ហេតុអ្វីបានជានាយករដ្ឋមន្រ្តីអ៊ីស្រាអែលឧស្សាហ៍ទៅជួបប្រធានាធិបតីរុស្ស៊ីម្ល៉េះ?
ចុះផ្សាយនៅថ្ងៃ៖
ស្តាប់ - ០៥:៣៤
គ្រាន់តែក្នុងរយៈពេល ១ឆ្នាំចុងក្រោយនេះ លោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូបានទៅបំពេញទស្សនកិច្ចក្នុងប្រទេសរុស្ស៊ីរហូតដល់ទៅ ៣ដង។ នៅក្នុងទស្សនកិច្ចទាំង ៣លើកនៅរស្ស៊ី លោកនេតាន់យ៉ាហ៊ូត្រូវបានទទួលជួបយ៉ាងរាក់ទាក់ និងស្និទ្ធិស្នាលពីលោកប្រធានាធិបតីរុស្ស៊ីពូទីន។ ជាលក្ខណៈប្រវត្តិសាស្រ្ត អ៊ីស្រាអែលជាសម្ព័ន្ធមិត្តចាក់ទឹកមិនលេចរបស់អាមេរិក ចុះហេតុអ្វីបានជាឥឡូវ អ៊ីស្រាអែលហាក់ដូចជាទៅផ្អែមល្ហែមជាមួយរុស្ស៊ីខ្លាំងម្ល៉េះ?។
ជាងពេលណាៗទាំងអស់ ពិសេសក្នុងរយៈពេល ១ឆ្នាំចុងក្រោយនេះ ទីក្រុងមូស្គូប្រទេសរុស្ស៊ីបានក្លាយជាទីក្រុងមួយដែលលោកនាយករដ្ឋមន្រ្តីអ៊ីស្រអែលបិនយ៉ាមីន នេតាន់យ៉ាហ៊ូឧស្សាហ៍ចេញ ចូលខ្លាំងណាស់។ ទស្សនកិច្ចរបស់លោកនេតាន់យ៉ាហ៊ូក្នុងទឹកដីរុស្ស៊ីកាលពីថ្ងៃអង្គារ ទី៧ មិថុនាកន្លងទៅថ្មីៗនេះ គឺជាទស្សនកិច្ចលើកទី៣ ក្នុងរយៈពេល ១ឆ្នាំ និងដែលគ្មាននរណាបានរង់ចាំទាល់តែសោះ។ ជាការពិត ក្នុងនាមជាប្រមុខរដ្ឋាភិបាលរបស់ប្រទេសមួយ លោកនេតាន់យ៉ាហ៊ូចង់ទៅបំពេញទស្សនកិច្ចនៅក្នុងប្រទេសណាក៏បាន និងចំនួនប៉ុន្មានដងក៏បានដែរ។
តែចម្ងល់ដែលគ្រប់គ្នាកំពុងឆ្ងល់ពេលនេះគឺថា ហេតុអ្វីបានជាលោកនេតាន់យ៉ាហ៊ូឧស្សាហ៍ចេញ ចូលរុស្ស៊ីញឹកញាប់ដល់ម្លឹង ព្រោះវាជាកាយវិការមួយដែលគេមិនធ្លាប់ឃើញមានទេនាពេលកន្លងមក។ ម្យ៉ាងទៀត អាមេរិកដែលជាសម្ព័ន្ធមិត្តចាក់ទឹកមិនលេចរបស់អ៊ីស្រាអែលបែរជាលោកនេតាន់យ៉ាហ៊ូមិនសូវទៅវិញ។ តើវាមានរឿងអ្វីកើតឡើងរវាងអ៊ីស្រាអែល និងរុស្ស៊ី ឬមួយក៏ថា តើវាមានរឿងអ្វីកើតឡើងរវាងអ៊ីស្រាអែល និងអាមេរិក?។ ចម្លើយមានទាំងពីរ រវាងអ៊ីស្រាអែល និងរុស្ស៊ីក៏មាន ហើយរវាងអ៊ីស្រាអែល និងអាមេរិកក៏មានដែរ។
រវាងរុស្ស៊ី និងអ៊ីស្រាអែល គឺរូបលោកប្រមុខរដ្ឋាភិបាលអ៊ីស្រាអែលនេតាន់យ៉ាហ៊ូដែលបានទៅញិកញ៉ក់ដាក់លោកប្រធានាធិបតីរុស្ស៊ីពូទីនមុនគេ ពិសេសតាំងពីរុស្ស៊ីបានផ្តើមចេញមុខលូកដៃកាន់តែជ្រៅទៅក្នុងជម្លោះផ្សេងៗនៅតំបន់ដើមបូព៌ា ពិសេសជម្លោះនៅក្នុងប្រទេសស៊ីរី។ សូមជម្រាបជូនថាក្នុងរយៈពេលជិត ១ឆ្នាំចុងក្រោយនេះ រុស្ស៊ីបានចូលអន្តរាគមន៍ផ្លូវយោធានៅក្នុងប្រទេសស៊ីរីក្រោមហេតុផលថា ដើម្បីវាយកម្ទេចពួកជីហាតអង្គការរដ្ឋអ៊ីស្លាម។ តែតាមពិតទៅនោះ អន្តរាគមន៍របស់រុស្ស៊ីគឺមានគោលដៅជួយការពារ និងជួយរក្សាអំណាចលោកប្រធានាធិបតីស៊ីរីអាសាដទៅវិញទេ។
ម្យ៉ាងទៀត និងក្រៅពីទ័ពរុស្ស៊ី ប្រទេសអ៊ីរ៉ង់ និងចលនាហេស្បូឡាលីបង់ក៏បានបញ្ជូនទ័ពរបស់ខ្លួនទៅជួយច្បាំងខាងទ័ពរដ្ឋាភិបាលស៊ីរីក្នុងគោលដៅជួយរក្សាអំណាចលោកអាសាដដូចគ្នា។ នៅត្រង់ចំណុចនេះ សហគមន៍អន្តរជាតិបានយល់ និងឃើញច្បាស់ណាស់ ហើយអ្នកដែលយល់កាន់តែច្បាស់ថែមទៀតនោះ គឺគ្មាននរណាក្រៅពីអ៊ីស្រាអែលទេ។ អ៊ីស្រាអែលដែលបានមើលឃើញថា វត្តមានទ័ពអ៊ីរ៉ង់ និងទ័ពហេស្បូឡាក្នុងទឹកដីស៊ីរីសព្វថ្ងៃ ពិតជារឿងមួយគ្រោះថ្នាក់ខ្លាំងណាស់សម្រាប់សន្តិសុខខ្លួន។ អ្វីដែលអ៊ីស្រាអែលបារម្ភខ្លាំងនោះ គឺខ្លាចតែពួកនេះប្រើទឹកដីស៊ីរីធ្វើជាឈ្នាន់ដើម្បីបើកការវាយប្រហារលើទឹកដីអ៊ីស្រាអែលពីប៉ែកខាងជើង។
ដូច្នេះការដែលលោកប្រមុខរដ្ឋាភិបាលអ៊ីស្រាអែលនេតាន់យ៉ាហ៊ូឧស្សាហ៍ទៅជួបលោកប្រធានាធិបតីរុស្ស៊ីពូទីនពិតជាមិនមែនរឿងចៃដន្យទេ។ មិនចៃដន្យព្រោះលោកនេតាន់យ៉ាហ៊ូដឹងថា មានតែលោកពូទីនម្នាក់ទេដែលមានទឹកមាត់ប្រៃអាចនិយាយប្រាប់ស៊ីរី អ៊ីរ៉ង់ និងហេស្បូឡាលីបង់ដែលជាសត្រូវស៊ូពូជរបស់អ៊ីស្រាអែលកុំឲ្យវាយប្រហារអ៊ីស្រាអែល។ ជាថ្នូរត្រឡប់វិញ លោកនេតាន់យ៉ាហ៊ូអាចបញ្ជាក់ពីការគាំទ្ររបស់អ៊ីស្រាអែលចំពោះលោកពូទីននៅក្នុងទង្វើមួយចំនួនរបស់រុស្ស៊ីដែលកំពុងជាប់ទណ្ឌកម្មសហគមន៍អន្តរជាតិ។
ទន្ទឹមគ្នានេះ លោកនេតាន់យ៉ាហ៊ូក៏អាចលើកមុខមាត់រុស្ស៊ីនៅលើឆាកអន្តរជាតិ តាមរយៈការផ្តល់ឲ្យរុស្ស៊ីនូវតួនាទីជាអ្នកសម្របសម្រួលកិច្ចចរចាស្វែងរកសន្តិភាពឲ្យអ៊ីស្រាអែល និងប៉ាឡេស្ទីន។ គឺជាតួនាទីមួយដែលបានស្ថិតក្នុងកណ្តាប់ដៃអាមេរិកផ្តាច់មុខតាំងពីយូរយារណាស់មកហើយ។ ឥឡូវនេះទៀត លោកនេតាន់យ៉ាហ៊ូកំពុងឃើញអាមេរិក និងបារាំងព្យាយាមស្វែងរកកិច្ចព្រមព្រៀងមួយនៅឯក្រុមប្រឹក្សាសន្តិសុខអង្គការសហប្រជាជាតិប្រឆាំងនឹងការធ្វើអាណានិគមជនជាតិជ្វីហ្វក្នុងដែនដីប៉ាឡេស្ទីន។ នេះជារឿងមួយដែលលោកនេតាន់យ៉ាហ៊ូគ្មានជម្រើសអ្វីទៅពឹងលោកពូទីនឲ្យជួយទេក្នុងនាមរុស្ស៊ីជាប្រទេសសមាជិកអចិន្រ្តៃយនៃក្រុមប្រឹក្សាសន្តិសុខដែលមានសិទ្ធិវ៉េតូ។
បើគេក្រឡេកមើលទំនាក់ទំនងរវាងអ៊ីស្រាអែល និងអាមេរិកវិញម្តង អ្វីៗហាក់ដូចជាមិនសូវរលូនដូចមុនឡើយ។ តាំងពីលោកប្រធានាធិបតីអាមេរិកអូបាម៉ាបានទៅល្អូកល្អឺនជាមួយអ៊ីរ៉ង់ដែលជាសត្រូវស៊ីសាច់ហុតឈាមរបស់អ៊ីស្រាអែល និងការដែលអាមេរិកបានបង្វែរអាទិភាពការទូតចេញពីតំបន់ដើមបូព៌ាមក លោកនេតាន់យ៉ាហ៊ូបានដឹងខ្លួនថា អ៊ីស្រាអែលមិនអាចទៅពឹងពាក់អាមេរិកឲ្យជួយការពារប្រយោជន៍ខ្លួនបានទៀតឡើយ ពោលត្រូវទៅរកអ្នកផ្សេងឲ្យជួយការពារវិញម្តង។ តាំងពីខែវិច្ឆិកាឆ្នាំ ២០១៥ មក លោកនេតាន់យ៉ាហ៊ូមិនបានទៅអាមេរិកដើម្បីជួបលោកអូបាម៉ាទេ ហើយគម្រោងជួបនាខែមីនាកន្លងទៅទៀត ក៏ត្រូវបានលប់ចោលវិញដោយសាររឿងខ្វែងគំនិតគ្នាទាក់ទងនឹងជំនួយយោធាអាមេរិកចំពោះអ៊ីស្រាអែល។
តើលោកនេតាន់យ៉ាហ៊ូកំពុងប្តូរយុទ្ធសាស្រ្តទាត់អាមេរិកទៅចាប់យករុស្ស៊ីវិញឬ?។ បើមើលមួយភ្លែតទៅ គឺអ៊ីចឹងមែន តែបើមើលឲ្យយូរបន្តិចទៅឃើញថា អ៊ីស្រាអែលនៅតែទុកចិត្តអាមេរិកជាងនរណាទាំងអស់។ នៅត្រង់ចំណុចនេះ រុស្ស៊ីបានដឹងច្បាស់ ហើយក៏មិនល្ងង់ដែរ។ លោកពូទីនប្រយ័ត្នប្រយែងនឹងសម្តីស្នេហ៍របស់លោកនេតាន់យ៉ាហ៊ូដែលអាចជាការរុញរុស្ស៊ីឲ្យប្រឈមមុខនឹងអាមេរិកកាន់តែខ្លាំង។ តែទន្ទឹមគ្នានេះ រុស្ស៊ីក៏ព្យាយាមបបោសអង្អែលអ៊ីស្រាអែលតិចៗដើម្បីប្រយោជន៍ខ្លួនដោយមិនចង់បំបាក់មុខអ្នកណាម្នាក់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ