យន្តហោះម៉ាឡេស៊ីដឹកមនុស្ស២៣៩នាក់ បាត់ស្រមោលក្នុងដែនអាកាសវៀតណាម នៅសមុទ្រចិនខាងត្បូង
នៅថ្ងៃសៅរ៍នេះ យន្តហោះបូអ៊ីង ៧៧៧ របស់ក្រុមហ៊ុនម៉ាឡេស៊ីអ៊ែរឡាញ ដឹកមនុស្ស២៣៩នាក់ ជាពលរដ្ឋចំរុះ១៤ប្រទេស បានបាត់ស្រមោលសូន្យឈឹង ក្នុងដែនអាកាសវៀតណាម នៅសមុទ្រចិនខាងត្បូង ក្រោយពេលបានហោះចេញពីចំណតយន្តហោះនៅក្រុងកូឡាឡុំពួរ មិនដល់មួយម៉ោងផង។ ក្រុមហ៊ុនម៉ាឡេស៊ីអ៊ែរឡាញមិនទាន់អាចប្រាប់ថា តើយន្តហោះខ្លួនបានឆេះធ្លាក់រឺយ៉ាងណានោះទេ។ ពេលនេះ អាជ្ញាធរវៀតណាម ម៉ាឡេស៊ី ចិន និងសាំងហ្កាពួរ កំពុង ធ្វើការរុករកយន្តហោះ នៅតំបន់មួយស្ថិតនៅភាគខាងត្បូងកោះថូជូរបស់វៀតណាម។ រដ្ឋមន្ត្រីបារាំងទទួលបន្ទុកផ្នែកដឹកជញ្ជូន បានស្នើជួយអាជ្ញាធរវៀតណាម និងម៉ាឡេស៊ី ក្នុងការស៊ើបអង្កេតរកកំទេចកំទីយន្តហោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
យន្តហោះបូអ៊ីង ៧៧៧ របស់ក្រុមហ៊ុនម៉ាឡេស៊ីអ៊ែរឡាញ ដែលបាត់ខ្លួនម្តុំកោះវៀតណាមថូជូ ស្ថិតក្នុងដែនសមុទ្រចិនខាងត្បូង ថ្ងៃសៅរ៍នេះ បានចាកចេញពីក្រុងកូឡាឡុំពួរប្រទេសម៉ាឡេស៊ី នៅអាធ្រាតថ្ងៃសុក្រ។ ប៉ុន្តែ ខណៈយន្តហោះត្រូវចុះចតនៅក្រុងប៉េកាំង នៅព្រឹកម៉ោង៦និង៣០នាទី គេនៅមិនទាន់រកឃើញយន្តហោះ នេះនៅឡើយទេ។ យន្តហោះដឹកមនុស្ស២៣៩នាក់ ក្នុងនោះមានអ្នកដំណើរ២២៧នាក់។ អ្នកដំណើរជាពលរដ្ឋចម្រុះមកពី១៤ប្រទេស មានដូចជាចិន ម៉ាឡេស៊ី បារាំង អូស្ត្រាលី អាមេរិក និងឥណ្ឌូណេស៊ី។ អ្នកដំណើរភាគច្រើនជាជនជាតិចិន។ សមាជិកគ្រួសារអ្នកដំណើរចិន បានយំសោក និងសំដែងការខឹងសម្បារចំពោះក្រុមហ៊ុនម៉ាឡេស៊ីអ៊ែរឡាញ និងបរិហារក្រុមហ៊ុនថា មិនបានផ្តល់ដំណឹងគ្រប់គ្រាន់។
យោងតាមឧត្តមនាវីវៀតណាម ង៉ូ វ៉ាន់ផាត យន្តហោះម៉ាឡេស៊ីប្រហែលជាបាក់ធ្លាក់ទៅក្នុងសមុទ្រ ក្នុងដែនទឹកម៉ាឡេស៊ី។ ប៉ុន្តែរដ្ឋមន្ត្រីផ្នែកដឹកជញ្ជូនម៉ាឡេស៊ី បានអះអាងថា មិនបានរកឃើញកំទេចកំទីយន្តហោះនោះទេ។ អាជ្ញាធរវៀតណាម ម៉ាឡេស៊ី និងសាំងហ្កាពួរ កំពុងតែធ្វើការរុករកយន្តហោះ នៅតំបន់មួយស្ថិតនៅភាគខាងត្បូងកោះវៀតណាម ឈ្មោះថា ថូជូ ជាទីកន្លែងដែលយន្តហោះបាត់ស្រមោល។ អាជ្ញាធរចិនក៏បានបញ្ជូននាវាពីរគ្រឿង ទៅជួយរុករកយន្តហោះផងដែរ។
នៅចុងរសៀលថ្ងៃសុក្រម្សិលមិញ នៅពេលយន្តហោះម៉ាឡេស៊ី បូអ៊ីង ៧៧៧ នេះហោះក្នុងដែនទឹកចន្លោះម៉ាឡេស៊ី និងក្រុងហូជីមិញវៀតណាម យន្តហោះមិនបានជូនដំណឹងទៅផ្នែកត្រួតពិនិត្យដែនអាកាសវៀតណាម តាមការគ្រោងទុកនោះទេ។ អាជ្ញាធរចិនក៏បានប្រាប់ដែរថា បានបាត់ទំនាក់ទំនងជាមួយយន្តហោះនេះ ក្នុងដែនអាកាសវៀតណាម។
ប្រសិនបើយន្តហោះនេះពិតជាជួបគ្រោះថ្នាក់មែន នេះជាគ្រោះថា្នក់ធ្ងន់ធ្ងរបំផុត ដែលយន្តហោះបូអ៊ីងប្រភេទ៧៧៧-២០០ER ជួបប្រទះ គិតចាប់ពីពេលផ្តើមដំណើរការខ្លួនលើកដំបូង នៅឆ្នាំ១៩៩៥មក។ កាលពីខែកក្កដា ឆ្នាំ២០១៣ យន្តហោះបូអ៊ីង៧៧៧នេះ បានជួបគ្រោះថ្នាក់ នៅពេលចុះចតនៅក្រុងសាន់ហ្វ្រាន់ស៊ិសស្កូ សហរដ្ឋអាមេរិក។ កាលណោះ អ្នកដំណើរ៣នាក់បានស្លាប់ ហើយ១៨០នាក់ទៀតរងរបួស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ