មេដឹកនាំភូមាចាកចេញពីតំណែងយោធាមុនការបោះឆ្នោតសភា
ចុះផ្សាយនៅថ្ងៃ៖
ស្តាប់ - ០៥:០១
នៅថ្ងៃសុក្រទី២៧សីហាមេដឹកនាំរបបសឹកភូមាបីរូបសំខាន់ៗបាន ប្រកាសលាចេញពីមុខតំណែងយោធា។ ទាំងនេះក្នុងគោលបំណងរៀបចំខ្លួនដើម្បីឡើងកាន់កាប់មុខតំណែងសំខាន់ៗ ក្រោយការបោះឆ្នោតសភាដែលគ្រោងរៀបចំធ្វើនៅខែវិច្ឆិកាខាងមុខ។
នៅក្នុងចំណោមមេដឹកនាំរបបសឹកភូមាបីរូបសំខាន់ៗដែលបានប្រកាសលាចេញពីមុខតំណែងយោធា គេកត់សម្គាល់ឃើញមាន ឧត្តមសេនីយThan Shwe ដែលជាប្រមុខដឹកនាំនៃរបបសឹកភូមា ហើយនិងសហការីដ៏ស្និទ្ធពីររូបទៀតរបស់លោក Than Shwe ពោលគឺលោកMuang Aye និងលោកThura Shwe Man ដែលត្រូវបោះបង់ឯកសណ្ឋានយោធាហើយងាកមកយកឯកសណ្ឋានស៊ីវិល សម្រាប់ចូលរួមធ្វើការបោះឆ្នោតសភានៅខែវិច្ឆិកាខាងមុខនេះ ដើម្បីកាន់កាប់តំណែងជាប្រធានាធិបតីឬជាអនុប្រធានាធិបតីឬជារដ្ឋមន្ត្រី។
ការបោះឆ្នោតសភាបានត្រូវគេគ្រោងរៀបចំធ្វើនៅថ្ងៃទី៧វិច្ឆិកាឆ្នាំ២០១០។ នេះជាការបោះឆ្នោតសភាលើកទីមួយហើយនៅប្រទេសភូមា ក្រោយពីមានការបោះឆ្នោតសភានៅឆ្នាំ១៩៩០ដែលកាលណោះ លោកស្រីAung Sann Suu Kyi ជ័យលាភីរង្វាន់ណូបែលសន្តិភាពបានទទួលជោគជ័យយ៉ាងត្រចះត្រចង់។ ក៏ប៉ុន្តែរបបសឹកភូមាពុំព្រមទទួលស្គាល់លទ្ធផលនៃការបោះឆ្នោតសភានោះ ហើយបានចាប់ឃុំខ្លួនលោកស្រីAung Sann Suu Kyi។
គួរកត់សម្គាល់ថា ដើម្បីរៀបចំខ្លួនចូលធ្វើការបោះឆ្នោតសភានៅថ្ងៃទី៧វិច្ឆិកាខាងមុខនេះ អ្នកដឹកនាំរបបសឹកភូមាសំខាន់ៗបានលាចេញពីតំណែងយោធា ហើយទុកឲ្យសហការីរបស់ខ្លួនកាន់កាប់តំណែងជំនួស។
ប្រភពខ្លះបានឲ្យដឹងថា លោកThan Shwe នៅតែបន្តកាន់កាប់តួនាទីជាប្រមុខដឹកនាំនៃរបបសឹកភូមា រហូតដល់មានការតែងតាំងប្រធានាធិបតីថ្មី ហើយតំណែងជាប្រមុខដឹកនាំនៃកងកម្លាំងយោធាភូមា លោកThan Shweប្រគល់ឲ្យទៅឧត្តមសេនីយThura Myint Aung។
សូមគូសបញ្ជាក់ថា ក្រោយការបោះឆ្នោតសភានៃថ្ងៃទី៧វិច្ឆិកាឆ្នាំ២០១០ សភាភូមាទាំងពីរត្រូវបោះឆ្នោតជ្រើសតែងតាំងប្រធានាធិបតីក្នុងចំណោមបេក្ខជនបីរូប។ លោកប្រធានាធិបតីត្រូវរៀបចំបង្កើតរដ្ឋាភិបាល។ ហើយបេក្ខជនទាំងពីរូបដែលនៅសល់ត្រូវកា្លយជាអនុប្រធានាធិបតី។
ដូច្នេះ សកម្មភាពប្តូរប្រែប្រួលនៅក្នុងជួរយោធានារយៈប៉ុន្មានថ្ងៃចុងក្រោយនេះ បង្ហាញឲ្យឃើញថា គេគ្រោងឲ្យលោកThan Shweអាយុ៧២ឆ្នាំឡើងកាន់តំណែងជាប្រធានាធិបតី ហើយសហការីទាំងពីររូបរបស់លោកThan ShweពោលគឺលោកMuang Aye អាយុ៧២ឆ្នាំនិងលោកThura Shwe Man អាយុ៦៩ឆ្នាំនឹងទទួលបានតំណែងជាអនុប្រធានាធិបតី។
ការប្តូរប្រែឯកសណ្ឋានយោធារបស់ក្រុមមេដឹកនាំរបបសឹកភូមាមកជាស៊ីវិលគ្រាន់តែជាការបោកប្រាស់សម្រាប់រៀបចំធ្វើការបោះឆ្នោតសភា និងដើម្បីបោកបញ្ឆោតសាធារណមតិនិងសហគមន៍អន្តរជាតិប៉ុណ្ណោះ។ ហេតុដូច្នេះហើយបានជាសហគមន៍អន្តរជាតិបាននាំគ្នាស្រែកបរិហារពីការរៀបចំធ្វើការបោះឆ្នោតសភាបោកប្រាស់នៅថ្ងៃទី៧វិច្ឆិកាខាងមុខនេះ ហើយបានទាមទារឲ្យរបបសឹកដោះលែង លោកស្រីAung Sann Suu Kyi ជ័យលាភីរង្វាន់ណូបែលសន្តិភាពហើយនិងអ្នកទោសនយោបាយភូមាឯទៀតៗជាបន្ទាន់។
គួរកត់សម្គាល់ថា នៅឆ្នាំ២០១០នេះ មាននាយទាហានភូមា២៧នាក់ហើយដែលបានលាចេញពីមុខតំណែងយោធាហើយបានក្លាយខ្លួនជារដ្ឋមន្ត្រី។
ហើយលោកThura Shwe Man ដែលមានអាយុ៦៩ឆ្នាំក៏ជាមនុស្សម្នាក់ដែលគេសម្គាល់ឃើញថា កំពុងតែមានអំណាចកាន់តែច្រើនឡើងៗនៅប្រទេសភូមានារយៈពេលប៉ុន្មានឆ្នាំចុងក្រោយនេះ។ ប៉ុន្តែគេពិបាកនឹងដឹងណាស់ថា តើក្រុមឧត្តមសេនីយភូមានឹងធ្វើការចែកអំណាចគ្នាយ៉ាងដូចម្តេចនៅគ្រាដែលពួកគេបានក្លាយទៅជាស៊ីវិល។ ក៏ប៉ុន្តែ អ្វីដែលគេដឹងច្បាស់គឺថា សកម្មភាពនៅប៉ុន្មានខែចុងក្រោយនេះរបស់ក្រុមឧត្តមសេនីយដែលបានកាន់កាប់អំណាចនៅប្រទេសភូមាអស់រយៈជាច្រើនទសវត្សរ៍មកហើយនោះ កំពុងតែរៀបចំធ្វើការបន្តកាន់កាប់អំណាចនៅប្រទេសភូមាតទៅទៀត ពួកគេពុំងាយនឹងបោះបង់ចោលអំណាចងាយៗនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ