ការបារម្ភខ្លាចមាន”សង្គ្រាមរូបិយវត្ថុ”មុនជំនួបកំពូលG20
ចុះផ្សាយនៅថ្ងៃ៖
ស្តាប់ - ០៣:៥៥
ក្តីបារម្ភខ្លាចកើតមាន”សង្គ្រាមរូបិយវត្ថុ”បានកើនកាន់តែខ្លាំងឡើងៗនៅថ្ងៃពុធទី១០វិច្ឆិកានេះ មុនជំនួបកំពូលG20នៅទីក្រុងសេអ៊ូលនៃប្រទេសកូរ៉េខាងត្បូង។ ប្រទេសសមាជិកសំខាន់ៗនៃក្រុមប្រទេសG20បានចោទសហរដ្ឋអាមេរិកថា បានគំរាមដល់ស្ថិរភាពសេដ្ឋកិច្ចពិភពលោក។
សហរដ្ឋអាមេរិកត្រូវគេចោទថា បានគំរាមដល់ស្ថិរភាពសេដ្ឋកិច្ចពិភពលោក ដោយហេតុតែធនាគារកណ្តាលអាមេរិកបានប្រកាសថានឹងចាក់បញ្ចូលសាច់ប្រាក់ប្រមាណ៦០០ពាន់លានដុល្លារបន្ថែមទៀតទៅក្នុងសេដ្ឋកិច្ចអាមេរិកាំងតាមរយៈការទិញប័ណ្ណរតនាគារនិងតាមរយៈវិធានការមួយចំនួនទៀត ដើម្បីជួយជំរុញឲ្យសេដ្ឋកិច្ចអាមេរិកាំងមានសន្ទុះលឿនទៅមុខ។ ទង្វើបោះពុម្ពក្រដាសប្រាក់ដុល្លារយកមកទិញប័ណ្ណរតនាគារនេះនឹងបណ្តាលឲ្យតម្លៃប្រាក់ដុល្លារធ្លាក់ស្រុតចុះថ្លៃ។
តាមរយៈប្រាក់ដុល្លារអាមេរិកធ្លាក់ចុះថ្លៃនេះហើយ ដែលទីក្រុងវ៉ាស៊ីនតោនសង្ឃឹមពង្រីកការនាំទំនិញអាមេរិកាំងចេញទៅលក់ក្រៅប្រទេស។ ទាំងនេះជាមូលហេតុនាំឲ្យប្រទេសសមាជិកសំខាន់ៗនៃក្រុមប្រទេសG20ចោទសហរដ្ឋអាមេរិកថាជាអ្នកមេនាំភ្លើងបង្កឲ្យមាន”សង្គ្រាមរូបិយវត្ថុ”។
សូមបញ្ជាក់ថា ក្រុមប្រទេសG20ដែលតំណាងដល់ទៅ៩០%នៃសេដ្ឋកិច្ចសរុបពិភពលោកនឹងជួបប្រជុំគ្នាជាលើកទីប្រាំចាប់តាំងពីឆ្នាំ២០០៨មក។
ជំនួបកំពូលG20នេះបានត្រូវគេរៀបចំឲ្យមានឡើង៖
-ដើម្បីគេចចៀសពីគ្រោះថ្នាក់ដែលបង្កឡើងដោយ”នយោបាយការពារផលិតផលក្នុងស្រុកជ្រុលហួសហេតុ”។
-ដើម្បីគេចចៀសពីវិបត្តិសេដ្ឋកិច្ចពិភពលោកដើរថយក្រោយក្រោយពីមានវិបត្តិហិរញ្ញវត្ថុនៅឆ្នាំ២០០៨។
-ហើយនិងដើម្បីធ្វើការកាត់បន្ថយវិសមតាក្នុងការដោះដូរពាណិជ្ជកម្ម។
ដើម្បីសម្រេចឲ្យបាននូវគោលបំណងទាំងនេះ សហរដ្ឋអាមេរិកបានទាមទារឲ្យប្រទេសសំខាន់ៗក្នុងការនាំទំនិញចេញទៅលក់ក្រៅប្រទេសសន្យាធ្វើការកាត់បន្ថយសំណល់ផលពាណិជ្ជកម្មរបស់ខ្លួន កុំឲ្យមានលក្ខណៈជ្រុលហួសហេតុពេក។
ហើយទីក្រុងវ៉ាស៊ីនតោនក៏បានផងដែរទាមទារឲ្យប្រទេសចិនចាត់ការដំឡើងថ្លៃប្រាក់យ័នរបស់ខ្លួនឲ្យបានឆាប់រហ័ស ពីព្រោះបច្ចុប្បន្ននេះ តម្លៃប្រាក់យ័នចិនមានតម្លៃថោកជ្រុលពេកដែលជាមូលហេតុនាំឲ្យជញ្ជីងពាណិជ្ជកម្មអាមេរិកាំងមានឧនភាពយ៉ាងសែនធ្ងន់ធ្ងរក្នុងការដោះដូរពាណិជ្ជកម្មជាមួយប្រទេសចិន។
ប្រទេសចិននិងប្រទេសអាល្លឺម៉ង់ពុំយល់ព្រមតាមការទាមទាររបស់អាមេរិកាំងឲ្យដាក់កម្រិតទៅលើសំណល់ផលពាណិជ្ជកម្មក្នុងការដោះដូរដែលពុំចង់ឲ្យមានលើសពី៤%នៃផលិតផលដុលក្នុងប្រទេសឡើយ។ ផ្ទុយទៅវិញ ប្រទេសចិន ប្រទេសអឺរ៉ុបមានជាអាទិ៍ប្រទេសអាល្លឺម៉ង់បានធ្វើការទិតៀនយ៉ាងខ្លាំងក្លាទៅលើនយោបាយជំរុញឲ្យមានសន្ទុះកំណើនសេដ្ឋកិច្ចអាមេរិកាំង ហើយនិងនយោបាយបញ្ចុះថ្លៃប្រាក់ដុល្លារអាមេរិកខុសបែបបទ ដែលអាចជាមូលហេតុនាំឲ្យមាន”សង្គ្រាមរូបិយវត្ថុ”។
លោកស្រីនាយករដ្ឋមន្ត្រីអាល្លឺម៉ង់Angela Merkelបានថ្លែងឲ្យដឹងថា “ប្រាក់អឺរ៉ូពុំត្រូវមកទទួលរងថ្មបាក់ដោយហេតុតែនយោបាយរូបិយវត្ថុអាមេរិកាំងដែលចង់បញ្ចុះថ្លៃប្រាក់ដុល្លារឲ្យថោកដើម្បីជាការងាយស្រួលក្នុងការនាំទំនិញអាមេរិកាំងចេញទៅលក់ក្រៅប្រទេសនោះឡើយ”។
ចំណែកឯប្រទេសបារាំងដែលត្រូវធ្វើជាប្រធាននៃក្រុមប្រទេសG20បន្ទាប់ពីប្រទេសកូរ៉េខាងត្បូងគ្រោងធ្វើកំណែទម្រង់ទៅលើប្រព័ន្ធរូបិយវត្ថុអន្តរជាតិដើម្បីប្រឆាំងនឹង”សង្គ្រាមរូបិយវត្ថុ”។ ក៏ប៉ុន្តែការដ្ឋាននៃកំណែទម្រង់ទៅលើប្រព័ន្ធរូបិយវត្ថុអន្តរជាតិនេះ ពិតជាការដ្ឋានមួយដ៏សែនស្មុគស្មាញនិងដ៏សែនលំបាកក្រៃលែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ