តើបាតុកម្មគាំទ្ររបបបាស្ហារអែល-អាស្សាដអាចមានឥទ្ធិពលអ្វីខ្លះទៅលើចលនាប្រឆាំង?
នៅថ្ងៃអង្គារទី២៩មីនាឆ្នាំ២០១១ បាតុកររាប់ម៉ឺននាក់ដែលគាំទ្ររបបគ្រប់គ្រងបាស្ហារអែល-អាស្សាដបាន នាំគ្នាចុះថ្នល់ធ្វើបាតុកម្មដើម្បីសម្ដែងបង្ហាញឲ្យឃើញនូវការគាំទ្រ របស់ពួកគេ។ ប៉ុន្តែរដ្ឋាភិបាលរបស់បាស្ហារអែល-អាស្សាដក៏នៅតែត្រូវរំលាយចោល។ ដូច្នេះ តើបាតុកម្មគាំទ្ររបបគ្រប់គ្រងបាស្ហារអែល-អាស្សាដហើយនិងការរំលាយ រដ្ឋាភិបាលអាចមានឥទ្ធិពលអ្វីខ្លះទៅលើចលនាប្រឆាំងនៅប្រទេសស៊ីរី?
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សៀក សារិន
នៅទីលាននៃក្រសួងហិរញ្ញវត្ថុនៅទីក្រុងដាម៉ាស គេឃើញមានបាតុកររាប់ម៉ឺននាក់ដែលគាំទ្ររបបគ្រប់គ្រងបាស្ហារ អែល-អាស្សាដបាននាំគ្នាធ្វើបាតុកម្ម នៅថ្ងៃអង្គារទី២៩មីនាឆ្នាំ២០១១ ដើម្បីសម្ដែងបង្ហាញឲ្យឃើញនូវការគាំទ្ររបស់ពួកគេ ដោយបានស្រែកជាពាក្យស្លោកថា “ដើម្បីព្រះអាទិទេព ដើម្បីប្រទេសស៊ីរីនិងដើម្បីប្រជាពលរដ្ឋ”។
នៅក្នុងសេចក្តីប្រកាសជាច្រើនដោយលោកស្រីទីប្រឹក្សារបស់ប្រធានាធិបតីស៊ីរីបាស្ហារ អែល-អាស្សាដ នារយៈពេលប៉ុន្មានថ្ងៃចុងក្រោយនេះពាក់ព័ន្ធនឹងកំណែទម្រង់ក្នុងវិស័យប្រព័ន្ធផ្សព្វផ្សាយព័ត៌មាន និងកំណែទម្រង់ពាក់ព័ន្ធនឹងគណបក្សនយោបាយបានធ្វើឲ្យចលនាប្រឆាំងស៊ិរីមានការចាប់អារម្មណ៍។ ចំណែកឯបាតុកម្មគាំទ្ររបបគ្រប់គ្រងរបស់ប្រធានាធិបតីស៊ីរីបាស្ហារ អែល-អាស្សាដហើយនិងការរំលាយចោលរដ្ឋាភិបាលនៅពេលថ្មីៗនេះក៏បានធ្វើឲ្យពួកអ្នកប្រឆាំងមានចំណាប់អារម្មណ៍ផងដែរ។ ក៏ប៉ុន្តែអ្វីដែលសំខាន់នៅពេលនេះសម្រាប់ចលនាប្រឆាំងស៊ីរីគឺគេនៅរង់ចាំមើលអន្តរាគមន៍របស់ប្រធានាធិបតីស៊ីរីបាស្ហារ អែល-អាស្សាដដែលត្រូវថ្លែងសុន្ទរកថាមួយដ៏សំខាន់នៅថ្ងៃពុធនេះ។
អ្វីដែលចលនាប្រឆាំងស៊ីរីរង់ចាំជាងគេនៅក្នុងសុន្ទរកថារបស់ប្រធានាធិបតីស៊ីរីបាស្ហារ អែល-អាស្សាដគឺ សេចក្តីប្រកាសដកចេញនូវ “ការដាក់ប្រទេសឲ្យឋិតនៅក្រោមភាពអាសន្ន”ដែលបានចូលជាធរមានតាំងពីឆ្នាំ១៩៦៣។ នេះជាការទាមទារដ៏សំខាន់មួយរបស់ចលនាប្រឆាំងស៊ីរី។
សូមបញ្ជាក់ថា ការប្រកាសដាក់ប្រទេសឲ្យឋិតនៅក្រោមភាពអាសន្ននេះបានចាប់មាននៅពេលដែលគណបក្សBaas បានឡើងមកកាន់កាប់អំណាចនៅប្រទេសស៊ីរី ក្រោយពីបានធ្វើរដ្ឋប្រហារ។ “ការដាក់ប្រទេសឲ្យឋិតនៅក្រោមភាពអាសន្ន”នេះគឺជាឧបករណ៍មួយដ៏សំខាន់សម្រាប់គណបក្សBaas ចងរឹតខ្ទប់បិទមាត់គណបក្សប្រឆាំងហើយនិងសម្រាប់ចាប់ឃុំឃាំងអ្នកប្រឆាំងបានយ៉ាងងាយស្រួលនៅក្នុងប្រទេសស៊ីរីដែលមានប្រជាជនប្រមាណ២២លាននាក់ ហើយមានប៉ូលិសរក្សាសន្តិសុខនៅគ្រប់ទីកន្លែង។
គួរកត់សម្គាល់ថា បាស្ហារអែល-អាស្សាដដែលបានឡើងមកកាន់កាប់អំណាចបន្តពីឪពុករបស់ខ្លួននៅឆ្នាំ២០០០ក៏បានប្រើ“ការដាក់ប្រទេសឲ្យឋិតនៅក្រោមភាពអាសន្ន”នេះមកដាក់គំនាបលើពួកអ្នកប្រឆាំងស៊ីរី។ ក្រោយពីបានធ្វើការដោះលែងអ្នកទោសនយោបាយប្រមាណ៣០០នាក់ ហើយនិងបានកេណ្ឌប្រមូលគ្នីគ្នាមកធ្វើបាតុកម្មគាំទ្រខ្លួន ប្រធានាធិបតីស៊ីរីបាស្ហារ អែល-អាស្សាដសង្ឃឹមថា អាចធ្វើការទប់ទល់នឹងចលនាប្រឆាំង។
ការរំលាយរដ្ឋាភិបាលស៊ីរីនៅថ្ងៃអង្គារម្សិលមិញដោយបាស្ហារ អែល-អាស្សាដបានត្រូវចលនាប្រឆាំងស៊ីរីមើលឃើញថា ជាវិធានការសម្រាប់កែលំអតែប៉ុណ្ណោះ។ អំណាចទាំងប៉ុន្មានគឺឋិតនៅក្នុងកណ្តាប់ដៃរបស់ប្រធានាធិបតីស៊ីរីបាស្ហារ អែល-អាស្សាដនិងក្រុមគ្រួសារ ហើយនិងនៅក្នុងកណ្តាប់ដៃរបស់ក្រុមរក្សាសន្តិសុខ។
គួរកត់សម្គាល់ថា កាលពីសប្តាហ៍មុនប្រមុខរដ្ឋស៊ីរីបាស្ហារ អែល-អាស្សាដធ្លាប់បានថ្លែងឲ្យដឹងថា គេគ្រោងដកចេញ“ការដាក់ប្រទេសឲ្យឋិតនៅក្រោមភាពអាសន្ន”ហើយនិងគ្រោងចាត់វិធានការឲ្យមានសិទ្ធិសេរីភាពសម្រាប់អ្នកនយោបាយនិងសម្រាប់សារព័ត៌មាន។
ក៏ប៉ុន្តែទាំងអ្នកទទួលខុសត្រូវស៊ីរី ទាំងអ្នកការទូត ទាំងសកម្មជនការពារសិទ្ធិប្រជាពលរដ្ឋគ្មានជំនឿឡើយថា បាស្ហារអែល-អាស្សាដនឹងធ្វើការដកចេញនូវ“ការដាក់ប្រទេសឲ្យឋិតនៅក្រោមភាពអាសន្ន”ដោយពុំដាក់ច្បាប់ឬវិធានការអ្វីថ្មីមកជំនួសនោះឡើយ។
បច្ចុប្បន្ននេះ បាស្ហារអែល-អាស្សាដឋិតនៅក្រោមគំនាបពីរគឺគំនាបខាងក្នុងផង គំនាបខាងក្រៅផង។ ហេតុដូច្នេះហើយ បានជា បាស្ហារអែល-អាស្សាដខិតខំរៀបចំផែនការសម្រាប់ធ្វើឲ្យសាធារណមតិមើលឃើញថា របបគ្រប់គ្រងស៊ីរីបច្ចុប្បន្នកំពុងរៀបចំធ្វើកំណែទម្រង់។
សម្រាប់ក្រសួងការបរទេសអាមេរិក ប្រមុខរដ្ឋស៊ីរីបាស្ហារ អែល-អាស្សាដកំពុងតែដើរដល់ច្រកមួយដែលខ្លួនត្រូវតែធ្វើការជ្រើសរើស។ អ្នកនាំពាក្យនៃក្រសួងការបរទេសអាមេរិកលោកMark Toner បានថ្លែងបញ្ជាក់ថា “ជាង១០ឆ្នាំមកហើយដែលប្រធានាធិបតីស៊ីរីបាស្ហារ អែល-អាស្សាដបានប្រកាសប្រាប់ថា គាត់ជាអ្នកកំណែទម្រង់និយម ប៉ុន្តែគេគ្មានឃើញកំណែទម្រង់អ្វីសោះក្នុងវិស័យនយោបាយ ដូច្នេះ បាស្ហាអែល-អាស្សាដត្រូវតែធ្វើការឆ្លើយតបទៅនឹងការទាមទារដ៏ត្រឹមត្រូវរបស់ប្រជាជនស៊ីរី”។
រីឯរដ្ឋមន្ត្រីក្រសួងការបរទេសបារាំងអាឡាំងហ្ស៊ូប៉េក៏បានធ្វើការថ្កោលទោសយ៉ាងខ្លាំងក្លាទៅលើការវាយបង្ក្រាបយ៉ាងហិង្សាទៅលើបាតុករស៊ីរីហើយបានទាមទារឲ្យរបបគ្រប់គ្រងរបស់ប្រធានាធិបតីស៊ីរីបាស្ហារ អែល-អាស្សាដធ្វើការកែទម្រង់ឲ្យបានសមស្របទៅនឹងការទាមទាររបស់ប្រជាពលរដ្ឋស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ