោះរបស់ជនជាតិអូទ្រីស និងអ៊ីតាលីទំាងពីរនាក់ពិតជាមាននៅក្នុងបញ្ជីរហោះហើររបស់យន្តហោះ Malaysia Airlines នោះមែន តែអ្នកទំាងពីរមិនមានវត្តមាននៅក្នុងយន្តហោះនោះទេ។ យោងតាមរដ្ឋមន្រ្តីក្រសួងមហាផ្ទៃម៉ាឡេស៊ី អ្នកដំណើរដែលបានប្រើលិខិតឆ្លងដែនលួចពីជនជាតិអឺរ៉ុបនោះ មានភិនភាគជាប្រជាជនអាស៊ី តែមិនបានបញ្ជាក់ថា ជាជនជាតិអ្វីទេ។ រីឯប៉ូលិសថៃវិញបានបើកការស៊ើបអង្កេតជុំវិញលទ្ធភាពនៃការរត់ពន្ធលិខិតឆ្លងដែន។
អាថ៌កំបំាងមួយទៀតដែលបានជម្រុញឲ្យរដ្ឋាភិបាលទីក្រុងកូឡាឡំាពួរផ្តោតការស៊ើបអង្កេតរឿងទង្វើភេរវកម្ម គឺការដែលមានអ្នកដំណើរចំនួន ៥នាក់មានសំបុត្រយន្តហោះក្នុងដៃ និងបានបង្ហាញខ្លួននៅកន្លែងថ្លឹងអីវ៉ាន់រួចហើយ តែបែរជាមិនបានបង្ហាញខ្លួននៅពេលឡើងជិះយន្តហោះទៅវិញ។ ត្រង់ចំណុចនេះ ក្រុមហ៊ុន Malaysia Airlines បានធានាថា បន្ទាប់ពីមិនបានឃើញវត្តមានអ្នកដំណើរទំាង ៥នាក់នោះមក ក្រុមហ៊ុនក៏បានដកអីវ៉ាន់របស់ពួកគេចេញពីយន្តហោះវិញដែរ មុននឹងធ្វើការហោះឡើងរបស់យន្តហោះ។
ការទន្ទឹមរង់ចំា និងការផ្ទុះកំហឹងកំពុងមានកាន់តែខ្លំាងចេញពីក្រុមគ្រួសារអ្នកដំណើរ
ការទន្ទឹមរង់ចំា លាយឡំនឹងកំហឹងកំពុងមានកាន់តែខ្លំាងចេញពីក្រុមគ្រួសារអ្នកដំណើរ ពិសេសជនជាតិចិនដែលមានចំនួនច្រើនជាងគេនៅក្នុងយន្តហោះបាត់ខ្លួននោះ។ ទន្ទឹមគ្នានេះ មធ្យោបាយឃោសនាមហាជនចិនក៏បាននំាគ្នារិះគន់ ទិតៀនរដ្ឋអំណាចម៉ាឡេស៊ី ព្រមទំាងក្រុមហ៊ុន Malaysia Airlines យ៉ាងចាស់ដៃដែរ។ រិះគន់ពីភាពយឺតយ៉ាវក្នុងការផ្តល់ព័ត៌មានឲ្យបានលឿន និងច្បាស់លាស់។ ទន្ទឹមគ្នានេះ កាសែតចិនក៏បានឆ្លៀតព្រមានទុកជាមុនថា ទោះបីជាយន្តហោះនោះធ្លាក់ក្នុងសមុទ្រ ឬមួយក៏យ៉ាងម៉េចក៏ដោយ ក៏រដ្ឋាភិបាលម៉ាឡេស៊ីមិនអាចគេចផុតពីការទទួលខុសត្រូវរបស់ខ្លួនដែរ។
កាសែតចិនជាភាសាអង់គ្លេសឈ្មោះ « China Daily » បានយល់ស្របតាមសេណារីយ៉ូដែលលើកឡើងដោយរដ្ឋអំណាចម៉ាឡេស៊ីរឿងទង្វើភេរវកម្ម។ តែ « China Daily » បានឆ្លៀតវាយប្រហារថា ការដែលមានអ្នកដំណើរមួយចំនួនបានប្រើលិខិតឆ្លងដែនក្លែងក្លាយ រហូតដល់ឡើងជិះយន្តហោះបាន គឺសក្ខីកម្មមួយបង្ហាញយ៉ាងច្បាស់ពីការធ្វេសប្រហែសផ្នែកសន្តិសុខរបស់ក្រុមហ៊ុន Malaysia Airlines។ ដោយឡែក ក្រុមអ្នកប្រើអ៊ីនធឺណែតចិនវិញបានលើកឡើងពីអំពើភេរវកម្មកាលពីមួយសប្តាហ៍មុន នៅក្នុងស្រុក Kunming ស្ថិតប៉ែកខាងត្បូងប្រទេសចិនដោយបណ្តាលឲ្យមានមនុស្សស្លាប់ ២៩នាក់។ អំពើភេរវក្មកាលណោះ ត្រូវបានរដ្ឋាភិបាលចិនទម្លាក់កំហុសលើក្រុមអ៊ីស្លាមអ្នកទាមទារផ្តាច់ទឹកដីនិយមក្នុងខេត្តស៊ីនជំាង។
អ្វីជាការកត់សម្គាល់ ការបាត់យន្តហោះ Malaysia Airlines ពេលនេះបានកើតមានឡើង ជិតមួយសប្តាហ៍ បន្ទាប់ពីអំពើភេរវកម្មនៅស្រុក Kunming។ អ៊ីចឹងហើយបានជាក្រុមអ្នកប្រើអ៊ីនធឺណែតចិនសង្ស័យថា ក្រុមអ៊ីស្លាមអ្នកទាមទារផ្តាច់ទឹកដីនិយមក្នុងខេត្តស៊ីនជំាងដដែលនេះអាចជាអ្នកនៅពីក្រោយព្រឹត្តិការណ៍បាត់យន្តហោះ Malaysia Airlines ពេលនេះ ព្រោះថា អ្នកដំណើរភាគច្រើននៅក្នុងយន្តហោះនោះ ជាជនជាតិចិន។ យ៉ាងណាក៏ដោយ រដ្ឋអំណាចម៉ាឡេស៊ីបានអះអាងរួចហើយថា នឹងបើកការស៊ើបអង្កេតលើគ្រប់សេណារីយ៉ូទំាងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ