ការចាប់ចរចាគ្នាឡើងវិញរវាងឥណ្ឌានិងប៉ាគីស្ថាន
ចុះផ្សាយនៅថ្ងៃ៖
ស្តាប់ - ០៤:៥២
លោកស្រី Hina Rabbani Khar រដ្ឋមន្ត្រីក្រសួងការបរទេសប៉ាគីស្ថានអញ្ជើញទៅប្រទេសឥណ្ឌា ដើម្បីចាប់ចរចាគ្នាឡើងវិញរវាងប្រទេសឥណ្ឌានិងប៉ាគីស្ថាន ដែលបានស្គាល់ការរកាំរកូសក្រោយពីមានអំពើភេរវកម្មនៅទីក្រុងBombay នៅឆ្នាំ២០០៨។ លោកស្រីប្រមុខការទូតប៉ាគីស្ថានបានថ្លែងនៅថ្ងៃពុធនេះថា ប៉ាគីស្ថានចង់រឹតចំណងមិត្តភាពជាមួយប្រទេសឥណ្ឌា។
មូលហេតុដែលជំរុញឲ្យប្រទេសប៉ាគីស្ថានស្វែងរកធ្វើការចរចាគ្នាឡើងវិញជាមួយប្រទេសឥណ្ឌាមានច្រើន៖
ទី១-ការចាកចេញពីប្រទេសអាហ្វហ្កានីស្ថាននៃកងកម្លាំងយោធាបរទេស។ ប្រទេសអាហ្វហ្កានីស្ថានដែលសម្បូណ៌ទៅដោយពួកអ៊ីស្លាមជ្រុលនិយមហើយមានព្រំដែនជាប់ជាមួយប្រទេសប៉ាគីស្ថាន។
ទី២-ការបាត់បង់បរិយាកាសនិងទំនាក់ទំនងល្អរវាងសហរដ្ឋអាមេរិកនិងប៉ាគីស្ថានក្រោយពីមានការបាញ់សម្លាប់មេដឹកនាំអាល់កៃដា អ៊ូសាម៉ាបេនឡាដេន។
ទី៣-ទំនាក់ទំនងដ៏ល្អរវាងសហរដ្ឋអាមេរិកនិងប្រទេសឥណ្ឌាបានធ្វើឲ្យប្រទេសប៉ាគីស្ថានកើតមានក្តីបារម្ភ។
ទាំងនេះពិតជាមូលហេតុដ៏សំខាន់ជំរុញឲ្យប្រទេសប៉ាគីស្ថានងាកមកស្វែងរកធ្វើការចរចាគ្នាឡើងវិញរវាងប្រទេសឥណ្ឌានិងប្រទេសប៉ាគីស្ថាននៅពេលនេះ។
យើងបានដឹងរួចមកហើយថា ប្រទេសឥណ្ឌានិងប្រទេសប៉ាគីស្ថានជាប្រទេសបងប្អូនសត្រូវនឹងគ្នាអស់រយៈពេលជាងកន្លះសតវត្សរ៍មកហើយ។ តាំងពីឆ្នាំ១៩៤៧មក ប្រទេសទាំងពីរធ្លាប់បានធ្វើសង្គ្រាមនឹងគ្នាដល់ទៅបីលើក ពីរលើកពាក់ព័ន្ធនឹងការដណ្ដើមដែនដីCachemire។
ចំណែកឯការបែរមករកតុចរចាឡើងវិញរវាងប្រទេសទាំងពីរគឺជាការចាំបាច់ចៀសពុំផុត ដោយហេតុថាបើគ្មានសន្តិភាពនិងស្ថិរភាពនយោបាយក្នុងតំបន់ទេ ការអភិវឌ្ឍន៍ពាណិជ្ជកម្មនិងសេដ្ឋកិច្ចនៅក្នុងឧបទ្វីបឥណ្ឌាក៏ពុំអាចសម្រេចបានឡើយ។ ប្រទេសឥណ្ឌាដែលមានប្រជាជនដល់ទៅ១ ២០០លាននាក់។ រីឯប្រទេសប៉ាគីស្ថានវិញ មានប្រជាជនជិត២០០លាននាក់។
ជំនួបថ្នាក់រដ្ឋមន្ត្រីក្រសួងការបរទេសរវាងប្រទេសទាំងពីរនៅពេលនេះគឺជាជំនួបពិភាក្សាលើកទីមួយហើយ នារយៈពេល១ឆ្នាំចុងក្រោយនេះ។ ប្រទេសឥណ្ឌានិងប្រទេសប៉ាគីស្ថានដែលជាប្រទេសបងប្អូនសត្រូវនឹងគ្នា ហើយក៏ជាប្រទេសមានអាវុធនុយក្លេអ៊ែរទាំងអស់គ្នា។នៅខណៈនេះ ប្រទេសទាំងពីរយល់ឃើញថា « គេពុំត្រូវឲ្យរឿងរ៉ាវអតីតកាលក្លាយជាឧបសគ្គមកខាឃាំងដល់ទំនាក់ទំនងនៃប្រទេសឥណ្ឌានិងប្រទេសប៉ាគីស្ថានជាបងប្អូនឡើយ»។
ឆ្លើយតបទៅនឹងលោកស្រីHina Rabbani Khar រដ្ឋមន្ត្រីក្រសួងការបរទេសប៉ាគីស្ថាន លោកប្រមុខការទូតឥណ្ឌាបានថ្លែងថា “ទីក្រុងញីវ ដែលីចង់ឲ្យសន្តិភាពកើតមានរវាងប្រទេសឥណ្ឌានិងប្រទេសប៉ាគីស្ថាន។ ទីក្រុងញីវ ដែលីដែលបានផ្អាកបញ្ឈប់កិច្ចចរចាដើម្បីសន្តិភាពក្រោយពីមានអំពើភេរវកម្មដ៏ហិង្សានៅឆ្នាំ២០០៨នៅទីក្រុងBombay ដែលបានបណ្តាលឲ្យមានមនុស្សស្លាប់១៦៦នាក់។ អំពើភេរវកម្មដែលបានប្រព្រឹត្តដោយក្រុមអ៊ីស្លាមជ្រុលនិយមLashkar-e-Taïba ( LeT )ដែលមានមូលដ្ឋាននៅប្រទេសប៉ាគីស្ថាន។
ទំនាក់ទំនងប៉ាគីស្ថាន-ឥណ្ឌាដែលបានវិវឌ្ឍឈានទៅរកការចាប់ធ្វើការចរចាគ្នាឡើងវិញជាផ្លូវការក៏ដោយសារតែមានសម្ពាធពិសេសពីសហរដ្ឋអាមេរិកដែលចង់ឲ្យតំបន់ឧបទ្វីបឥណ្ឌាស្គាល់សន្តិភាពនិងស្ថិរភាព។ លោកស្រីហ៊ីល្លារីគ្លីនតុនរដ្ឋមន្ត្រីក្រសួងការបរទេសអាមេរិកកាលពីសប្តាហ៍មុនបានថ្លែងសរសើរដល់ការខិតខំប្រឹងប្រែងរបស់ប្រទេសឥណ្ឌានិងប៉ាគីស្ថានដើម្បីសម្រេចបាននូវការចាប់ចរចាគ្នាឡើងវិញជាផ្លូវការនេះ។
នាឱកាសជំនួបពិភាក្សាគ្នាជាផ្លូវការរវាងប្រទេសឥណ្ឌានិងប្រទេសប៉ាគីស្ថាននេះ ភាគីឥណ្ឌានឹងបន្តដាក់សម្ពាធទៅលើប៉ាគីស្ថានឲ្យពង្រឹងការប្រយុទ្ធប្រឆាំងនឹងក្រុមភេរវជនដែលមានទីតាំងនៅប្រទេសប៉ាគីស្ថាន។
ចំណែកឯភាគីប៉ាគីស្ថានវិញ គេនឹងធ្វើការទាមទារឲ្យដោះស្រាយបញ្ហាដែនដីCachemire។ បញ្ហាដែនដីCachemireដែលបានធ្វើឲ្យកើតមានសង្គ្រាមរវាងប្រទេសទាំងពីរជាបងប្អូនដល់ទៅពីរលើកតាំងពីឆ្នាំ១៩៤៧មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ