ការបង្ហូរឈាមរវាងថៃនឹងថៃឬConsensusសម្រុះសម្រួលគ្នា?
ប្រទេសថៃចាំបាច់ត្រូវតែរកឲ្យឃើញនូវConsensus នយោបាយឬកិច្ចព្រមព្រៀងសម្រុះសម្រួលគ្នាមួយ បើប្រសិនជាគេចង់ចេញឲ្យផុតពីវិបត្តិដ៏សែនធ្ងន់ធ្ងរដែលអាចនឹងរុញ ច្រានប្រទេសថៃឲ្យធ្លាក់ទៅក្នុងជ្រោះមហន្តរាយនៃសង្គ្រាមស៊ីវិល។
ចុះផ្សាយនៅថ្ងៃ៖ កែប្រែថ្ងៃទី៖
បទអត្ថាធិប្បាយរបស់សៀក សារិន
ក្រោយពីមានការវាយប្រហារដោយបាញ់បំផ្លោងគ្រាប់បែកកាលពី ថ្ងៃព្រហស្បតិ៍កន្លងទៅដែលបានបណ្តាលឲ្យមានមនុស្សស្លាប់ ម្នាក់និងរបួសជាង៨០នាក់ ហើយនិងការវាយប្រយុទ្ធគ្នាយ៉ាងសាហាវរវាងបាតុករអាវក្រហម នឹងនគរបាលថៃ កាលពីថ្ងៃទី១០មេសាដែលបានបណ្តាលឲ្យមានមនុស្សស្លាប់២៥ នាក់និងរបួសជាង៨០០នាក់ ដែលបានរុញច្រានឲ្យប្រទេសថៃធ្លាក់ទៅក្នុងជ្រោះវិបត្តិ ដ៏ខ្មៅងងឹតរួចមក អ្នកដឹកនាំនិងសកម្មជនខ្លះនៃភាគីអាវក្រហមដែលគាំទ្រលោក ថាក់ស៊ីន និងភាគីអាវលឿងដែលគាំទ្រលោកអភិស៊ីទហាក់ដូចជាចង់ស្វែងរក ធ្វើការចរចានឹងគ្នា។
ក៏ប៉ុន្តែគ្រោះកាចសាហាវនៃអំពើហិង្សាឋិតនៅពុំឆ្ងាយពី គូបដិបក្សទាំងពីរឡើយ។ ដោយហេតុថា ការវាយប្រយុទ្ធតទល់គ្នារវាងពួកអាវក្រហមដែលប្រឆាំងនឹងរដ្ឋាភិបាល អភិស៊ីទហើយនិងនគរបាលថៃអាចកើតមាននៅរាល់ពេលវេលា។
គួរកត់សម្គាល់ថា ប្រទេសថៃដែលគេមើលឃើញមានភាពញញឹមស្រស់នៅសំបកក្រៅ តាមពិតមានបង្កប់នូវភាពហិង្សាយ៉ាងច្រើននៅខាងក្នុង។ ចាប់តាំងពីមានការរៀបចំឲ្យមានឡើងនូវរបបរាជាធិបតេយ្យអាស្រ័យ នឹងរដ្ឋធម្មនុញ្ញនៅឆ្នាំ១៩៣២មក គេសម្គាល់ឃើញប្រទេសថៃបានជួបនឹងរដ្ឋប្រហារឬការប៉ុនប៉ងធ្វើ រដ្ឋប្រហារដល់ទៅ១៨លើក។
ប្រវត្តិសាស្ត្រនៃប្រទេសថៃក៏ធ្លាប់បានហែលឆ្លងកាត់សម័យកាលបង្ហូរឈាម និងការប្រយុទ្ធគ្នាយ៉ាងសាហាវរវាងយោធានឹងក្រុមបាតុករ មានដូចជានៅឆ្នាំ១៩៩២ ដែលកាលណោះព្រះចៅBhumibol Adulyadej ព្រះមហាក្សត្រថៃដែលជាអ្នកបង្រួបបង្រួមប្រទេសជាតិបានយាងចេញធ្វើ ព្រះរាជអន្តរាគមន៍ដើម្បីបិទបញ្ចប់អធិករណ៍រវាងគូបដិបក្ស។
លើកនេះ ព្រះចៅBhumibol Adulyadej ព្រះមហាក្សត្រថៃទ្រង់នៅស្ងៀមស្ងាត់ ដោយហេតុតែទ្រង់ព្រះប្រឈួនហើយគង់នៅមន្ទីរពេទ្យតាំងពីខែកញ្ញា ម៉្លេះ។ ក្រុមបាតុករអាវក្រហមបានសុំព្រះរាជអន្តរាគមន៍ពីព្រះមហាក្សត្រ ក៏ប៉ុន្តែព្រះអង្គពុំបានយាងចេញមកធ្វើអន្តរាគមន៍ជាសាធារណៈឡើយ។
អស់រយៈរាប់ទសវត្សរ៍មកហើយ ឥស្សរជននៅទីក្រុងបាងកកដែលជាអ្នកជំនិតនឹងព្រះរាជវាំង មានដូចមន្ត្រីរាជការ យោធាជាន់ខ្ពស់ និងអ្នកមានទ្រព្យសម្បត្តិគឹជាអ្នកបានទាញយកផលចំណេញពីការរីក ចម្រើនលូតលាស់នៃសេដ្ឋកិច្ចថៃ។ ក៏ប៉ុន្តែ ប្រជាកសិករដ៏ច្រើនមហិមាដែលប្រកបអាជីវកម្មរបស់ខ្លួននៅប៉ែកខាងជើង និងប៉ែកឦសាននៃប្រទេសរស់នៅក្នុងភាពក្រីក្រ ពុំទទួលបានផ្លែផ្ការីកចម្រើនលូតលាស់នៃសេដ្ឋកិច្ចថៃដូចអ្នក ទីក្រុងបាងកកឡើយ។
ការលេចឡើងនៅរវាងឆ្នាំ២០០០នូវរូបលោកThaksin Shinawatra នាយករដ្ឋមន្ត្រីមានគំនិតប្រជានិយមដែលបានឈ្នះឆ្នោតសភាពីរលើកហើយ បានត្រូវផ្តួលរំលំដោយរដ្ឋប្រហារនៅឆ្នាំ២០០៦ ជាកត្តាមួយដ៏សំខាន់ក្នុងការធ្វើឲ្យមានគម្លាតរវាងអ្នកស្រែនិង អ្នកទីក្រុងបាងកក។ ហើយទាំងនេះ ក៏បានជួយដាស់តឿន”សតិសម្បជញ្ញៈនយោបាយរបស់ប្រជាកសិករក្រីក្រថៃ ទាំងនោះឲ្យចេះភ្ញាក់រលឹក។
ក្រោយពីលោកអភិស៊ីទបានបដិសេធសំណើរបស់ពួកអាវក្រហមឲ្យរំលាយសភា ក្នុងរយៈពេល៣០ថ្ងៃរួចមក លោកនាយករដ្ឋមន្ត្រីអភិស៊ីទបានប្រកាសបញ្ជាក់ឲ្យដឹងនៅថ្ងៃអាទិត្យ នេះថា លោកនឹងធ្វើការបណ្តេញបាតុករអាវក្រហមដែលបានធ្វើឲ្យសកម្មភាពនៅ ទីក្រុងបាងកកជួបនឹងការគាំងស្ទះ។ទាំងនេះនៅតាមរយៈកញ្ចក់ទូរទស្សន៍ ដែលមានអមដោយប្រមុខនៃកងកម្លាំងយោធាថៃលោកAnupong Paojinda។ ធ្វើយ៉ាងនេះដើម្បីបង្ហាញឲ្យគេឃើញថា គ្មានទេការបាក់បែកនៅក្នុងរង្វង់កំពូលនៃអ្នកដឹកនាំថៃ។
នៅថ្ងៃអាទិត្យនេះ លោកអភិស៊ីទបានប្រកាសបញ្ជាក់ទៀតថា នឹងមានបេសកកម្មយោធាដើម្បីធ្វើការកាន់កាប់សង្កាត់ពាណិជ្ជកម្ម Ratchaprasong ដែលជាទីកន្លែងប្រជុំដ៏សំខាន់របស់ពួកបាតុករអាវក្រហម។ ក៏ប៉ុន្តែ លោកអភិស៊ីទពុំបានបង្ហាញឲ្យដឹងពីដំណើរការ ពីវិធានការ ឬពីពេលវេលាឡើយ។
សហគមន៍អន្តរជាតិ ជាពិសេសសហរដ្ឋអាមេរិកនិងអង្គការសហប្រជាជាតិបានអំពាវនាវជាច្រើនលើក ឲ្យ ភាគីអាវក្រហមដែលគាំទ្រលោកថាក់ស៊ីននិងភាគីអាវលឿងដែលគាំទ្រលោក អភិស៊ីទ ចេះរិះរកដំណោះស្រាយឲ្យវិបត្តិនយោបាយថៃដោយរបៀបសន្តិវិធី ដោយចៀសវាងកុំឲ្យមានការបង្ហូរឈាម។
ក៏ប៉ុន្តែ ក្តីសង្ឃឹមនៃការរិះរកដំណោះស្រាយដោយសន្តិវិធីឲ្យវិបត្តិនយោបាយថៃ ហាក់ដូចជារសាត់កាន់តែឆ្ងាយទៅៗ ក្រោយពីលោកអភិស៊ីទបានបដិសេធសំណើរបស់ពួកអាវក្រហមឲ្យរំលាយសភា ក្នុងរយៈពេល៣០ថ្ងៃរួចមក។
ដូច្នេះ វិបត្តិនយោបាយថៃបច្ចុប្បន្ននេះអាចវិវត្តទៅរកស្ថានភាពមួយដ៏គួរឲ្យ សែនបារម្ភ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ