សហគមន៍អន្តរជាតិនាំគ្នាថ្កោលទោសភេរវកម្មនៅប៊ុមបៃ
កាលពីល្ងាចថ្ងៃពុធ ១៣ កក្កដា ២០១១ នេះ ការវាយប្រហារដោយគ្រាប់បែកច្នៃ បានកើតមានឡើងបីកន្លែងផ្ទួនៗគ្នា ក្នុងទីក្រុងប៊ុមបៃ ប្រទេសឥណ្ឌា។ មនុស្សយ៉ាងតិច ១៧នាក់បាត់បង់ជីវិត និងជាង ១៤០នាក់ផ្សេងទៀតរងរបួស។ នេះគឺជាភេរវកម្មទ្រង់ទ្រាយធំលើកដំបូង នៅប៊ុមបៃ ចាប់តាំងពីភេរវកម្ម កាលពីឆ្នាំ២០០៨ ដែលបានសម្លាប់មនុស្ស ១៦៦នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៤
គ្រាប់បែកបីគ្រាប់បានផ្ទុះឡើង នៅបីកន្លែងផ្សេងគ្នា ក៏ប៉ុន្តែ ក្នុងគម្លាតពេលពីគ្នាតែប្រមាណ ១៥នាទីប៉ុណ្ណោះ។ រដ្ឋមន្រ្តីក្រសួងមហាផ្ទៃឥណ្ឌាបានអះអាងថា នេះគឺជាការវាយប្រហារភេរវកម្ម ដោយមានការរៀបចំផែនការហ្មត់ចត់ជាមុន។
រហូតមកទល់ពេលនេះ គេនៅមិនទាន់ឃើញមានក្រុមណាមួយចេញមុខទទួលខុសត្រូវចំពោះការវាយប្រហារនេះនៅឡើយទេ។ ក៏ប៉ុន្តែ អ្នកជំនាញខាងភេរវកម្ម នៅឥណ្ឌា បានសន្និដ្ឋានថា វិធីសាស្រ្តក្នុងការវាយប្រហារនេះ គឺទំនងជាចេញពីក្រុមភេរវកម្មអ៊ីស្លាមនៅឥណ្ឌា ឈ្មោះថា មូចាហ៊ីឌីនឥណ្ឌា។
ក៏ប៉ុន្តែ រដ្ឋមន្រ្តីក្រសួងមហាផ្ទៃឥណ្ឌាបានអះអាងថា ការស៊ើបអង្កេតទើបនឹងចាប់ផ្តើមធ្វើ ដូច្នេះ គេនៅមិនទាន់អាចកំណត់មុខសញ្ញាណាមួយបាននៅឡើយទេ។
ក្រុមភេរវជន ដែលជាមុខសញ្ញាសង្ស័យដ៏ធំមួយទៀត គឺក្រុម Lashkar-e-Taiba ដែលមានមូលដ្ឋាននៅក្នុងប្រទេសប៉ាគីស្ថាន។ Lashkar-e-Taiba គឺជាក្រុមភេរវជន ដែលទទួលបាននូវការគាំទ្រពីទីភ្នាក់ងារចារកិច្ចប៉ាគីស្ថាន ដើម្បីធ្វើការប្រឆាំងនឹងឥណ្ឌា នៅតំបន់កាស្មៀរ។ គឺក្រុមនេះហើយ ដែលជាអ្នកទទួលខុសត្រូវក្នុងការវាយប្រហារនៅប៊ុមបៃ កាលពីឆ្នាំ២០០៨ ដែលធ្វើឲ្យឥណ្ឌាដកខ្លួនចេញពីកិច្ចចរចាសន្តិភាពជាមួយប៉ាគីស្ថាន។
ឥណ្ឌាទើបនឹងបានព្រមព្រៀងបើកកិច្ចចរចាជាមួយប៉ាគីស្ថានឡើងវិញ កាលពីដើមឆ្នាំ២០១១។ ជំនួបថ្នាក់មន្រ្តីជាន់ខ្ពស់នៃប្រទេសទាំងពីរ គ្រោងនឹងបើកធ្វើ នៅចុងខែកក្កដាខាងមុខនេះ។ ក៏ប៉ុន្តែ ការវាយប្រហារភេរវកម្ម កាលពីថ្ងៃពុធ កំពុងតែធ្វើឲ្យទំនាក់ទំនងឥណ្ឌា-ប៉ាគីស្ថានត្រូវប្រឈមមុខនឹងភាពស្មុគស្មាញឡើងវិញ។
លោកអូបាម៉ាបានប្រកាសថ្កោលទោសការវាយប្រហារភេរវកម្ម នៅប៊ុមបៃនេះ ហើយបានសន្យានឹងជួយក្នុងដំណើរការស៊ើបអង្កេត ប្រសិនបើឥណ្ឌាត្រូវការ។ លោកស្រីគ្លីនតុន រដ្ឋមន្រ្តីការបរទេសអាមេរិក នឹងទៅបំពេញទស្សនកិច្ចផ្លូវការនៅឥណ្ឌា នៅសប្តាហ៍ក្រោយនេះ។ អាមេរិកកំពុងតែបារម្ភខ្លាចភេរវកម្ម កាលពីថ្ងៃពុធ ធ្វើឲ្យមានភាពតានតឹងផ្នែកយោធារវាងឥណ្ឌា និងប៉ាគីស្ថាន។ ក្នុងករណីមានការប្រឈមមុខដោយអាវុធជាមួយឥណ្ឌា កងទ័ពប៉ាគីស្ថាន ដែលកំពុងតែជួយអាមេរិក ក្នុងការប្រយុទ្ធនឹងពួកតាលីបង់ នៅព្រំដែនជាមួយអាហ្វហ្កានីស្ថាន ប្រាកដជានឹងត្រូវប៉ាគីស្ថានដកយកទៅដាក់ពង្រាយនៅតាមព្រំដែនជាមួយឥណ្ឌាវិញមិនខាន។
ក្រុមប្រឹក្សាសន្តិសុខអ.ស.ប. សហភាពអឺរ៉ុប ព្រមទាំងប្រទេសជាច្រើនផ្សេងទៀត រួមមាន ស្រីលង្កា អូស្រ្តាលី និង ជាពិសេស ឥណ្ឌូណេស៊ី ដែលជាប្រទេសមានប្រជាជនកាន់សាសនាអ៊ីស្លាមច្រើនជាងគេបំផុត នៅលើពិភពលោក ក៏បានថ្កោលទោសការវាយប្រហារភេរវកម្ម កាលពីថ្ងៃពុធនេះដែរ។ បារាំង អង់គ្លេស អ៊ីស្រាអែល កាណាដា និងចិនបានចូលរួមរំលែកទុក្ខដល់ប្រជាជនឥណ្ឌា ព្រមទាំងបានសន្យាថានឹងជួយគាំទ្រឥណ្ឌា ក្នុងការប្រយុទ្ធប្រឆាំងនឹងភេរវកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ