ប្រឈមមុខទល់នឹងការងើបប្រឆាំងរបស់ប្រជាពរដ្ឋ រដ្ឋអំណាចស៊ីរីសន្យាថានឹងធ្វើកំណែទម្រង់
ប្រាំបួនថ្ងៃមកហើយដែលប្រជាពលរដ្ឋស៊ីរីបានងើបបះបោរធ្វើបាតុកម្ម ប្រឆាំងនឹងរបបគ្រប់គ្រងរបស់Bachar el-Assad។ បាតុករស៊ីរីរាប់ម៉ឺននាក់បាននាំគ្នាចុះថ្នល់សម្ដែងបង្ហាញឲ្យឃើញ នូវការប្រឆាំងរបស់ពួកគេនៅតាមវិថីនៃទីក្រុងដែរ៉ាដែលឋិតនៅ ប៉ែកខាងត្បូងនៃប្រទេស។ ទីក្រុងដែរ៉ាបានក្លាយទៅជាដែនអំណាចនៃពួកអ្នកប្រឆាំងស៊ីរី។ នៅថ្ងៃព្រហស្បតិ៍ទី២៤មីនាឆ្នាំ២០១១ ការវាយបង្ក្រាបដោយនគរបាលទៅលើបាតុករបានបណ្តាលឲ្យមានមនុស្សស្លាប់ យ៉ាងតិចមួយរយនាក់ នេះបើយោងតាមសកម្មជនសិទ្ធិមនុស្ស។ ប្រឈមមុខទល់នឹងចលនាងើបបះបោរប្រឆាំងដែលរីករាលដាលកាន់តែខ្លាំងឡើងៗ រដ្ឋអំណាចស៊ីរីសន្យាថានឹងធ្វើកំណែទម្រង់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
លោកស្រីBoussaïna Chaabane ទីប្រឹក្សារបស់លោកប្រធានាធិបតីស៊ីរីBachar el-Assadបានប្រកាសឲ្យដឹងថា នឹងបង្កើតឲ្យមានគណៈកម្មការមួយដើម្បីពិនិត្យមើលពីការលុបចោលនូវ “ការដាក់ប្រទេសឲ្យឋិតនៅក្រោមភាពអាសន្ន”ដែលនៅជាធរមានតាំងពីឆ្នាំ១៩៦៣។ “ការដាក់ប្រទេសឲ្យឋិតនៅក្រោមភាពអាសន្ន”ដែលអនុញ្ញាតឲ្យអាជ្ញាធរចាប់ឃាត់ខ្លួនដោយពុំចាំបាច់មានដីកា ហើយនិងអនុញ្ញាតឲ្យចាប់ឃុំឃាំងដោយពុំចាំបាច់មានការជំនុំជម្រះអ្វីឡើយ។ ហើយគណៈកម្មការនេះក៏នឹងមានបន្ទុកសិក្សារិះរកមធ្យោបាយដើម្បីជួយលើកតម្កើងជីវភាពរស់នៅរបស់ប្រជាពលរដ្ឋ ដែលពួកគេត្រូវបង្ខំខ្លួនប្រកបមុខរបរពីរឬបីដើម្បីអាចមានលទ្ធភាពរស់នៅនឹងគេ។
លោកស្រីBoussaïna Chaabaneក៏បានប្រកាសប្រាប់ទៀតថា រដ្ឋអំណាចស៊ីរីនឹងបង្កើតឲ្យមានយន្តការថ្មីជាច្រើនទៀតដើម្បីប្រយុទ្ធប្រឆាំងនឹងអំពើពុករលួយ។ ហើយលោកស្រីBoussaïna Chaabaneបានថ្លែងបញ្ជាក់ថា លោកប្រធានាធិបតីស៊ីរីBachar el-Assadពុំបានឲ្យបញ្ជាទៅនគរបាលឲ្យបាញ់ទៅលើក្រុមបាតុករនៅទីក្រុងដែរ៉ាឡើយ។
ប្រធានាធិបតីស៊ីរីBachar el-Assadក៏បានសន្យាផងដែរថា នឹងបង្កើតឲ្យមានច្បាប់សម្រាប់ “ការពារសិទ្ធិសេរីភាពរបស់អ្នកកាសែត” សម្រាប់ “ការពារគណបក្សនយោបាយ”។ ហើយBachar el-Assadបានចេញក្រិត្យដើម្បីធ្វើការដំឡើងប្រាក់ខែ៣០%ភ្លាមៗជូនមន្ត្រីរដ្ឋការ ហើយនិងឲ្យបញ្ជាឲ្យគេដោះលែងបាតុករដែលបានត្រូវគេចាប់ឃុំខ្លួននាឱកាសបាតុកម្មនៅទីក្រុងដែរ៉ា។
ពាក្យសន្យាដែលគេគ្មានជំនឿ
ការប្រកាសទាំងនេះហើយដែលប្រជាពលរដ្ឋស៊ីរីទន្ទឹងរង់ចាំចង់បាន។ ប្រជាពលរដ្ឋស៊ីរីដែលពុំចង់ឲ្យកើតមានវិបត្តិក៏ប៉ុន្តែពួកគេចង់ឲ្យមានការប្តូរប្រែនៅក្នុងប្រទេសស៊ីរី។ ហើយការប្រកាសសន្យារបស់ប្រធានាធិបតី Bachar el-Assadពុំបានធ្វើឲ្យប្រជាជនស៊ីរីមានជំនឿឡើយ។ អ្វីដែលប្រជាពលរដ្ឋស៊ីរីចង់បានគឺ “កំណែទម្រង់ពិតប្រាកដ” ពុំមែនពាក្យសន្យាឡើយ។ ប្រជាពលរដ្ឋស៊ីរីចង់បាន “សិទ្ធិសេរីភាពក្នុងការបញ្ចេញមតិ” ចង់បំបាត់ចេញឲ្យអស់នូវ “ប៉ូលិសសម្ងាត់” របស់ប្រធានាធិបតី Bachar el-Assadដែលមាននៅគ្រប់ទីកន្លែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ