ការវាយបង្ក្រាបនៅតែកើតមាន របបផ្តាច់ការបាស្ហារអែល-អាស្សាដយល់ព្រមធ្វើសម្បទាន
ជាងមួយខែក្រោយពីប្រជាជនស៊ីរីបានងើបបះបោរប្រឆាំង រដ្ឋាភិបាលនៃរបបផ្តាច់ការបាស្ហារអែល-អាស្សាដបានអនុម័តកាលពីថ្ងៃអង្គារម្សិលមិញនូវគម្រោងច្បាប់មួយសម្រាប់ដកចេញ “ការប្រកាសដាក់ប្រទេសស៊ីរីឲ្យឋិតនៅក្រោមភាពអាសន្ន” ដែលជាការទាមទារដ៏សំខាន់មួយរបស់បាតុករស៊ីរី។របបគ្របគ្រងបាស្ហារ អែល-អាស្សាដស្រែកថា មានការងើបបះបោរដោយប្រើអាវុធ ហើយបានចោទថា ពួកអ៊ីស្លាមនិយមជាអ្នកធ្វើការបំបះបំបោរ ហើយនិងទីក្រុងវ៉ាស៊ីនតោនជាខ្នងបង្អែករបស់ពួកបាតុករស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
នៅខណៈនេះ ទីក្រុងដាម៉ាសបានយល់ព្រមធ្វើកំណែទម្រង់ខ្លះៗមានដូចជា ការដកចេញនូវ“ការប្រកាសដាក់ប្រទេសស៊ីរីឲ្យឋិតនៅក្រោមភាពអាសន្ន” ដែលបានចូលជាធរមានអស់រយៈពេល៤៨ឆ្នាំមកហើយ។ ការដកចេញនូវ“ការប្រកាសដាក់ប្រទេសស៊ីរីឲ្យឋិតនៅក្រោមភាពអាសន្ន” នេះគឺពិតជាសម្បទានមួយដ៏សំខាន់ពីសំណាក់របបផ្តាច់ការបាស្ហារអែល-អាស្សាដ ទោះបីជានៅពេលទន្ទឹមគ្នានេះ អាជ្ញាធរស៊ីរីបានប្រកាសឲ្យដឹងថា គេនឹងចេញច្បាប់ថ្មីសម្រាប់គ្រប់គ្រងបញ្ហាបាតុកម្មក៏ដោយ។
ចំណែកឯអ្នកនាំពាក្យនៃក្រសួងការបរទេសអាមេរិកវិញ បានថ្លែងថា៖ ច្បាប់ថ្មីរបស់អាជ្ញាធរស៊ីរីអាចនឹងមានលក្ខណៈតឹងរ៉ឹងដូច“ការប្រកាសដាក់ប្រទេសស៊ីរីឲ្យឋិតនៅក្រោមភាពអាសន្ន” អ៊ីចឹងដែរ។ រីឯសកម្មជនការពារសិទ្ធិមនុស្សក៏មានការយល់ឃើញដូចគ្នាដែរ។
ក៏ប៉ុន្តែមានសញ្ញាជាច្រើនបានបង្ហាញឲ្យឃើញថា អាជ្ញាធរស៊ីរីនៅពុំយល់ព្រមតាមការទាមទាររបស់បាតុករប្រឆាំងនៅប្រទេសស៊ីរីឡើយ។ ប៉ុន្មានម៉ោងក្រោយពីការប្រកាសរបស់រដ្ឋាភិបាល ស្រាប់តែលោកម៉ាហមូដ អ៊ីស្សាដែលជាមេដឹកនាំប្រឆាំងស៊ីរីម្នាក់បានត្រូវកម្លាំងសន្តិសុខមកចាប់ពីគេហដ្ឋានរបស់លោកទាំងយប់យកទៅឃុំឃាំង។
នៅទីក្រុងHoms ឯណោះ នគរបាលបានបាញ់ទៅលើបាតុករដែលបានបណ្តាលឲ្យមានមនុស្សស្លាប់៦នាក់។ គឺនៅក្នុងទីក្រុងឧស្សាហកម្មដែលមានប្រជាជនជាង១លាននាក់រស់នៅនេះហើយដែលភាពតានតឹងបានកើតមានអស់រយៈពេលពីរថ្ងៃមកហើយ។ ពួកបាតុករបានប្រកាសអំពាវនាវឲ្យមាន “បាតុកម្មធំជាទូទៅ”មួយនៅប្រទេសស៊ីរី។
បើយោងតាមប្រភពខ្លះបានឲ្យដឹងថា ទីក្រុងHomsមានសភាពជាតំបន់សង្គ្រាម ដោយហេតុថា កាលពីម្សិលមិញវិថីនានាមានសភាពស្ងាត់ជ្រងំ ហាងលក់ទំនិញបាននាំគ្នាបិទទ្វារអស់ នគរបាលបានហាមឃាត់ពុំឲ្យមានការជួបប្រជុំគ្នានៅ “ទីលាននាឡិកា”ដែលជាទីកន្លែងមួយដ៏សំខាន់សម្រាប់បាតុករប្រមូលផ្តុំគ្នានៅ ទីក្រុងHoms។
នៅទីក្រុងBanias ឯណោះវិញ ពួកបាតុករប្រឆាំងនៅតែកេណ្ឌប្រមូលកម្លាំងដ៏ខ្លាំងក្លារបស់ពួកគេដែលជាមូលហេតុនាំឲ្យរបបគ្របគ្រងបាស្ហារ អែល-អាស្សាដស្រែកថា មានការងើបបះបោរដោយប្រើអាវុធ ហើយបានចោទថា ពួកអ៊ីស្លាមនិយមជាអ្នកធ្វើការបំបះបំបោរ ហើយនិងទីក្រុងវ៉ាស៊ីនតោនជាខ្នងបង្អែករបស់ពួកបាតុករស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ