បាតុករស៊ីរីរាប់ម៉ឺននាក់ទាមទារឲ្យមានសិទ្ធិសេរីភាពនៅទូទាំងប្រទេស
បាតុករស៊ីរីរាប់ម៉ឺននាក់បាននាំគ្នាចុះថ្នល់ធ្វើបាតុកម្មនៅទូទាំងប្រទេសនៅថ្ងៃសុក្រម្សិលមិញ ដើម្បីសម្ដែងការប្រឆាំងនឹងរបបគ្រប់គ្រងរបស់ប្រធានាធិបតីបាស្ហារ អាល-អាស្សាដ។ ទោះបីជាមានការដោះលែងបាតុករដែលបានត្រូវអាជ្ញាធរចាប់ឃុំឃាំងតាំងពីថ្ងៃទី១៥មីនា ហើយនិងមានការបង្កើតរដ្ឋាភិបាលស៊ីរីថ្មីដើម្បីដឹកនាំកំណែទម្រង់នៅក្នុងប្រទេសក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សៀក សារិន
បាតុករស៊ីរីដែលស្រឡាញ់ “សិទ្ធិសេរីភាព” បាននាំគ្នាចុះថ្នល់ធ្វើបាតុកម្មដោយប្រើសន្តិវិធីដើម្បីសម្តែងបង្ហាញឲ្យឃើញនូវការប្តេជ្ញាចិត្តដ៏មោះមុតរបស់ពួកគេក្នុងការទាមទារឲ្យអាជ្ញាធរស៊ីរីលើកចេញនូវ៖
ទី១-ការប្រកាសដាក់ប្រទេសស៊ីរីឲ្យឋិតនៅក្រោមភាពអាសន្ន។
ទី២-បញ្ឈប់ជាបន្ទាន់អំពើហិង្សានិងការចាប់ឃុំឃាំងហើយនិងការធ្វើទារុណកម្មទៅលើបាតុករដែលបានត្រូវបរិហារដោយអង្គការការពារសិទ្ធិមនុស្ស។
ទី៣-ទាមទារឲ្យរំលាយរបបគ្រប់គ្រងស៊ីរីបច្ចុប្បន្នដែលបានដាក់ប្រទេសឲ្យឋិតនៅក្រោមការគ្រប់គ្រងរបស់គណបក្សនយោបាយតែមួយគត់គឺគណបក្សBaas ដែលបានក្តោបក្តាប់គ្រប់គ្រងប្រទេសស៊ីរីតាំងពីឆ្នាំ១៩៦៣មក។
ហើយបាតុករស៊ីរីដែលស្រឡាញ់ “សិទ្ធិសេរីភាព”បានសម្ដែងបង្ហាញឲ្យឃើញជាថ្មីម្តងទៀតនូវការប្រឆាំងរបស់ពួកគេនៅចំពោះមុខ “ជម្លោះសាសនា”ដែលកើតមានរវាងសហគមន៍ជាច្រើនដែលមាននៅប្រទេសស៊ីរី ហើយបាននាំគ្នាស្រែកប្រកាសថា "ប្រទេសស៊ីរីមានតែមួយគត់"។
គួរកត់សម្គាល់ថា នៅតាមទីក្រុងជាច្រើននៃប្រទេសស៊ីរី បាតុករស៊ីរីដែលស្រឡាញ់ “សិទ្ធិសេរីភាព” បាននាំគ្នាស្រែកប្រកាសថា “គេសុខចិត្តស្លាប់ជាជាងរស់នៅដោយគ្មានសេចក្តីថ្លៃថ្នូរ”។
នៅចំពោះមុខការទាមទាររបស់បាតុករស៊ីរីរាប់ម៉ឺននាក់តាំងពីថ្ងៃទី១៥មីនាឆ្នាំ២០១១មក លោកប្រធានាធិបតីបាស្ហារអាល-អាស្សាដបានបង្កើតឲ្យមានរដ្ឋាភិបាលថ្មីមួយដែលដឹកនាំដោយលោកAdel Safar ដែលធ្លាប់កាន់កាប់តំណែងជារដ្ឋមន្ត្រីក្រសួងកសិកម្មអស់រយៈពេល៨ឆ្នាំនៅក្នុងរដ្ឋាភិបាលមុន។ ចំណែកឯរដ្ឋមន្ត្រីនៃក្រសួងការពារជាតិ រដ្ឋមន្ត្រីនៃក្រសួងការបរទេស និងរដ្ឋមន្ត្រីនៃក្រសួងប្រេងឥន្ធនៈនៅក្នុងរដ្ឋាភិបាលស៊ីរីមុននៅកាន់កាប់មុខតំណែងដដែល។ ហើយរដ្ឋាភិបាលស៊ីរីថ្មីនេះមានបន្ទុកទទួលរៀបចំឲ្យមានកំណែទម្រង់មួយចំនួននៅក្នុងប្រទេស។ ក៏ប៉ុន្តែ លោកប្រធានាធិបតីបាស្ហារអាល-អាស្សាដពុំបានលើកចេញ “ការប្រកាសដាក់ប្រទេសស៊ីរីឲ្យឋិតនៅក្រោមភាពអាសន្ន”ឡើយ។
នៅសប្តាហ៍នេះ លោកប្រធានាធិបតីបាស្ហារអាល-អាស្សាដបានទទួលជួបពិភាក្សាជាមួយអ្នកតំណាងជាច្រើននាក់មកពីទីក្រុងដែរ៉ាដែលមានបាតុករស៊ីរីរាប់សិបនាក់បានស្លាប់ដោយហេតុតែមានការវាយបង្ក្រាបដ៏ហិង្សាពីសំណាក់នគរបាល។ ហេតុដូច្នេះហើយ បានជាលោកប្រធានាធិបតីបាស្ហារអាល-អាស្សាដបានសន្យាថានឹងបញ្ឈប់ពុំឲ្យមានទង្វើហិង្សាប្រព្រឹត្តទៅលើបាតុករស៊ីរីនៅពេលអនាគត។
នៅចំពោះមុខស្ថានការណ៍នយោបាយបច្ចុប្បន្ននៅប្រទេសស៊ីរី ប្រជាជនស៊ីរីដែលស្រឡាញ់ “សិទ្ធិសេរីភាព” និងស្រឡាញ់ “យុត្តិធម៌”គ្មានជំនឿសោះឡើយទៅលើគម្រោងការធ្វើកំណែទម្រង់របស់លោកប្រធានាធិបតីបាស្ហារអាល-អាស្សាដ។ ហេតុដូច្នេះហើយ បានជាពួកគេបាន ទាមទារឲ្យរំលាយរបបគ្រប់គ្រងស៊ីរីបច្ចុប្បន្នដែលបានដាក់ប្រទេសឲ្យឋិតនៅក្រោមការគ្រប់គ្រងរបស់គណបក្សនយោបាយតែមួយគត់គឺគណបក្សBaas ដែលបានក្តោបក្តាប់គ្រប់គ្រងប្រទេសស៊ីរីតាំងពីឆ្នាំ១៩៦៣ ហើយទាមទារឲ្យមានសិទ្ធិសេរីភាពសារព័ត៌មាន សិទ្ធិសេរីភាពនយោបាយ។
ចំណែកឯអង្គការការពារសិទ្ធិមនុស្ស Human Right Watch បានចោទប្រកាន់ក្រសួងសន្តិសុខស៊ីរីថា បានធ្វើទារុណកម្មទៅលើបាតុករស៊ីរីជាច្រើននាក់នៅក្នុងចំណោមបាតុកររាប់រយនាក់ ដែលក្រសួងសន្តិសុខស៊ីរីបានចាប់ឃុំខ្លួនតាំងពីមានបាតុកម្មនៅថ្ងៃដំបូងពោលគឺពីថ្ងៃទី១៥មីនាឆ្នាំ២០១១។ រីឯអង្គការAmnesty International វិញ បានថ្លែងឲ្យដឹងថា មានបាតុករស៊ីរីយ៉ាងតិច២០០នាក់បានស្លាប់នៅក្នុងការវាយបង្ក្រាបយ៉ាងហិង្សាដោយកងកម្លាំងរក្សាសន្តិសុខស៊ីរីឬដោយនគរបាលដែលមានឯកសណ្ឋានជាស៊ីវិល។
នៅឯទីក្រុងហ្សឺណែវឯណោះ អ្នកឯកទេសខាងសិទ្ធិមនុស្សនៃអង្គការសហប្រជាជាតិបានប្រកាសអំពាវនាវនៅថ្ងៃសុក្រម្សិលមិញ ឲ្យរដ្ឋអំណាចស៊ីរីបញ្ឈប់ជាបន្ទាន់នូវការវាយបង្ក្រាបដ៏ហិង្សាទៅលើបាតុករស៊ីរីដែលធ្វើការទាមទារដោយប្រើសន្តិវិធី។
ហើយនៅចំពោះមុខអ្នកកាសែតនៅទីក្រុងប៊ែរឡាំង លោកស្រីគ្លីនតុនរដ្ឋមន្ត្រីក្រសួងការបរទេសអាមេរិកបានទាមទារឲ្យរដ្ឋអំណាចស៊ីរីបញ្ឈប់ឲ្យបានឆាប់រហ័សនូវអំពើហិង្សាដែលប្រព្រឹត្តទៅលើអ្នកប្រឆាំងនៅប្រទេសស៊ីរីដែលគ្រាន់តែទាមទារចង់បានសិទ្ធិសេរីភាពក្នុងការបញ្ចេញមតិនិងលទ្ធិប្រជាធិបតេយ្យជូនប្រជាជនស៊ីរីតែប៉ុណ្ណោះ៕.
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ