HRW ចោទថា ឥណ្ឌារំលោភបំពានសិទ្ធិមនុស្សយ៉ាងច្រើនក្រោយពីភេរវកម្មនៅឆ្នាំ ២០០៨
អង្គការការពារសិទ្ធិមនុស្ស Human Rights Watch បានបរិហារប្រទេសឥណ្ឌា អំពីការរំលោភបំពានសិទ្ធិមនុស្ស។ នៅក្នុងរបាយការណ៍ប្រចាំឆ្នំារបស់ខ្លួន ចេញផ្សាយនាថ្ងៃម្សិលមិញHuman Rights Watch បានចោទទីក្រុង ញូដេលី ពីការធ្វើទារុណកម្ម ការរើសអើងសាសនា និងការចាប់ខ្លួនជនជាប់សង្ស័យជាច្រើននាក់ នៅក្រោយអំពើភេរវកម្មជាច្រើនបន្តបន្ទាប់គ្នា នៅឆ្នំា ២០០៨ មក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
អង្គការការពារសិទ្ធិមនុស្ស Human Right Wacth (HRW) បានចោទប្រទេស ឥណ្ឌា ថាបានរំលោភបំពានសិទ្ធិមនុស្សយ៉ាងច្រើន នៅក្នុងប្រទេស ក្រោយពីភេរវកម្មបំផ្ទុះគ្រាប់បែកនៅ ក្រុង Jaipur ក្រុង Ahmedad ប៉ែកខាងលិចប្រទេស និងនៅ ទីក្រុង New Delhi នៅឆ្នាំ២០០៨ភេរវកម្មដែលបានសម្លាប់ជីវិតមនុស្សអស់ ១៥០ នាក់។
យោងតាមរបាយការណ៍របស់ អង្គការការពារសិទ្ធិមនុស្ស HRW ពួកជនរងគ្រោះ ភាគច្រើនជាពួកអ្នកកាន់សាសនាអ៊ីស្លាម និងត្រូវបាន នគរបាលឥណ្ឌាចោទថា ជាសមាជិកនៃចលនាអ៊ីស្លាមនិយមជ្រុល Moudjahidine ឥណ្ឌា។ ចលនាអ៊ីស្លាមនិយមជ្រុល Moudjahidine នេះ បានប្រកាសថាពួកគេជាអ្នកបង្កភេរវកម្ម នៅឆ្នាំ២០០៨។
អង្គការ HRW បានបង្ហើបឲ្យដឹង ថា ជនជាប់សង្ស័យជាច្រើននាក់ ត្រូវបានគេចាប់ឃុំខ្លួនអស់រយៈពេលជាច្រើនសប្តាហ៍ ដោយគ្មានទាំងកត់ឈ្មោះទុកនៅក្នុងបញ្ជីនៃការចាប់ខ្លួនរបស់ពួកគេដែរ។ ចំណែក ការធ្វើទារុណកម្មនានាវិញ ជាញឹកញាប់ អ្នកទោសត្រូវ បានគេបិទភ្នែកមិនឲ្យមើលឃើញដោយចងបន្ទះក្រណាត់ និង ឆក់ខ្សែភ្លើង យ៉ាងវេទនា បំផុតនៅពេលដែលពួកទាហានធ្វើការសួរចម្លើយម្តងៗ។
អង្គការការពារសិទ្ធិមនុស្ស ខាងលើនេះ បានព្រមាន អាជ្ញាធរឥណ្ឌា ប្រឆាំងទល់នឹង ទង្វើ រំលោភបំពានខុសច្បាប់ទាំងនេះទៅលើពួកអ្នកទោស ដោយ ចោទថា ទាហានឥណ្ឌា មានការខ្វះខាតជាច្រើនក្នុងវិស័យអប់រំហ្វឹកហ្វឺននិងក៏ពុំឲ្យតម្លៃបន្តិចបន្តួចសោះដល់អ្នកទោស។
យ៉ាងណាមិញ ការដាក់គំនាប ដោយប្រើហិង្សា អមនុស្សធម៌បែបនេះ នឹង ជះផលវិបាកដ៏ធ្ងន់ធ្ងរ ដល់អាជ្ញាធរឥណ្ឌា ក្នុងការប្រយុទ្ធប្រឆាំងទល់នឹងអ៊ីស្លាមនិយមជ្រុលនៅក្នុងប្រទេស។
Human Right Wacth (HRW) បានបន្ថែមទៀតថា « ដោយ ពឹងផ្អែកទៅលើ ការឆ្លើយសារភាពរបស់អ្នកទោស ដោយការបង្ខិតបង្ខំ ការធ្វើទារុណកម្ម និងជួនកាលខ្លះដោយ កែច្នៃប្រឌិតផងនោះ រដ្ឋាភិបាលឥណ្ឌា អាចនឹងជ្រុលជ្រួសខ្លួន ក្នុងការ ដាក់ទណ្ឌកម្មទៅលើជនស្លូតត្រង់ និង ទុកឲ្យពួកភេរវជនមែនទែន បានរួចខ្លួន និងមានសេរីភាពនៅក្រៅការឃុំឃាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ