ការបារម្ភខ្លាចអំពើហិង្សាកើតមានឡើងវិញនៅប្រទេសថៃ
ចុះផ្សាយនៅថ្ងៃ៖
ស្តាប់ - ០៣:៥៨
ការវាយប្រហារពីរលើកបន្តបន្ទាប់គ្នា នៅថ្ងៃទី៧និងនៅថ្ងៃទី៨ឧសភានៅកណ្តាលទីក្រុងបាងកកដែលបានបណ្តាល ឲ្យនគរបាលពីរនាក់ស្លាប់និងរបួសដប់ប្លាយនាក់ដែលក្នុងនោះមាន នគរបាលនិងជនស៊ីវិល។ ការវាយប្រហារនេះបានបង្កើនក្តីបារម្ភខ្លាចអំពើហិង្សាកើតមានឡើង វិញនៅប្រទេសថៃ នៅខណៈដែលមេដឹកនាំអាវក្រហមហាក់ដូចជាយល់ព្រមអំពានាវឲ្យបញ្ឈប់ ធ្វើបាតុកម្មដែលបានអូសបន្លាយអស់រយៈពេលជិតពីរខែ។
ការវាយប្រហារលើកទីមួយបានប្រព្រឹត្តទៅនៅយប់ថ្ងៃសុក្រទី៧ឧសភានៅវេលាម៉ោង២៣និង៣០នាទីដោយមនុស្សជិះម៉ូតូពីរនាក់បាញ់រះទៅលើជនមួយក្រុមដែលប្រឆាំងនឹងពួកអាវក្រហមដែលធ្វើបាតុកម្មនៅសង្កាត់ពាណិជ្ជកម្មSilom នៅទីក្រុងបាងកក។ ការវាយប្រហារនេះ បានបណ្តាលឲ្យនគរបាលបីនាក់រងរបួសដែលក្នុងចំណោមនេះមានម្នាក់បានស្លាប់នៅមន្ទីរពេទ្យ។
បីម៉ោងក្រោយមក គ្រាប់បែកបីគ្រាប់បានត្រូវគេបាញ់ទៅលើប៉ុស្តិ៍នគរបាលដែលឋិតនៅចម្ងាយតែប៉ុន្មានរយម៉ែត្រប៉ុណ្ណោះពីទីកន្លែងកើតហេតុលើកទីមួយ។ ការវាយប្រហារលើកទីពីរនេះ បានបណ្តាលឲ្យនគរបាលម្នាក់ទៀតរងរបួសស្លាប់។
ក្រោយពីមានការយល់ព្រមទទួលយកផែនការផ្សះផ្សារជាតិរបស់រដ្ឋាភិបាលដោយមេដឹកនាំអាវក្រហម ការវាយប្រហារពីរលើកនៅកណ្តាលទីក្រុងបាងកកបែបនេះ បានធ្វើឲ្យគេកើតមានការងឿងឆ្ងល់។ អ្នកខ្លះបានសន្និដ្ឋានថា ទង្វើហិង្សាទាំងនេះប្រហែលជាស្នាដៃរបស់ក្រុមអាវក្រហមដែលមាននិន្នាការជ្រុលនិយមដែលមានគំនិតចង់បំផ្លិចបំផ្លាញផែនការផ្សះផ្សារជាតិ។
ក្រុមអាវក្រហមដែលមាននិន្នាការជ្រុលនិយមដែលមានគំនិតចង់បំផ្លិចបំផ្លាញផែនការផ្សះផ្សារជាតិនេះ អាចនឹងទទួលការបង់ខាតច្រើន។ រដ្ឋាភិបាលបានចេញដីកាតាមចាប់ខ្លួនមេដឹកនាំនៃក្រុមអាវក្រហមដែលមាននិន្នាការជ្រុលនិយមដែលគេសង្ស័យថាជាអ្នកបានបង្កឲ្យកើតមានអំពើហិង្សាកាលពីខែមុននៅទីក្រុងបាងកក។
ដូច្នេះ គេនៅរង់ចាំមើលប្រតិកម្មរបស់រដ្ឋាភិបាលថាតើលោកអភិស៊ីទនឹងចាត់វិធានការណាទៀត។ រដ្ឋាភិបាលអភិស៊ីទដែលមានការពុំពេញចិត្តយ៉ាងខ្លាំងនៅចំពោះមុខបាតុករអាវក្រហមដែលពុំដកខ្លួនថយចេញពីសង្កាត់ពាណិជ្ជកម្មដែលឋិតនៅកណ្តាលទីក្រុងបាងកក ក្រោយពីបានយល់ព្រមទទួលផែនការផ្សះផ្សារជាតិ។
ការផ្ទុះចេញឡើងនូវអំពើហិង្សានៅពេលថ្មីៗនេះបញ្ជាក់បង្ហាញឲ្យឃើញថា វិបត្តិនយោបាយដ៏រ៉ាំរ៉ៃនេះនឹងអាចបន្តញាំញីប្រទេសថៃនៅរយៈពេលប៉ុន្មានខែខាងមុខនេះទៀត។
គួរកត់សម្គាល់ថា ពួកបាតុករអាវក្រហមដែលគាំទ្រលោកអតីតនាយករដ្ឋមន្ត្រីថាក់ ស៊ីនធ្លាប់បានប្រមួលផ្តុំគ្នាបានប្រមាណ១០០ ០០០នាក់នៅទីក្រុងបាងកកកាលពីខែមីនាកន្លងទៅ ដើម្បីទាមទារឲ្យលោកនាយករដ្ឋមន្ត្រីអភិស៊ីទចាកចេញពីមុខតំណែង។ ហើយស្រាប់តែអំពើហិង្សានៅពេលថ្មីៗនេះបានកើតមាននៅចំពេលដែលការរិះរកដំណោះស្រាយឲ្យវិបត្តិនយោបាយថៃហៀបនឹងរកច្រកចេញរួច។
ផែនទីចង្អុលផ្លូវសម្រាប់ផ្សះផ្សារជាតិស្នើដោយលោកអភិស៊ីទដែលគ្រោងរៀបចំធ្វើការបោះឆ្នោតសភានៅថ្ងៃទី១៤វិច្ឆិកាខាងមុខនេះបានទទួលការយល់ព្រមពីសំណាក់ពួកអាវក្រហម។ ហើយអ្វីដែលធ្វើឲ្យវិបត្តិនយោបាយថៃរិតតែស្មុគ្រស្មាញបន្ថែមទៀតគឺពួកអាវលឿងអ្នករាជានិយមដែលជាអ្នកគាំទ្រលោកអភិស៊ីទបានថ្លែងបរិហារពីភាពទន់ខ្សោយរបស់រដ្ឋាភិបាល ដោយពួកអាវលឿងបានទាមទារឲ្យលុបចោលការរៀបចំធ្វើការបោះឆ្នោតសភាមុនចប់អាណត្តិ។
ដូច្នេះឃើញថា វិបត្តិនយោបាយថៃកំពុងវិវត្តទៅរកស្ថានភាពមួយដ៏សែនស្មុគ្រស្មាញនិងដ៏គួរឲ្យបារម្ភ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ