បងប្អូនគូសត្រូវទំាងពីរព្យាយាមចរចាស្វែងរកសន្តិភាព
នៅថ្ងៃព្រហស្បតិ៍ ទី១៥ កក្កដានេះ ប្រមុខការទូតនៃប្រទេសឥណ្ឌា និងប៉ាគីស្តង់បានផ្តើមអភិក្រមនៃកិច្ចចរចាស្វែងរកសន្តិភាពរវាង គ្នាជាថ្មីនៅក្នុងទីក្រុងអ៊ីស្លាម៉ាបាត ប្រទេសប៉ាគីស្តង់។ នេះជាលើកទីមួយហើយ តំាងក្រោយអំពើភេរវកម្ម នៅទីក្រុងបុំបៃ ប្រទេសឥណ្ឌាក្នុងខែវិច្ឆិកា ឆ្នំា ២០០៨ ដែលបានផ្តាច់ជីវិតមនុស្ស ១៦៦នាក់មក ដែលមានកិច្ចចរចាកម្រិតរដ្ឋមន្រ្តីការបរទេសរវាងមហាអំណាច បរមាណូទាំងពីរ នៅអាស៊ី។
ចុះផ្សាយនៅថ្ងៃ៖
បទអន្តរាគមន៍របស់ គួច គន្ធារ៉ា
តំាងពីក្រោយអំពើភេរវកម្មនៅទីក្រុងបុំបៃ ប្រទេសឥណ្ឌាពីថ្ងៃទី ២៦ ដល់ថ្ងៃទី ២៩ វិច្ឆិកា ឆ្នំា ២០០៨ ដែលបានបណ្តាលឲ្យបាត់បង់ជីវិតមនុស្ស ១៦៦នាក់មក ឥណ្ឌា និងប៉ាគីស្តង់មិនដែលបានអង្គុយចរចាទល់មុខគ្នាក្នុងក្របខ័ណ្ឌនៃអភិក្រមស្វែងរកសន្តិភាពរវាងគ្នាជាថ្មីទេ។ កាលពីខែមេសា ឆ្នំា ២០១០នេះ លោកនាយករដ្ឋមន្ត្រីឥណ្ឌា និងលោកនាយករដ្ឋមន្រ្តីប៉ាគីស្តង់បានជួបគ្នាមួយរយៈពេលខ្លីនៅក្នុងប្រទេសប៊ូតង់។ ជំនួបកាលណោះ គឺនៅក្រៅក្របខ័ណ្ឌនៃសន្និសីទតំបន់រៀបចំក្នុងប្រទេសប៊ូតង់។ ជាជំនួបមួយមិនបានគ្រោងទុក តែដោយអ្នកទំាងពីរបានទៅចូលរួមនៅក្នុងសន្និសីទនោះហើយ ក៏បានជួបចាប់ដៃគ្នាជាការគួរសម ដោយមិនបានលើកយកអ្វីមកនិយាយឲ្យបានប្រាកដប្រជាទេ។ បន្ទាប់មកនៅក្នុងថ្ងៃទី ២៤ ខែមិថុនា ទើបមានជំនួបទល់មុខគ្នានៅក្នុងទីក្រុង New Delhi តែត្រឹមថ្នាក់រដ្ឋលេខាធិការក្រសួងការបរទេស។ គឺតាមរយៈកិច្ចចរចាថ្នាក់រដ្ឋលេខាធិការក្រសួងការបរទេសកាលពីខែមិថុនានោះឯង ដែលនំាឲ្យមានកិច្ចចរចាថ្នាក់រដ្ឋមន្រ្តីការបរទេស នៅថ្ងៃនេះ។
ទីភ្នាក់ងារចារកិច្ចប៉ាគីស្តង់ ជាអ្នកបញ្ជាអំពើភេរវកម្មនៅក្រុងបុំបៃក្នុងឆ្នំា២០០៨
អ្វីជាការកត់សម្គាល់ កិច្ចចរចាថ្ងៃនេះបានចាប់ផ្តើមឡើង ចំពេលដែលឥណ្ឌាបានចោទទីភ្នាក់ងារចារកិច្ចប៉ាគីស្តង់ Inter Service Intelligence ថាជាអ្នកនៅពីក្រោយអំពើភេរវកម្មក្នុងទីក្រុងបុំបៃ កាលពី ២ឆ្នំាមុននោះ។ តែការដែលឥណ្ឌាបានលើកឡើងរបៀបនេះ មិនបានធ្វើឲ្យកិច្ចចរចាខកខានទេ។ គេអាចថាជាឆន្ទៈរបស់ឥណ្ឌាផងក៏ថាបាន តែសម្រាប់ភាគីប៉ាគីស្តង់វិញ ជារឿងមួយដែលបានធ្វើឲ្យខ្លួនមានការទើសទាល់ចិត្តយ៉ាងខ្លំាង។
ការចោទរបស់ឥណ្ឌាត្រូវបានធ្វើឡើងដោយមន្រ្តីជាន់ខ្ពស់ម្នាក់នៃក្រសួងការបរទេស គឺលោក GK Pillai។ លោក Pillai ដែលបានចង្អុលចំមុខទីភ្នាក់ងារចារកិច្ចប៉ាគីស្តង់ Inter Service Intelligence ថាជាអ្នកដែលបានរៀបចំ និងបញ្ជាតំាងពីដើម រហូតដល់ចុងបញ្ចប់ នៅក្នុងអំពើភេរវកម្មប្រឆំាងសណ្ឋាគារមួយក្នុងទីក្រុងបុំបៃពីថ្ងៃទី ២៦ ដល់ថ្ងៃទី ២៩ វិច្ឆិកា ឆ្នំា ២០០៨។ ការលើកឡើងរបស់លោក Pillai ពេលនេះបានធ្វើឡើង ដោយសំអាងលើចម្លើយសារភាពរបស់ជន David Hedley កាលពីខែមិថុនាកន្លងទៅ។ David Hedley ជាជនជាតិអាមេរិកំាង ដើមកំណើតប៉ាគីស្តង់ និងដែលត្រូវបានឃាត់ខ្លួនលើទឹកដីអាមេរិកំាង។ David Hedley បានសារភាពថា បានចូលរួមរៀបចំអំពើភេរវកម្មក្នុងទីក្រុងបុំបៃ និងថា ខ្លួនមានការទាក់ទងជាអចិន្ត្រៃយ៍ជាមួយទីភ្នាក់ងារចារកិច្ចប៉ាគីស្តង់។ គួរជម្រាបជូនថា ឥណ្ឌាមានការសង្ស័យ និងបានចោទទីភ្នាក់ងារចារកិច្ចប៉ាគីស្តង់ដោយបញ្ឆិតបញ្ឆៀងតំាងតែពីដំបូងមកម្ល៉េះ និងដែលប៉ាគីស្តង់តែងតែបដិសេធជានិច្ច។
គេគ្មានសង្ឃឹមលទ្ធផលអ្វី ជាដុំកំភួន
តំាងតែពីឆ្នំា ២០០៤មកម្ល៉េះ ដែលឥណ្ឌា និងប៉ាគីស្តង់បានផ្តើមអភិក្រមនៃកិច្ចចរចាស្វែងរកសន្តិភាពរវាងគ្នា ដោយផ្តោតជាពិសេស នៅក្នុងជម្លោះដណ្តើមទឹកដីគ្នានៅតំបន់ Cachemire ។ គឺដោយសារតែតាមរយៈកិច្ចចរចាកាលណោះឯង ដែលបានធ្វើឲ្យភាពតានតឹងរវាងមហាអំណាចបរមាណូទាំងពីរនៅអាស៊ី មានការចុះថយមួយកម្រិតក្នុងអំឡុងពេលប៉ុន្មានឆ្នំាចុងក្រោយនេះ។ សូមជម្រាបជូនថា តំាងពីឆ្នំា ១៩៤៧មក ឥណ្ឌា និងប៉ាគីស្តង់បានធ្វើសង្គ្រាមនឹងគ្នាចំនួនបីលើករួចមកហើយ ក្នុងនោះមានពីរលើកទាក់ទងនឹងជម្លោះដណ្តើមទឹកដីគ្នានៅ Cachemire។ បន្ទាប់មក សង្រ្គាមហៀបតែនឹងផ្ទុះម្តងទៀតកាលពីឆ្នាំ ២០០១។
តែតំាងពីក្រោយអំពើភេរវកម្មនៅក្នុងទីក្រុងបុំបៃមក ឥណ្ឌាចង់ឲ្យការចរចាផ្តោតជាសំខាន់លើសំណុំរឿងភេរវកម្ម។ អ្វីដែលទីក្រុង New Delhi ចង់បាន គឺកិច្ចសហប្រតិបត្តិការប្រឆាំងនឹងភេរវកម្មអ៊ីស្លាមនិយមជ្រុល។ មួយវិញទៀតគេឃើញថា ការដែលឥណ្ឌាបានចោទទីភ្នាក់ងារចារកិច្ចប៉ាគីស្តង់ Inter Service Intelligence ថាជាអ្នកដែលបានរៀបចំ និងបញ្ជាអំពើភេរវកម្មនៅទីក្រុងបុំបៃ អាចជាការដាក់សម្ពាធជាមុនលើកិច្ចចរចា។ តែយ៉ាងណាក៏ដោយ ចំពោះប៉ាគីស្តង់វិញ គឺចង់ឲ្យកិច្ចចរចាផ្តោតភ្លាមៗទៅលើសំណុំរឿងដែនដីនៅតំបន់ Cachemire។
សរុបមកវិញ គេពិតជាមិនអាចរង់ចំាលទ្ធផលវិជ្ជមានណាមួយទេ។ កុំថាឡើយសហគមន៍អន្តរជាតិ សូម្បីតែឥណ្ឌា និងប៉ាគីស្តង់ខ្លួនឯងដែលជាភាគីជម្លោះក៏មិនបានបានរង់ចំាលទ្ធផលអ្វីជាដុំកំភួនដែរ។ មែនទែនទៅ អ្វីដែលសំខាន់នៅពេលនេះ មិនមែនលទ្ធផលវិជ្ជមាន ឬអវិជ្ជមានទេ សំខាន់គឺការដែលបងប្អូនជម្លោះទំាងពីរបានយល់ព្រមអង្គុយចរចាទល់មុខគ្នា។
ហេតុអ្វីបានជាឥណ្ឌាសុទ្ធចិត្តចូលអង្គុយចរចា ?
ការពិតគឺសហគមន៍អន្តរជាតិ ពិសេសសហរដ្ឋអាមេរិក ដែលបានបង្ខំថ្នាក់ដឹកនាំឥណ្ឌាឲ្យត្រឡប់ទៅចរចាស្វែងរកសន្តិភាពជាមួយប៉ាគីស្តង់វិញ។ យើងដឹងហើយថាបច្ចុប្បន្ន សហរដ្ឋអាមេរិកកំពុងបន្តសង្គ្រាមនៅក្នុងប្រទេសអាហ្វហ្កានីស្តង់ និងដែលពឹងពាក់ប្រទេសប៉ាគីស្តង់ខ្លាំងនៅក្នុងសង្គ្រាមនេះ។ អ៊ីចឹង អាមេរិកពិតជាមិនចង់ឃើញឥណ្ឌា និងប៉ាគីស្តង់ឈ្លោះប្រកែកគ្នាទេ និងពិតជាមិនចង់ឃើញសង្គ្រាមផ្ទុះឡើងជាថ្មីរវាងឥណ្ឌា និង ប៉ាគីស្តង់ទេ ព្រោះថា ភាពតានតឹងជាអចិន្រៃ្តយ៍រវាងឥណ្ឌា និងប៉ាគិស្តង់ នឹងនំាសមត្ថភាពរបស់ប៉ាគីស្តង់ចុះថយនៅក្នុងការជួយអាមេរិក ដើម្បីកំចាត់ពួកអាល់កៃដា និងពួកតាលីបង់នៅក្នុងប្រទេសអាហ្វហ្វានីស្តង់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ